Read lunyore MATAYO 1 Bible Online

MATAYO 1 - lunyore bible

MATAYO 1

¹Buno nibwo obulondokhani bwamera akabakukanyene Yesu Kristo, es'soni sia Daudi owali es'soni sia Aburahamu.

²Aburahamu yali samwana Isaka, ne Isaka yali samwana Yakobo ne Yakobo samwana Yudasi nende abamwabo.

³Yudasi yali samwana Feresu na Sera aba yebula mu Tama. Feresu yali samwana Hesironi ne Hesironi yali samwana Ramu.

⁴Ramu yali samwana Aminadabu ne Aminadabu yali samwana Nahashoni; Nahashoni yali samwana Salumoni.

⁵Salumoni niyebula Boasi mu Rahabu; Boasi niyebula Obedi mu Rutsi, Obedi yali samwana Yese;

⁶Yese yali samwana Daudi omuruchi. Naye Daudi yebula Solomoni m'mukhasi sika Uria.

⁷Solomoni yali samwana Rehoboamu; Rehoboamu yali samwana Abiya; Abiya yali samwana Asa.

⁸Asa yali samwana Yehosafati; Yehoshafati yali samwana Yoramu; Yoramu yali samwana Usia.

⁹Usia yali samwana Yosamu ne Yosamu yali samwana Ahasi; Ahasi yali samwana Hesekia;

¹⁰Hesekia yali samwana Manase; Manase yali samwana Amoni; Amoni yali samwana Yosia;

¹¹Yosia yali samwana Yekonia nende abamwabo khu tsinyinga etsiokhwatisibwa okhuhilwa Babuloni.

¹²Ne inyuma wokhwatisibwa nokhuhilwa Babuloni, Yekonia yali samwana Shealitieli; Shealitieli yali samwana Serubabeli

¹³Serubabeli yali samwana Abiudi; Abiudi yali samwana Eliakimu; Eliakimu yali samwana Asori.

¹⁴Asori yali samwana Sadoku; Sadoku yali samwana Akimu; Akimu yali Samwana Eliudi;

¹⁵Eliudi yali samwana Elieseri; Elieseri yali samwana Matani; Matani yali samwana Yakobo.

¹⁶Yakobo yali samwana Yosefu omusaatsa wa Mariamu, owebula Yesu oulangwanga Kristo.

¹⁷Khe tsinzibulo okhurula khu Aburahamu okhwola khu Daudi netsinzibulo likhumi natsine; ne okhurula khu Daudi okhwola khukhwatisibwa okhutsia Babuloni netsinzibulo likhumi natsine, ne okhurula khukhwatisibwa okhutsia Babuloni okhwola khu Kristo netsinzibulo likhumi natsine.

¹⁸Okhwibulwa khwa Yesu Kristo khwali singa mbu; olwa Mariamu mama uwe yali niyahambwa na Yosefu nibasili okhutesania, yanyoolekha nali neinda khulwobunyali bwo Mwoyo Omutsienukhu.

¹⁹Omusaatsa uwe Yosefu olwa yali omundu omulunji, siyayenya okhusimbia Mariamu omurwe habulafu tawe; yapaala okhumulekha masilisi.

²⁰Nebutswa olwa yali nakanakananga amang'ana yaka, om'malaika wo Mwami yalolekha khuye mwilooro, naboola mbu “Yosefu, ibe es'soni sia Daudi, oraria okhuteesia Mariamu okhuba omukhasiwo tawe; okhuba inda yali n'nayo ni khulwa obunyali bwo Mwoyo Omutsienukhu.

²¹Nayebule omwana omusiani; nawe nomukulikhe eliira lilie Yesu; sichila niye olihonia abandube okhurula mutsimbi tsiabwe.”

²²Yaka kosi kali okhwekholekha kho ako Mwami yaboola okhubir'ra m'muroobi kahesikhe mbu;

²³“Omukhaana omuchima aliba ne inda, ma yakhebule omwana omusiani. Balimukulikha eliira lilie Imanueli;” (elibetsanga okhukalukhanibwa “Nyasaye ali halala n'nefwe.”)

²⁴Yosefu yabuukha mundoolo nakhola akom'malaika wo Mwami yamulaka, nateesia omukhasi uwe.

²⁵Nebutswa siyabakhwo halala n'naye tawe okhwola olwa yali niyebuye omwana omusiani. Yamukulikha eliira lilie Yesu.