Read lunyore SAKARIA 6 Bible Online

SAKARIA 6 - lunyore bible

SAKARIA 6

¹Khandi ndalola libisulo lindi. Mwibisulo tsana ndalola amakaari kane niketsanga okhubir'ra hakari webikulu b'bili ebiomukasa.

²Likari liokhuranga liali nilikhweswanga netsisululi tsinzakhanyu, likari liakhabili nalio liali nilikhweswanga netsisululi tsimwamu,

³likari liakhataru liali nilikhweswanga netsisululi tsindafu, ne likari liakhane nalio liali nilikhweswanga netsisululi tsielikokhe.

⁴Ma nireeba om'malaika owali nal'lomanga n'nase mbu, “Omwami, esifune siamakaari kano nisina?”

⁵Om'malaika nakalusia niyambool'la mbu, “Tsino nemiyeka chine etsirulanga mumbeka tsine tsiomwikulu; chiakharula butswa imbeli wo Mwami, Omwami wesibala siosi luno.”

⁶Likari elikhweswanga netsisululi tsimwamu liali nilitsitsanga esinyolu musibala sia Babulonia, ne tsindafu tsiali nitsitsitsanga emasaba, ne etsisululi tsielikokhe tsiali nitsitsitsanga enandete.

⁷Olwe tsisululi tsielikokhe tsiali nitsirulanga tsiali nesinani okhutsia okhulambuula esibala. Om'malaika naboola mbu, “Tsie mulambuule esibala.” Kho nitsilambuula esibala.

⁸Ma niyananjilisia naboola mbu, “Etsisululi etsiali okhutsia esinyolu musibala sia Babulonia tsisiling'anisie lirima lio MWAMI.”

⁹OMWAMI yambelesia ling'ana yili.

¹⁰Yaboola mbu, “Obukule ebihanwa ebirula khubahambe bano: Heledai, Tobiya, nende Yedaya, ma otsia bwangu ingo wa Yosia omusiani wa Sefania. Abandu yaba bosi babeye okhuchelela okhurula mubuhambe Babulonia.

¹¹Obukule efetsa nende etsahabu, okhurula khubo ma olombekhwo olusimbi, ma olure khumurwe kwa Yoshwa, omusiani wa Yehosadaki, Omwesaalisi Omukhongo.

¹²Omubool'le mbu kano niko ako MWAMI Wokhunyala Biosi aboolanga, ‘Omundu olangwanga Olusaka alahindihala ahaba naali ne alombokha obuhia Ehekalu yo MWAMI.

¹³Ne niye owanawombokhe Ehekalu yo MWAMI nanyoola oluyali olwomuruchi akwananga okhunyoola khandi nayamihe abandube. Omwesaalisi nasinjile ahembi nolurubalwe, nabo babili balakhola emilimo halala mubuhambani.’

¹⁴Olusimbi nalubetsenje mu Hekalu yo MWAMI, singa esitsusio khu Helidai, Tobiya, Yedaya nende Yosia.”

¹⁵Ne abandu abamenyanga ehale bakhetse okhukhonya mukhwombokha Ehekalu yo MWAMI. Ne olwa yakhabe niyombokhelwe mwakhamanye mbu OMWAMI Wokhunyala Biosi niye owaaruma khwinywe. Yaka kosi kalekhola mbwo, nimuba nimurakhwo omwoyo okhulonda amalako ko MWAMI, Nyasaye wenywe.