Read lunyore MATAYO 13 Bible Online

MATAYO 13 - lunyore bible

MATAYO 13

¹Mwitukhu liene yilio Yesu yarula munyumba, natsia niyekhala khuluchinga lweinyanza nachiaka okhwibaala.

²Omukanda okwebunjikha khuye kwali omukhongo okhusila. Kho yamala naniina muliaro niyekhalamwo olwa omukanda kwosi kwasinjila khuluchinga lweinyanza.

³Yabebaal'la ebindu ebinji mutsingano. “Omumitsi yatsia okhumitsa imwo.

⁴Olwa yali namitsanga imwo mumukunda, ndala yakwa khunjila, ne amanyonyi niketsa nikachibootsa.

⁵Eyindi yakwa khulwanda, ha maloba karali amenji. Imwo tsana nemela bwangu sichila liloba silialiho elinji tawe.

⁶Nebutswa olwom'basu kwabala, neniala, ne sichila yabula aheyila emisi, yamala niyoma.

⁷Imwo yindi yakwa mubitsakha biamahwa; ne amahwa nikakhula nikachimiina.

⁸Nebutswa eyindi yakwa mumaloba amalahi, niyaama ebiamo; ndala emia, eyindi amakhumi kasasaba, ne eyindi amakhumi kataru.”

⁹Ma nababool'la “Oli namarwi akokhuhulila ahulile.”

¹⁰Abechi baabe betsa, nibamureeba, “Busina oboolanga mutsingano nabandu?”

¹¹Nabakalusia nababool'la, “Inywe mwahebwa okhumanya amabiso kobwami bwomwikulu, nebutswa bo sibahebwa tawe.

¹²Okhuba omundu oli nesindu alahebwa, kho mbu alasilaana n'nabio; nebutswa orali nesindu alahiinibwa khwo kata esiali n'nasio.

¹³Esichilanga nirumikhila tsingano okhul'loma khubo sili mbu: bahenganga, ne sibalolanga tawe, bahuyianga ne sibahulilanga kata okhumanyilisia tawe.

¹⁴Kho kekhole obwa Isaya yarooba naboola: mbu ‘Siahene mulahenga, ne simulalola; siahene mulahulila, ne simulamanyilisia.

¹⁵Sichila amakani kabandu yaba kasitoha, ne basiba amarwi kabwe nibamwasia tsimoni tsiabwe. Khase bakhalola netsimoni tsiabwe, nibahulila namarwi kabwe, nibamanyilisia namakani kabwe, ma nibarula mutsimbi, mbu mbahonie.’

¹⁶“Nenywe, mako obwa muli abanakhabi, sichila tsimoni tsienywe tsilolanga; ne amarwi kenywe kahulilanga.

¹⁷Siahene mubool'langa, abaroobi abenji nende abalunji abenji, bali okhwekomba balole akamulolanga ne sibalola tawe; nokhuhulila akamuhul'langa, ne sibakahulila tawe.

¹⁸“Kho hulile olukano lwomumitsi ma mumanyilisie akaluboolanga.

¹⁹Yabo abahulilanga amang'ana kobwami, nibarakamanyilisia tawe, bali singa imwo eyakwa khunjila. Omwibi yetsa nabukula ling'ana elimiitsilwe mumioyo chiabwe.

²⁰Imwo eyakwa khulwanda, ni yabo abahulilanga amang'ana kobwami, nibakahuchil'la nobusangali bwangu.

²¹Nebutswa sibeyinikhile muko tawe; ne sibatsilil'la muko oluhono tawe; ne olwa om'booko nohomba okhukhupibwa esibi khubuukhanga khulwe ling'ana, ne bwangu nibalekha obusubili bwabwe.

²²Ne nayo eyakwa mumahwa ni yabo abahulilanga amang'ana; ne okhuhendela khwobulamu bwesibala, nokhuyanza obuhinda bwesibala, biminanga ling'ana, ma sibaama ebiamo tawe.

²³Imwo eyakwa mumaloba amalahi ni yabo abahulilanga ling'ana nibamanyilisia, baamanga ebiamo, abalala emia ne abandi amakhumi kasasaba ne abandi amakhumi kataru.”

²⁴Yesu yabakhupila olukano lundi: mbu, “Obwami bwomwikulu bufwanana nende omundu owamiitsa imwo indahi mumukunda kukwe.

²⁵Ne nyinga abandu bosi bali nibakonanga omusuku uwe yetsa namiitsa libanze mubule ma natsia ouwe.

²⁶Nebutswa nyinga yamela omuboka niyaama ebiamo, nilwo olwelibanze lialolekha.

²⁷Ne abarumikhili bomundu tsana, betsa nibamubool'la, ‘Omwami, siwali okhumiitsa imwo indahi mumukunda kukwo? Kho libanze lino liarula hena?’

²⁸Naye nababool'la, ‘Omundu omusuku niye owakhola yaka.’ Ne nabo nibamureeba, ‘Wenya khutsie okhuliha?’

²⁹Naye nakaya ‘Tawe, khase olwa muba nimwihanga libanze mwakheha obule halala n'nalio.

