Read lunyore MATAYO 12 Bible Online

MATAYO 12 - lunyore bible

MATAYO 12

¹Olweinyumakhwo Yesu yali nabiranga mumikunda chiobule mwitukhu lie Sabato. Abechi baabe bali neinzala, kho bachiaka okhunoka ebiangala biobule nibalia.

²Olwa Bafarisayi balola yaka, baboola, “Lola, nakomusilo khubechi baabo okhukhola yaka mwitukhu lie Sabato!”

³Yesu nabakalusia “Musili okhusomakhwo aka Daudi yakhola, olwa yali neinzala, omwene halala nende abandu baabe?

⁴Yenjila munyumba ya Nyasaye, ye halala nabandube nibaliakhwo emikati echiahaanwa khu Nyasaye, echiali omusilo khubo okhuliakhwo, nibarali abesaalisi bonyene.

⁵Ne khandi simwasomakhwo mumalako ka Musa mbu mwitukhu lie Sabato abesaalisi bafunaka amalako ke Sabato mu Hekalu, ne nibarabba nesikha tawe?

⁶Nase mubool'langa, khuli ho nomukhongo oyombele Hekalu.

⁷Amahandiko kaboolanga, ‘Nyenyanga tsimbabasi, tawe emisango chietsinyama.’ Mulaba nimumanyile esifune sie yaka, khane simwakhabakhalachila esiina abandu abarali nesikha tawe;

⁸okhuba Omwana wo Mundu niye Omwami we Sabato.”

⁹Yesu yarula mumbeka yimwo natsia niyenjila musinakoki yabwe.

¹⁰Ne lola, yaliho omundu womukhono kukwe kwosi kwali nikwanyela. Abandu bandi nibamureeba mbu: “Nomusilo okhuhonia mwitukhu lie Sabato noho?” Benyanga okhunyoola injila yokhumwinjil'la.

¹¹Yesu nabareeba, “Ali hena omundu khwinywe owakhaba nelikondi elala, ma nilikwa mubuko khwitukhu lie Sabato wabula okhulihinia?

¹²Omundu ali nobukhala okhuyomba likondi! Kho niko akachila nobulahi okhukhol'la omundu obulahi khwitukhu lie Sabato.”

¹³Kho yamala abool'le omundu uyo, “Nyiila omukhono kukwo.” Ma nanyiila, nikuhona ma nikuba omuchima singa okundi.

¹⁴Nebutswa Abafarisayi barula, nibalomba omuse obwa nabere Yesu.

¹⁵Olwa Yesu yakamanya yarulayo; ne abandu abenji bamulonda. Yahonia bosi abali abatekhele.

¹⁶Nabakaya mbu baramuribula khubandu bandi tawe.

¹⁷Yakhola mbwo kho aka Nyasaye yali niyaboola okhubir'ra mu Isaya omuroobi kahesibwe:

¹⁸“Uno niye omurumikhili wanje owandeela; owandayanza, owasangal'langa muno. Ndabiikha khuye Omwoyo wanje, Naye alalandia khubetsimbia akobukhalachi bwanje obwe esiina.

¹⁹Salihingana, nohomba salikhupa liyoka; khandi omundu salihulila omwoyo kukwe mumihanda tawe.

²⁰Yakhabe omuhoma khu yabo abarali abetsingufu, khandi yakhabe netsimbabasi khu yabo abarali nobuhuluukhi. Yakhahambachil'le okhwola olwa alileera obwatooto khukhuleka.

²¹Khuliira lilie Abetsimbia balasubilakhwo.”

²²Nilwo olwa abandu bandi baleera khu Yesu omundu omubofu ma owakwa limuma; sichila yali nes'sieno. Yesu yamuhonia, kho omundu tsana nachiaka okhul'loma, nokhuhenga.

²³Abandu bosi bachenya khuka Yesu yali nakhol'le ma nibaboola, “Uyu akhali niye Omwana wa Daudi noho?”

²⁴Olwa Abafarisayi bahulilakhwo, mbaboola: “Omundu uyu ahinianga ebisieno butswa khulwo bunyali bwa Belisebuli omukhongo webisieno.”

²⁵Yesu yamanya aka bali nibapalanga, kho yababool'la, “Siobwami obwabukhana mumikanda nibulwanana obwene khubwene sibwakhatsitsachil'la tawe. Ne sielitaala nohomba sieinyumba eyabukhananga khubwayo siyakhanyala okhusinjila tawe.

²⁶Setani naba nahinianga Setani wayabukhana khububwe; kho obwami bubwe bwakhasinjila mbwena?

²⁷Nimba nimbininjia ebisieno khulwo bunyali bwa Belisebuli, kho abaana benywe babihinianga khulwo bunyali bwa wina? Khulwe yako yabo nibo abakhamukhalachile inywe esiina.

