Read lunyore MATAYO 10 Bible Online

MATAYO 10 - lunyore bible

MATAYO 10

¹Yesu yalanga abechi baabe likhumi nababili halala, nabahelesia obunyali okhuhinia emioyo chiesifwabwi, nende okhuhonia obutekhele bwetsimbila tsiosi.

²Ne amera kabechi tsana likhumi nababili ngakano: owokhuranga, Simoni (owalangwa Petero), nende omwana wabwe Anderea; Yakobo, nende mwana wabwe Yohana abaana ba Sebedayo;

³Filipu, nende Batsolomayo; Tomasi, nende Matayo omusololi wobusuru; Yakobo wa Alufayo, nende Tadayo;

⁴Simoni Omukanaani[5], nende Yudasi Isikariote owamala nasiemana Yesu.

⁵Yaba likhumi nababili nibo aba Yesu yaruma nabalaka, nababool'la, “Muratsiakhwo musibala sia Betsinzibulo nohomba murenjilakhwo mwitaala liosi lia Basamaria tawe.

⁶Habula mutsie khumakondi akakora, abandu ba Isiraeli.

⁷Mutsie okhukamba nimuboola mbu ‘Obwami bwomwikulu buli ahembi okhwitsa!’

⁸Muhonie abalwaye, musimukusie abafu, musiiye abachele, nimuhinia ebisieno. Muheywe butswa sila omurungo, nenywe muhane butswa sila omurungo.

⁹Murabukule etsahabu kata efetsa kata amapesa mumitata chienywe tawe.

¹⁰Murachinga omutata okwomusumi khuluchendo, kata tsingubo tsibili, kata ebilaro, kata indabusi tawe. Omukholi wemilimo akwanile ahebwe ebia yenya.

¹¹Olwa mwinjila mwitaala likhongo nohomba litututu murune omundu owehan'ne okhumwinjisia, ma mube n'naye okhwola olwa mularulamwo okhutsia.

¹²Olwa mwinjilanga munyumba, mubarebe omulembe abalimwo.

¹³Ne nikaba abandu bomunyumba yimwo bamwinjisia, emilembe chienywe chibe khubo. Nebutswa nibaramwinjisia tawe emilembe chienywe chikalukhe khwinywe.

¹⁴Ne omundu wosi osula okhumwinjisia, nohomba okhuhulila amang'ana kenywe, kho murule munyumba yimwo nohomba mwitaala yilio ma mubungulule olukuukhi okhurula khubilenje bienywe.

¹⁵Siahene mubool'langa, Nyasaye yakhabeele tsimbabasi abandu ba Sodoma nende Gomora okhuyomba abandu bomwitaala yilio, Mwitukhu liokhukhalaka Esiina.

¹⁶“Lole, ise murumanga singa amakondi okhutsia hakari we Ebibwe. Okhwola mube abachesi singa tsinzokha, khandi abahooma singa amakhulwi.

¹⁷Muchetsihe, okhuba abandu bakhamuhile musiina nibamutiaba netsikhoba mutsisinakoki tsiabwe.

¹⁸Balimuhila imbeli wabaruchi nende owabaami khulwanje, bube obukobokheli bwanje khubo nende khubetsimbia tsindi.

¹⁹Nyinga balimufumila nibamuyaala, murakhahende emioyo obwa mwakhakalusia nohomba obwa namuboole tawe, sichila Omwoyo wa Nyasaye yakhamuhe akamwakhaboole inyinga niyol'le.

²⁰Sichila simuli ninywe ababoolanga tawe, habula Omwoyo wa Papa wenywe niye oboolanga mwinywe.

²¹“Abandu balasiemana abamwabo babwe okhwirwa, khandi abasamwana bakhakhole mbwo khubaana babwe; nabaana balenjil'la abebuli babwe nibenya mbu berwe.

²²Abandu bosi balamubihil'lwa khulwe ise. Nebutswa uyo olietinyilisia okhwola khusihesi alahonibwa.

²³Olwa balimukhupia esibi mwitaala elala mwilukhile mulindi. Mubool'langa siahene, mwakhabe nimusili okhumalila emilimo chienywe mumataala ka Isiraeli olwa Omwana wo Mundu alitsa.

²⁴“Omwechi sianyala okhuyomba omwibaali uwe tawe, kata omusumba sianyala okhuyomba omwamiwe tawe.

²⁵Kamuhel'le omwechi okhuba singa omwibaaliwe, ne omusumba abe singa omwamiwe. Nibaba nibalanga omwene nyumba Belisebuli, kho balanga abandu bomunyumba yene yiyi amera amabi okhusila.

²⁶“Kho muraria abandu tawe. Liosi eliafunikhilwa liakhabisulwe ne eliabiswa liakhabuulwe.

²⁷Akamubool'langa musiilima, mukaribule mubulafu ne eliamuhuliiye mumambiswi mulikambe khubandu bosi.

²⁸Muraria yabo aberanga omubili abaranyala okhwira omwoyo tawe, nebutswa murie Nyasaye onyala okhwira omubili nende omwoyo biombi mu Kehena.

²⁹Okhuba onyala okhukula amarol'lesi kabili khulwe lisenti elala; nebutswa kata elala khuko silinyala okhukwa hasi Papa wenywe naramanyakhwo tawe.

³⁰Kata ngali khwinywe, liiswi lienywe liabalwa.

³¹Kho muraria; inywe muli nobukhala okhuyomba amarol'lesi amenji!

³²“Kho siomundu olindeyama imbeli wabandu, nase ndimweyama imbeli wa Papa wanje oli mwikulu.

³³Ne omundu wosi olindeyambakhana imbeli wabandu, nase ndimweyambakhana imbeli wa Papa oli mwikulu.

³⁴“Murakaala ndetsa okhuleera omulembe musibala tawe. Aa! Sindaleera omulembe tawe, nebutswa ndaleera obulwani.

³⁵Ndetsa okhuleera oburambani hakari wabaana nende abasamwana, abakhaana nabanyina, khandi hakari wa bakhasi babasiani nabanyakhusaala.

³⁶Abasuku bomundu na bomunyumba yiye omwene.

³⁷“Oyanzanga samwana kata nyina okhuyomba obwa yanyanzanga ise sakwanile okhuba omulondi wanje tawe; oyanzanga omwanawe omusiani kata omukhaana okhuyomba ise, siakwanile okhuba omulondi wanje tawe.

³⁸Oranyala okhwetukha omusalapa kukwe yanonde inyuma wanje sianyala okhuba omulondi wanje tawe.

³⁹Okhabanga okhunyoola obulamu bubwe, alabukosia; ne okosinjia obulamu bubwe khulwanje alabunyoola.

⁴⁰“Omwinjisianga inywe yanyinjisianga ise, ne ounyinjisianga ise yenjisianga Owaruma ise.

⁴¹Owinjisianga Omurumwa wa Nyasaye sichila Nyasaye niye omurumile alasanga khumukabwa kukwe. Naye owinjisinjia omundu omulunji khulwa mbu nomulunji alanyoola amatani komurumwa.

⁴²Omundu wosi owakhabaha khubalondi banje abatututu yaba kata es'sanda siamaatsi amanyifu kokhunywa konyene, sichila nomulondi wanje, siahene alanyoola amatani.”