Read lunyore MATAYO 14 Bible Online

MATAYO 14 - lunyore bible

MATAYO 14

¹Munyinga yiyio Herode Omuruchi wa Galilaya yahulila oluyali lwa Yesu.

²Nabool'la Abarumikhili baabe mbu “Uno niye Yohana Omubaputisi osimukukhile okhurula mubafu niko akachila ali nobunyali yibu okhukhola akokhuchenya.”

³Okhuba Herode yali niyamufumila Yohana niyamura mubuhambe khulwa Herodia, omukhasi wa Filipu omwana wabwe.

⁴Yohana yali niyamubool'la mbu, “Nomusilo ibe okhumutesia.”

⁵Nyinga Herode yenya okhumwira, yaria omukanda kwabandu sichila bahuchil'la mbu Yohana nomuroobi.

⁶Nebutswa olwe litukhu liokhwitsul'la okhwibulwa khwa Herode liola, omukhaana wa Herodia yasalama imbeli wabacheni, nayanzisia Herode.

⁷Nikachila namusubisia nende okhwesuuha okhumuha esindu siosi esiayakhamusaba.

⁸Naye namal'le okhwibaal'lwa nanyina yasaba, “Mbelesia omurwe kwa Yohana Omubaputisi khulutabo luno.”

⁹Omwami Herode yabelela; nebutswa khulwe esiesuho sisie esiayesuha imbeli wa bacheni baabe, yalaka ahebwe.

¹⁰Ma naruma omundu okhuremaka omurwe kwa Yohana mubuhambe.

¹¹Ne omurwe kukwe ngulerwa khulutabo, nguhebwa omukhaana tsana, naye nahil'la nyina.

¹²Ne abechi baabe nibatsia, nibabukula omufu nibamuyabila; ma nibatsia nibabool'la Yesu.

¹³Olwa Yesu yahulila amang'ana ka Yohana yarula yo naniina muliaro, natsia habundu hes'soma yenyene. Abandu bakahulila, ma nibarula mumataala kabwe nibamulonda khubilenje.

¹⁴Yesu yarula muliaro ne olwa yalola omukanda omukhongo, yakubelel'la, nahonia abalwaye babwe.

¹⁵Ne olwa kwola mukolooba, abechi betsa khuye, nibamubool'la, “Inyinga yibir're ne hano nimusitsiimi. Sebula abandu, batsie mumataala, bekul'le ebiokhulia abene.”

¹⁶Nebutswa Yesu yababool'la, “Sikahel'le batsie tawe. Inywe abene mubahe ebiokhulia.”

¹⁷Nibamubool'la, “Sikhuli nesindu hano nebutswa emihayila chirano chionyene nende tsisutse tsibili.”

¹⁸Nababool'la, “Munder're hano.”

¹⁹Nalaka emikanda chikhale musikuri; nabukula emihayila chirano yichio, nende tsisutse tsibili, nahenga mwikulu nabisaayila ikhabi. Yamekania emihayila, nahelesia abechibe, ne abechi nibahelesia emikanda.

²⁰Abandu bosi balia, nibekura. Ma abechi nibatobelesia ebitonye biosi ebiasikala, nibetsusia ebimwelo likhumi na bibili.

²¹Abali okhulia bali abasatsa singa etsielefu tsirano, abakhasi nende abaana mbarabbal'lwe.

²²Ma yayunjia abechi baabe baniine muliaro, bamurangil'le okhutsia oluchelekha lundi, omwene nasisebula emikanda.

²³Nyinga yamala okhusebula emikanda, yaniina musikulu yenyene okhusaaya. Olwa kwola mukolooba yali nali yenyene.

²⁴Ne munyinga yene yiyo eliaro liali ndili munyanza hakari, ne amarunda nikalinuyanga sichila omuyeka kwali okhwakana n'nalio.

²⁵Butukhu, obukwe nibusebanga, Yesu yatsia owa abechi bali nachendanga khumaatsi.

²⁶Nyinga abechi bamulola nachendanga khunyanza, barimukhwa ikholo, nibaboola nesinasukhila, nibakhupa etsikhwisi khulwo oburi.

²⁷Ne habwene yaho Yesu nababool'la “Muleme emioyo, okhuba nise; Muraria tawe.”

²⁸Petero namukalusia, naboola, “Mwami, noba noli niwe, undake nzitse aholi ninjenda khumaatsi.”

²⁹Yesu naboola “Yitsa.” Ne Petero niyekha muliaro, nachenda khumaatsi, natsia khu Yesu.

³⁰Nebutswa nyinga yalola omuyeka omwinji yaria; nachiaka okhweyinikha mumaatsi. Nakhupa etsikhwisi, naboola, “Omwami, mbonia.”

³¹Bwangu Yesu nanyiila omukhono namutila, namubool'la, “Ibe owobusubili obutututu, nisina esichil'le notsoka honzoni?”

³²Ne olwa baniina muliaro omuyeka kwalenjela.

³³Nabo abali muliaro bamusikamila, nibaboola, “Siahene ibe niwe Omwana wa Nyasaye.”

³⁴Bambukha inyanza niboola musibala sia Genasareti.

³⁵Abandu ba habwene yaho olwa bamumanya, barumania mumbeka yitsio tsiosi, nibamuler'ra bosi abali mbali abalwaye.

³⁶Bamuhomba mbu ahuchiilil'le yabo abali mbalwala batile butswa khulusiche lweingubo yiye; ne bosi abatila khwo bahonibwa.