Read lunyore MATAYO 11 Bible Online

MATAYO 11 - lunyore bible

MATAYO 11

¹Olwa Yesu yali namal'le okhwibaal'la abechibe likhumi nababili, yarulaho natsia okhwibaala nokhukamba mumataala kabwe.

²Olwa Yohana Omubaputisi yahulila nali mubuhambe akemilimo chia Kristo, yaruma abechi baabe khuye.

³Nibamureeba, “Niwe owitsanga nohomba khulindil'le oundi?”

⁴Yesu nabakalusia nababoolela, “Tsie mubool'le Yohana akamuhulilanga nende kamulolanga,

⁵mbu ababofu balolanga, abalema bachendanga, abachele basiiywanga, abekala amarwi bahulilanga, abafu basimukusibwanga ne ababisandu bakambilwanga Amang'ana Amalahi.

⁶Nabeikhabi yabo abarali nende honzoni.”

⁷Olwa abechi ba Yohana yabo bali mbatsitsanga, Yesu yachiaka okhureba emikanda amang'ana ka Yohana, “Olwa mwatsia khu Yohana musitsiimi mwenyanga okhulola sina? Litundu eliomuyeka kunuyanga?

⁸Ne mwatsia okhulola sina? Omundu owebiikhile tsingubo tsindorotoro? Abandu abebiikhanga tsingubo tsindorotoro babetsanga mutsinyumba tsiabaruchi!

⁹Nebutswa mwatsia okhulola sina? Okhulola omuroobi? Yako kali habwene, nebutswa mwalola omundu oyombele omuroobi.

¹⁰Okhuba Yohana niye owa Amahandiko kal'lomangakhwo, nikaboola mbu: ‘Lola, rumanga omurumwa wanje okhuuranjil'la olikhulombela injila.’

¹¹Siahene mubool'langa, Yohana Omubaputisi ayomba omundu wosi owebulwa musibala mubukhongobwe. Nebutswa uyo oli omutututu mu Bwami bwomwikulu nomukhongo okhuyomba Yohana.

¹²Okhurulana olwa Yohana Omubaputisi yakamba okhwola leelo Obwami bwomwikulu bubukulwanga nende abetsingufu, ne abandu betsingufu babwetsumbanga.

¹³Okhwola khunyinga ya Yohana, abaroobi nende Amalako ka Musa kal'loma khuko Bwami,

¹⁴ne nimuli abahuchil'langa okhukasubila, Yohana niye Elija owokhwitsa khukhwe khwali okhuroobwa.

¹⁵Oli namarwi kokhuhulila, ahulile.

¹⁶“Ne nafwananie lisuba lino khulusina? Bafwananga singa abaana abekhaye musiiro. Omukanda mulala kulanjisianga abasiabwe,

¹⁷nikuboola mbu ‘Khumwembeye tsinyembo tsiebisel'lo ne simusin'ne tawe. Khumwembeye tsinyembo tsiesibeela ne simwekhul'le tawe!’

¹⁸Olwa Yohana yetsa siyalachilanga obusuma khandi siyanywetsanga ewaini tawe, nebutswa abandu baboola ‘Ali nes'sieno.’

¹⁹Olwa Omwana wo Mundu yetsa, nalachilanga nanywa, abandu nibaboola, ‘Lole, omundu omulangu, ma omunywi omulina wa basololi bobusuru nende abetsimbi!’ Obuchesi bwa Nyasaye bumanyibwanga okhuba obulunji nende yabo ababuhuchil'langa.”

²⁰Abandu abali mumataala omwa Yesu yali nakhol'le akamangalimwa amenji sibaali okhurula mutsimbi tsiabwe tawe, kho Yesu yabakondekhela. Ma naboola

²¹“Olitsiboolelwa, Korasini! Olitsiboolelwa Betsisaida! Sichila akamangalimwa akakholwa mwinywe, kalaba nikakhol'lwe mumataala ka Turo nende Sidoni, khane abandu baho bakhabeye nibebikhile amatasi nibepul'le likokhe okhumanyia mbu barul'le mutsimbi.

²²Nebutswa mubool'langa, Nyasaye yakhabeele abandu ba Turo nende Sidoni tsimbabasi okhuyomba inywe khwitukhu liesiina.

²³Nawe Kaperinaumu, wenya okhwechingula okhwola mwikulu? Wakhahangulusibwe hasi okhwola Emakombe! Akamangalimwa akakholwa mwibe kalaba nikakhakholwa mu Sodoma, khane liakhabeyeho okhwola leelo!

²⁴Siahene Nyasaye yakhabeele abandu ba Sodoma tsimbabasi okhuyomba inywe mwitukhu liesiina.”

²⁵Olwene yilwo Yesu yaboola, “Papa Omwami womwikulu nende esibala! Khukhupilanga embwo sichila wabisula amang'ana yaka khubasilu ne wakabisa khubachesi nende abalwenyukhu.

²⁶Yee, Papa nimbwo wenya kekhole.

²⁷“Papa wanje waimba ebindu biosi. Abulaho omanyile Omwana narali Papa, ne abulaho omanyile Papa narali Omwana nende uyo owomwana ayanza okhumubisul'la.

²⁸“Mwitse khwise inywe mwesi abachonyele nabachinjile ebilinga ebisiro, nase ndakhamuhuluusia.

²⁹Mwetukhe likokolo lianje, mweke khwise, sichila ise ndi omuhoma khandi omwechiehi mumwoyo; ne mulanyoola okhuhuluukha mumioyo chienywe.

³⁰Okhuba likokolo lianje nelitoro ne esilinga sianje nesiangu.”