Read lunyore MALAKI 2 Bible Online

MALAKI 2 - lunyore bible

MALAKI 2

¹OMWAMI Wokhunyala Biosi abool'langa abesaalisi mbu, “Lilako yili nelienywe:

²Okhwola mumbelesie oluyali mukosi akamukholanga. Ne nimusuula okhuhulila akamubool'langa khandi nimuba nimurakhola esinani okhumbelesia oluyali, kho namuleer're esilaamo siobubi. Ndandeere esilaamo khubindu biosi ebiamunyoolanga khulwokhumukhonya. Akatooto kali mbu ndamala okhuleera esilaamo khubio sichila simubukulanga amalako netsingufu tawe.

³Nambelesie abaana benywe esinyasio nimbakha amasingo kemiruko chienywe chiemisango mutsimoni tsienywe; ne namuhilwe esioba khusikulu siesingo.

⁴Nilwo olwa mulamanya mbu ndamurumiye lilako lino, kho indakano yanje nabesaalisi abali abolwibulo lwa Lawi elekhe okhufunakwa.

⁵“Mundakano yanje ndali okhubasubisia obulamu nende omulembe ne yako niko aka ndali okhubahelesia kho babe abanyala okhumbelesia oluyali. Mumatukhu yako bali okhumbelesia oluyali khandi bali okhuuria.

⁶Bekesia akali amalunji ne tawe amasiamu. Bamenya mubusanjilani obulahi n'nase. Sibakholanga butswa akali amalahi konyene tawe nebutswa khandi bali okhukhonya abenji okhulekha okhukhola amabi.

⁷Nomulimo kwabesaalisi okhwibaala obuchesi bwahabwene khuka Nyasaye. Abandu bakhoyele okhutsia khubo okhweka akobulalilo bwanje sichila bo nibo abarumikhilibo MWAMI Wokhunyala Biosi.

⁸“Nebutswa luno inywe abesaalisi mumal'le okhurula khunjila yahabwene. Amebaalo kenywe kasiamia abenji ma kachilanga nibakhola amabi. Mwamala okhufunaka indakano eyandalomba n'nenywe.

⁹Khulwe yako, nase khandi nanjile Abaisiraeli nabamuchaaye sichila simulondanga akobulalilo bwanje tawe, ne olwa mwibaal'langa abandu banje simubakhol'langa amatelwa tawe.”

¹⁰Ifwe fwesi, sikhuli nende papa mulala? Nyasaye owakhulonga siali mulala? Kho nisina esichilanga nikhurahesia amasubisio kefwe buli mundu nowasie, khandi nisina esichilanga nikhuchaaya indakano eya Nyasaye yalomba nabakuka befwe?

¹¹Abandu ba Yuda bafunaka esiesuho siabwe khu Nyasaye ma bakhola akes'sinyo mu Yerusalemu nende khusibala siosi. Bafwabia Ehekalu yo MWAMI, ayanzanga. Abasaatsa bateesia abakhasi abekayakayanga abanyasaye bebibala bindi.

¹²OMWAMI ahinie abandu abakholanga yaka mumukanda kwa Baisiraeli, ma arabbahuchil'la okhusanga mubihanwa bielihanga lileeranga okhuhaan'na OMWAMI Wokhunyala Biosi tawe.

¹³Kano niko akandi akamukholanga. Mwitsusianga olusambwa lwo MWAMI nende amasika, nimulakaya nende okhwekhuula sichila OMWAMI siasihuchil'langa ebihanwa biamumuleer'ranga tawe.

¹⁴Mureebanga mbu busina siasihuchil'langa ebihanwa bienywe? Esifune sili mbu OMWAMI mwene wamanya mbu inywe mwafunaka indakano yamwalomba nomukhasi wamwateesia nimusili ababuukha. Yali omukhasi wenywe, ne nenywe mwafunaka indakano yamwesuha khuye kata nikali mbu mwali okhwesuhila imbeli wa Nyasaye mbu mwakhabe abasubilwa khuye.

¹⁵Nyasaye siali niye owamukhola okhuba omubili mulala khandi omwoyo mulala n'naye? Lichoomolie muko liali sina? Liali mbu munyoole abaana abali abandu ba Nyasaye batooto. Kho mukhole akamunyala okhulola mbu abulaho khwinywe ofunakanga esiesuhosie khumukhasiwe.

¹⁶OMWAMI, Nyasaye wa Isiraeli, aboolanga mbu, “Sinyikhilanga okhukhungwa khwomukhasi. Nakes'sinyo khu ise olwa mulala khwinywe akholanga ling'ana liibi singa yili khumukhasiwe. Muteeme akamunyala okhulola mbu simufunakanga esiesuho sienywe esiokhuba abasubilwa khubakhasi benywe tawe.”

¹⁷Muuchonyisie OMWAMI nende amang'ana kenywe kamul'lomanga. Nebutswa mureebanga mbu “Khumuchoonyisie mbwena?” Mumuchonyisie khulwokhuboola mbu, “OMWAMI Wokhunyala Biosi apaalanga mbu abakholi bobubi bosi nabalahi; kata wabayanza.” Nohomba khulwo khureeba mbu, “Nyasaye okhoyele okhuba omukhalachi wahabwene ali hena?”