²⁸Ise mbinianga ebisieno khulwa Omwoyo wa Nyasaye akamanyinjia mbu Obwami bwa Nyasaye bwitsile khwinywe.

²⁹“Omundu sianyala okhwinjil'la inyumba yomundu omukufu wayaaka emiandu chichie, nararangile okhuboha omukufu uyo kho wanyala okhuyaaka inyumba yiye tawe.

³⁰“Omundu orali n'nase halala yafukulanga; ne omundu orabunjelesianga n'nase, asalanianga.

³¹Ne mubool'langa mbu, abandu banyala okhulekhelwa tsimbi tsiosi nende amanyeko kosi akabakhaboole khu Nyasaye; nebutswa omundu wosi naba nanyeka Omwoyo Omutsienukhu sialilekhelwa tawe.

³²Ne omundu awakhanyeka Omwana wo Mundu yakhalekhelwe; nebutswa uyo onyekanga Omwoyo Omutsienukhu siyakhalekhelwe luno kata inziayo tawe.

³³“Okhuba nebiamo ebilahi, okhwola mube nomusaala omulahi; nimuba nomusaala omubi nimunyoola ebiamo ebibi. Omusaala kumanyikhanga khubiamo biakwo.

³⁴Inywe abali singa tsinzokha, mwakhanyala mbwena okhul'loma akali amalahi olwa muli ababi? Okhuba omunwa kuboolanga akomwoyo kwetsula n'nako.

³⁵Omundu omulahi mwibiikhilo lilie lilahi ahiniangamwo ebindu ebilahi, ne omundu omubi mwibiikhilo lilie libi ahiniangamwo ebindu ebibi.

³⁶Mubool'langa siahene, Mwitukhu liokhukhalachilwa esiina siomundu yakhakhalachilwe khulwe ling'ana liosi eliabutswa eliaboolanga.

³⁷Amang'ana kako kakharumikhilwe okhukhalachilwa okhuba omulunji, nohomba okhuba nesikha.”

³⁸Kho abandi khubebaali ba Malako nende Abafarisayi bakalusia nibamubool'la, “Omwibaali, khwenya khulole nokholanga akamangalimwa!”

³⁹Naye nabakalusia nababool'la, “Lisuba libi elirasubilanga Nyasaye! Mwenyanga ebilolelo? Ebilolelo ebia mulahebwa nakomuroobi Yona konyene.

⁴⁰Singa obwa Yona yamenya munda mweisutse ingali amatukhu kataru, nende obutukhu butaru; nimbwo Omwana wo Mundu alaba mulutungu lweliloba amatukhu kataru nobutukhu butaru.

⁴¹Mwitukhu liesiina, abandu ba Nineve bakhakhalachile abandu belisuba yili; sichila bali okhurula mutsimbi tsiabwe olwa Yona yabakambila; ne lola, omukhongo oyombele Yona ali hano!

⁴²Omuruchi omukhasi owelubeka lwenandete yakhasinjile musiina halala nende abelisuba yili ne yakhabaleche nesiina; sichila yarula khundulo wesibala niyetsa okhuhul'la obwibaali bwobuchesi bwa Solomoni. Ne mubool'langa omukhongo oyombele Solomoni ali hano.

⁴³“Olwo Omwoyo kwesifwabwi kurulanga mumundu, kubotokhananga khusibala esiomu, nikuruna ha kuhulukhila. Nikubula okhunyoola habundu,

⁴⁴ne kuboola ‘Ndakalukha munyumba yanje eyandarulamwo.’ Olwa kukalukhanga ne kunyoola inyumba neli butswa, yeyelwe, ma ikasiibwe bulahi.

⁴⁵Ma kutsia okhulanga emioyo chindi chine nachitaru echili emibi okhukuyomba ma chiosi nichinjila mumundu uyo njimenya muye. Kho liiba liomundu uyo libetsanga libi okhuyomba olwokhuranga. Yaka niko akaliekhola khwisuba libi yili.”

⁴⁶Yesu yali nasil'loma khubandu, olwa nyinawe nende abaana babwe boola. Basinjila esioba, nibenya okhul'loma n'naye.

⁴⁷Omundu mulala namubool'la, “Mama uwo nende abaana benywe basinjiye esioba, benyanga bal'lome n'nawe.[6]”

⁴⁸Yesu namukalusia, “Mama wanje niwina? Ne abaana befwe, nibena?”

⁴⁹Ma khe nasonia omukhono kukwe khubechi baabe naboola, “Yaba nibo mama wanje nende abaana befwe!

⁵⁰Omundu oba nakholanga obulalilo bwa Papa wanje oli mwikulu, uyo niye omwana wefwe, nende mbotswa nende mama wanje.”