Read lunyore SAKARIA 8 Bible Online

SAKARIA 8 - lunyore bible

SAKARIA 8

¹OMWAMI Wokhunyala Biosi yabool'la Sakaria amang'ana kano mbu:

²“Ndayekomba okhukhonya Yerusalemu khulwobuyanzi bwanje obweinikhu khubandu balio obuchilanga nisinyikhila abasuku babwe noburima obululu.

³Nangalukhile Sayuni, ne namenye hakari welitookho lia Yerusalemu. Nalio nalimanyikhe singa litookho lisubilwa, ne esikulu sio MWAMI Wokhunyala Biosi nasilangwe mbu Esikulu esitsienukhu.

⁴Abandu abasakhulu nende abasiele okhusila abachendanga nomutichilo, nabekhale mumichitsi tsia Yerusalemu khandi.

⁵Kata emihanda chiomwitookho chiletsulamwo abaana abasiani nabakhaana, nibasinanga.

⁶“Kano kanyala okhulolekha okhuba amatinyu khu yabo abasikala khubelihanga, nebutswa sikali amatinyu khu ise tawe.

⁷Ise nambonie abandu banje okhurula mubibala biebukwe nende ebiemasaba;

⁸ma nambaleere okhumenya mu Yerusalemu. Bakhabe abandu banje, nase ndakhabe Nyasaye wabwe, nimbarukanga mubusubilwa nende mubwatooto.

⁹“Mube nolutswoni! Luno muhulilanga amang'ana amatelwa akabaroobi bal'loma olwomusinji kwayabwa khulwokhwombokha obuhia Ehekalu yanje.

¹⁰Khale, amatukhu yako nikasili okhwola, abandu nohomba emiruko sibarungwanga khulwemilimo chiabwe tawe ne abulaho owanyoolanga omulembe khubasukube sichila ndali okhutsuuba abandu khubasiabwe.

¹¹Nebutswa luno sikhol'langa abandu abasikala bano singa obwandali okhukhola mumatukhu kakhale tawe.

¹²Nabaraake ebiraakwa biabwe mumulembe. Emisabibu chilaama ebiamo ebinji ne liloba lilahaana obuswache bwalio, khandi ifula inyinji elabaho. Nambane tsikhabi yitsi tsiosi khubandu banje abasikala musibala.

¹³Inywe abandu ba Yuda nende aba Isiraeli, olwabandu bayenyelenje betsinzibulo okhulaama esilaamo siobubi khubasiabwe barumikhiyenje amera kenywe singa esilaka munwa. Nebutswa namuhonie ma namukhole okhuba abetsikhabi khubetsimbia kho muraria nohomba okhurimukhwa ikholo tawe.”

¹⁴OMWAMI Wokhunyala Biosi aboolanga mbu, “Olwabakuka benywe bachila nimba nelirima, ndali okhuloosia okhubahelesia likhupako ne sindakalukha inyuma tawe, habula ndali okhukhola aka ndali nindoosisie.

¹⁵Nebutswa luno ndoosianga obwa nanamile abandu ba Yerusalemu nende Yuda tsikhabi. Kho muraria tawe.

¹⁶Kano niko aka mukwananga mukhole: Muboolenje akatooto buli mundu khuwasie. Muhaanenge obukhalachi bwobwatooto musiina obunyala okhuleera emilembe.

¹⁷Omundu wosi wosi khwinywe arakhakulukunzakhwo okhusaalisia owasie mumwoyokwe tawe. Murayanza okhuhaana obukobokheli bwobubehi olwa mwesuhanga tawe. Ise ndasuula obubehi, obukhalachi obusiamu nende obusoolo.”

¹⁸OMWAMI Wokhunyala Biosi yambool'la ling'ana

¹⁹lino mbu: “Okhuhonga okhulia khwomumwesi kwakhane, nokwakharano, nende okwakhataru nakhane, nende mumwesi kwelikhumi chilaba emiesi chobusangali khubandu ba Yuda. Kho okhwola muyanze obwatooto nende omulembe.”

²⁰OMWAMI, Wokhunyala Biosi aboolanga mbu, “Inyinga yitsanga olwabandu abamenyanga mumatookho amenji nabetse Yerusalemu.

²¹Yabo abamenyanga mwitookho elala bakhabool'le yabo abamenyanga mulindi mbu, ‘Chende khutsie bwangu okhwekayakaya OMWAMI Wokhunyala Biosi ma khumusaaye mbu okhulaamile tsikhabi!’

²²Tooto abandu abenji abetsinzibulo tsietsingufu bakhetse mu Yerusalemu okhwekayakaya OMWAMI Wokhunyala Biosi nokhumusaaya mbu abalaamile tsikhabi.

²³Mumatukhu yako, abandu likhumi okhurula mutsimbia tsinjeni bakhetse khu Muyahudi mulala nibaboola mbu, ‘Khwenyanga khusange mubulaame bwenywe sichila khwahuliye mbu Nyasaye ali n'nenywe.’ ”