³⁰Lekhe bikhule biosi halala okhwola mwichesa. Ne munyinga yokhuchesa ndibool'la abokhuchesa, range okhubunjelesia libanze mbelio, mulibohe tsikhanya tsisambwe, ma murele obule musiachi sianje.’ ”

³¹Yesu nabakhupila olukano lundi, naboola, “Obwami bwomwikulu bufwanana nolukutsa lwelisatsi olwomundu yabukula, naraaka mumukunda kukwe.

³²Nalwo nolutititi okhuyomba tsimbila tsindi tsiosi etsiobukutsa, nebutswa nyinga lubetsanga nilukhul'le, nolukali okhuyomba emimela chiosi, kukwitsanga omusaala, kata amanyonyi kokhwikulu ketsa mutsisaka tsiakwo nikalombamwo ebitsu biako.”

³³Yesu yabakhupila olukano lundi, “Obwami bwomwikulu bufwanana namamela akomukhasi yabukula, nakatsokania mubusie obuhela etsiliita amakhumi kane, bwosi mbuluha mbusuchila amamela.”

³⁴Yesu yarumikhila tsingano okhubool'la emikanda amang'ana yaka kosi. Siyababool'la ling'ana liosi nararumikhiye olukano tawe.

³⁵Yakhola yaka mbu akomuroobi yaboola kahesikhe: “Ndakharumikhile tsingano olwa ndil'loma khubo Ndiribula akebisa okhurula olwesibala sialiombwa.”

³⁶Olwa Yesu yali niyabukhan'ne nemikanda, ma niyenjiye munyumba, abechi baabe betsa khuye, nibaboola, “Khubool'le esifune siolukano lwelibanze liomumukunda.”

³⁷Naye nabakalusia nababool'la, “Omiitsanga imwo no Mwana wo Mundu.

³⁸Omukunda nesibala; ne imwo indahi nabaana bobwami, ne libanze nabaana bomubi;

³⁹ne omusuku owaraaka libanze ni Setani. Lichesa nesihesi siesibala; ne yabo abokhuchesa nabamalaika.

⁴⁰Kho singa obwelibanze libunjelesibwanga nilisambwa mumulilo, nimbwo kakhabe musihesi siesibala.

⁴¹Omwana wo Mundu yakharume abamalaika baabe okhubunjelesia nokhuhinia mu Bwami bubwe biosi ebichilanga abandu nibakhola tsimbi nende bosi abakholanga obubi,

⁴²ne bakhafubwe mubuhi bwomulilo; aha bakhalakaye nibakhwayula ameno.

⁴³Nilwo olwa abalunji bakhaakhe singa eliuba mu Bwami bwa Papa wabwe. Nimuba nimuli namarwi kho muhulile yaka!

⁴⁴“Obwami bwomwikulu bufwanana nelibere eliomundu yanyoola niliabiswa mumukunda. Ma nalifunikhila; Mukhusangala khukhwe yatsia nahoonia ebia yali n'nabio, ma nakula omukunda tsana.

⁴⁵“Khandi Obwami bwomwikulu bufwanana nende omundu omukholi wobukhala orunanga tsinyuma tsindahi;

⁴⁶ne nyinga anyoola ndala eyobukusi obutinyu, ne natsia nahoonia ebia yali n'nabio biosi, nachikula.

⁴⁷“Khandi Obwami bwomwikulu bufwanana nende likoko, eliabalubi bafuuba munyanza, ndibunjelesia tsimbila tsiosi tsietsisutse.

⁴⁸Olwe likoko lietsula, bali okhulikhwesa okhulilera khuluchinga; nibekhala nibabunjelesia tsindahi mubimwelo biabwe, nebutswa tsimbi nibafuuba.

⁴⁹Nimbwo kakhabe musihesi siesibala: abamalaika bakhetse, bakhaule abandu ababi okhurula mubalunji,

⁵⁰balibafuuba mubuhi bwomulilo; aha bakhalakaye nibakhwayula ameno.

⁵¹“Mumanyilisisie amang'ana yaka kosi?” Yesu yabareba. Nabo nibamukalusia nibaboola “Yee.”

⁵²Kho naye nakalusia, “Yaka niko akachila siomwibaali wa Malako owechesibwa amang'ana ko Bwami bwomwikulu, afwanana nende omwenenyumba ohinianga mumabiikhilo kaake ebindu ebiyia nende ebikhulu.”

⁵³Olwa Yesu yali namal'le tsingano yitsi, yarula habwene yaho,

⁵⁴nakalukha musibala siabwe. Yebaala musinakoki yabwe, ne yabo abamuhulila bachenya. Ma nibaboola, “Uyu yanyoola hena amachesi kano, nende akamangalimwa yaka?

⁵⁵Uyu siali omwana womubaatsi? Nyinamwana sialangwanga Mariamu? Abasiani babwe sibalangwanga Yakobo, Yosefu, Simoni, nende Yuda?

⁵⁶Ne ababotsonyene sibali halala n'nefwe bosi? Kho yatola hena yaka kosi?”

⁵⁷Nibesiraala khuye. Yesu nababool'la, “Omuroobi siabulanga oluyali tawe, habula musibala siabwe siene, nende munyumba yiye yene.”

⁵⁸Ne siyakhola emilimo chiobunyali eminji habwene yaho tawe sichila bali okhubula obusubili.