Read lunyore MALAKI 3 Bible Online

MALAKI 3 - lunyore bible

MALAKI 3

¹OMWAMI Wokhunyala Biosi aboolanga mbu, “Nzia okhuruma Omurumwa wanje okhuurechekhela injila. Nilwo olwo Mwami wamukhaabanga yakhetse matetekhana khu Hekalu yiye. Omurumwa wamunaayanga okhulola yakhetse okhulandia Indakano yanje.”

²Nebutswa niwina owakhanyala okhwefwila litukhu liayakhetse? Kata niwina owakhahonokokhe olwa yakhalolekha? Yakhabe singa omul'lo kwokhusiiya efetsa, khandi singa esabuni yetsingufu eyomusaabi wetsingubo.

³Yakhetse okhukhalaka esiina singa omundu osiiyanga nende okhusaaba efetsa. Singa omwiranyi asiiyanga efetsa nende etsahabu, nimbwo omurumwa wo MWAMI yakhasiiye abesaalisi kho babe abanyala okhuleer'ra OMWAMI omusango omusiiyikhu.

⁴Ma omusango kwabandu ba Yuda nende Yerusalemu bakhaleer're OMWAMI kulamuyanzisia, singa obwakalinji mumatukhu kakhale.

⁵OMWAMI Wokhunyala Biosi aboolanga mbu, “Ndakhalolekhe mwinywe khulwo khumukhalachila esiina, ne ndakhakondekhele bwangu obubi bwabafumu, abaheyi, nende abakobokheli bobubehi; nende yabo abebelanga abakholi babwe nende yabo abakaatanga abakhutsakhali, ababisandu nende abarende; kata khandi nende yabo abarambelesianga oluyali.

⁶“Ise nise OMWAMI ne singalukhananga tawe. Ma kho inywe abetsukhulu ba Yakobo musili okhukora kupu.

⁷Okhurula mumatukhu kabakuka benywe mwayebera okhurula khumalako kanje ma simukalondanga tawe. Mungalukhile, nase ndakhamukalukhila inywe. Nenywe mureebanga mbu, ‘Nisina esiakhwakhola khe khukhukalukhile?’

⁸Nase mureebanga mbu mbula omundu yakhebeela Nyasaye noho? Nebutswa inywe munzibilanga. Ne mureebanga mbu, ‘Khwakhakhwibila mbwena?’ Munzibilanga munjila yokhuhaana esielikhumi nende mubihanwa.

⁹Esilaamo siobubi sili khwinywe mwesi sichila munzibilanga, inywe abandu belihanga liosi pe.

¹⁰Munder're esitonye sielikhumi siosi mu Hekalu yanje, mbu ebiokhulia bibemwo ebihela. Mundeemekhwo luno ne mulalola singa obwa nanzikule amatilisa komwikulu nimutsukhila tsikhabi, okhumuhelesia ebindu ebilahi okhwola olwa namubule obweyangu ahokhura.

¹¹Khulwenywe nanzikal'le tsisiche okhulia ebiamo bieliloba lienywe, ne emisabibu chienywe tsiletsulakhwo tsinzabibu.

¹²Nilwo olwabandu bamahanga kosi bakhamulange mbu abanakhabi sichila esibala sienywe siakhabe habundu halahi ahokhumenya.”

¹³OMWAMI aboolanga mbu, “Mwaboolanga amang'ana amabi okhusila khu ise. Nebutswa mureebanga mbu, ‘Nisina esia khwaboola khuibe?’

¹⁴Muboolanga mbu, ‘Okhukhol'la Nyasaye emilimo nibutswa. Nibukhala sina okhukhola ako MWAMI aboolanga nohomba okhuteema okhumanyia OMWAMI Wokhunyala Biosi mbu khubeeleye khukosi aka khwakhola.

¹⁵Singa obwa khulolanga abandu bomwekhonyo nibo abali nobusangali. Abandu abakholanga obubi nibo abatsitsachil'langa nokhuhindihala khwonyene nebutswa bateemanga Nyasaye nende amabi kabwe ne libulaho eliekholekhanga khubo.’ ”

¹⁶Ma yabo abariitsanga OMWAMI nibabool'lan'na halala, OMWAMI nareka esirwi nahulila aka baboola. Imbeliwe kaliho amang'ana akahandikwa musitapu akal'lomanga khuyabo abariitsanga OMWAMI nende okhumuhelesia oluyali.

¹⁷OMWAMI Wokhunyala Biosi aboolanga mbu “Bakhabe abandu banje. Bakhabe omwandu kwanje omwene, Khwitukhu liesihesi olwa ndakhakhole akelichoomo lianje. Ndakhababeele singa omwibuli abelel'langa omwanawe omurumikhilanga.

¹⁸Ma nilwo olwabandu banje bakhalole obwabukhani hakari homulunji nende omubi, khandi hakari he yabo abarumikhilanga ise Nyasaye nende yabo abararumikhilanga ise.”