Read lunyore SAKARIA 7 Bible Online

SAKARIA 7 - lunyore bible

SAKARIA 7

¹Mumuhika kwakhane olwa Dario yali naali omuruchi, mumwesi kwakharano nakhane (Omwesi kwa Kisilewi) nikuli khane OMWAMI yambool'la amang'ana.

²Abandu ba Betseli bali nibarumile Sharesa nende Regemu Meleki nende abandu babwe mu Hekalu yo MWAMI Wokhunyala Biosi okhusaaya tsikhabi okhurula khu MWAMI

³khandi bareebe abesaalisi nende abaroobi amang'ana kano: “Mbula nakhutsilil'le okhwekhuula khulwokhumumwa khwe Hekalu khulwo okhuhonga okhulia mumwesi kwakharano singa khwekhuulanga emihika eminji noho?”

⁴Kano niko amang'ana ako MWAMI yali okhumbool'la.

⁵Yaboola mbu, “Bool'la abandu bomusibala sino nende abesaalisi, mbu olwa bahonga okhulia nibekhuula mumwesi kwakharano nende okwakhane nakhataru mumihika chiosi amakhumi kane nakataru, sibaakholanga mbwo khulwo khumbelesia ise oluyali tawe.

⁶Kata olwa balitsanga, nende okhunywa, balitsanga nokhunywa khulwokhwikura abene.”

⁷Kano niko amang'ana ako MWAMI yaboola okhubir'ra mubaroobi bokhuranga, olwa Yerusalemu liali niliahindihala khandi abandu abenji nibamenyamwo, khandi olwa abandu abenji bamenyanga mumataala akalibotokhana nende mulukongo lwenandete halala nende khundulo khwebikulu ebili emasaba.

⁸OMWAMI yabool'la Sakaria amang'ana kano:

⁹“Khale muno ndali okhuhelesia abandu banje amalako kano mbu, ‘Okhwola mulole mbu obukhalachi bwatooto bukholwanga, khandi buli mundu amubeelanga owasie tsimbabasi namukhol'la amalahi.

¹⁰Murasandia abakhasi abalekhwa, kata abaana ababisandu, kata abarende abemenyibwa mwinywe, nohomba omundu wosi omutakha tawe. Ne muraloosiakhwo tsinjila tsiokhusaalisania abene khubene tawe.’

¹¹“Nebutswa abandu banje booma emirwe ma nibasuula okhuhulila. Beekala amarwi, balekhe okhuhulila

¹²ma nibatinyia emioyo chiabwe k'ka singa lichina liokhulwanda. Ndamala nimbahambila lirima elinji okhusila. Sichila sibayenya okhuhulila amalako nende amang'ana kanje akandabarumila okhubir'ra mubaroobi bakhale.

¹³Kho nase ndali okhusuula okhubakalusia olwa bali okhusaaya khu ise, ne sichila olwa ndabalanga basuula okhuhulila.

¹⁴Nebutswa ndali okhubahuutsa singa esihutsutsu nimbahila mumahanga akabaramanyile. Esibala esilahi yisi siasikala esiele sila omundu wosi okhumenyamwo tawe.”