Read lunyore SAKARIA 9 Bible Online

SAKARIA 9 - lunyore bible

SAKARIA 9

¹Kano namang'ana okhurula khu MWAMI: Umal'le okhukhalachila esibala sia Haduraki nende litookho lia Damasiko okhunyoola esinyasio. Litookho lia Siria likali nelio MWAMI, singa obwetsinzibulo tsia Isiraeli tsiosi tsili etsio MWAMI.

²Kata Hamatsi elili oburende nende Haduraki khandi nalio nelio MWAMI, halala nende amatookho ka Tiro na Sidoni kata obwakali nobusitsa obweikulu.

³Tiro liayeyombokhela oluhinga, ma liayebunjikhila efetsa singa olukhuukhi, nende etsahabu isiyikhu singa amatoyi akokhunjila!

⁴Lole OMWAMI alalinuula yibio biosi, nafuuba obuhinda munyanza, ne litookho liene lilasambwa nomulilo ma likhamulukhe liosi.

⁵Litookho lia Ashikeloni lilalola yaka ma libe noburi. Litookho lia Gasa nalio lilakalola ma lisaalile bululu. Kho nimbwo Ekeroni, halala nende obunaayi bwalio nalimamil'lwe hasi. Gasa nalikosie omuruchi walio ne abandu nabelukhe okhurula mu Ashikeloni.

⁶Abandu bamahanga kabukhan'ne balamenya mu Ashitoti. OMWAMI aboolanga mbu, “Nanzikal'le esunga ya Bafilisiti bosi.

⁷Sinabaliekhwo inyama amatsahi nikasilimwo tawe. Kata khandi sinabaliekhwo ebiokhulia bio musilo tawe. Yabo bosi abakhahonokokhe mubo bakhabal'lwe mubandu banje ne bakhabe singa esilibwa mulwibulo lwa Yuda. Ekironi yakhabal'lwe mubandu banje singa obwa Abayebusi bali okhubal'lwa mubo.

⁸Ndakhalinde esibala sianje ne ndakhekal'le abasikari babasuku okhubir'ramwo. Sindakhalekhe abandu ababi okhusandia abandu banje khandi tawe. Ise mal'le okhulola obwabandu banje bakhupanga esibi.”

⁹Sangale, sangale inywe abandu ba Sayuni! Khupe liyoka liobusangali inywe abandu ba Yerusalemu! Omuruchi wenywe yeetsanga khwinywe! Yeetsanga nomwekhoyo nende obulechi bwosi, nebutswa wetutuhisie ma unin'ne khupunda; khusimoosi, omwana wepunda.

¹⁰OMWAMI aboolanga mbu, “Nambinie amakaari kobulwani okhurula Isiraeli etsisululi okhurula mu Yerusalemu; obuyingo oburumikhilwanga mwihe nabufunakwe. Omuruchi wenywe nalombe omulembe mumahanga kosi; nayamihe okhurula khunyanza okhwola khunyanza yindi, Okhurula khumuchela kwa Efurate okhwola khusihesi siesibala.”

¹¹OMWAMI aboolanga mbu, “Khulwe indakano yanje n'nenywe eyali okhuralisibwa namatsahi kemisango, naakhole abandu benywe okhuba abalakhuule, namuhinie mubuko obuhangal'lu bwomubuhambe.

¹²Inywe ababohe abanaayanga, kalukhe muluhinga. Luno mubool'langa mbu namurunge esiakhabili, netsikhabi khulwesibi esiamukhupanga.

¹³Naarumikhile Yuda, singa obuyingo bwomusikari, ne Isiraeli singa tsisele. Narumikhile abandu ba Sayuni singa olukanga okhulwana abandu be Buyunani.”

¹⁴Ma OMWAMI alalolekha ikulu wabandube; alalasa tsiseletsie singa tsimbeni. OMWAMI Nyasaye alakhupa olwika, alachenda butinyu nabir'ra mumbumbuyeka okhurula enandete.

¹⁵OMWAMI Wokhunyala Biosi alasoola abandube, nabo balamuma abasuku babwe. Balakhupa liyoka mwihe singa abandu abakhol'lwe namalwa, ne balaraatsia amatsahi kabasuku babwe. Kalanyul'lukha singa amatsahi komusango akatsukhilwe khulusambwa okhurula khulutaabo.

¹⁶Olwelitukhu yilio liakhoole, OMWAMI Nyasaye yakhahonie abandube, singa obwomwayi ahonianga esiayosie okhurula musibi. Balang'inang'ina musibalasie singa amachina kobukusi akolusimbi.

¹⁷Mako obwesibala silaba esilahi khandi esiokhuyanzisia! Obuswache bwasio nende ewaini yasio elachila ababuukha basio okhumeetekha mutsingufu.