Read lunyore MATAYO 15 Bible Online

MATAYO 15 - lunyore bible

MATAYO 15

¹Kho Abafarisayi nende abebaali ba Malako barula Yerusalemu nibetsa khu Yesu nibamureeba,

²“Khulwa sina abechi babo sibalondanga amebaalo ka abakhulundu balekha ho okhurula khubakuka befwe? Sibesaabanga amakhono kabwe obwa kakwanile mbasili okhulia tawe.”

³Yesu nabakalusia, nababool'la, “Busina nenywe mwononianga lilako lia Nyasaye nimulonda obwibaali bwemiima chienywe?

⁴Okhuba Nyasaye yaboola, ‘Ohelesie Papawo nende mamawo oluyali.’ Khandi, ‘Uyo onyekanga samwana nende nyina, okhwola yerwe.’

⁵Ne inywe mwibaalanga mbu omundu niyakhaba nesindu esiayakhakhonyele samwana nende nyina nebutswa naboola, ‘Esiandali n'nasio, mbaan'ne khu Nyasaye,’

⁶siatakhanga okhuhelesia samwana na nyina oluyali tawe. Munjila yiyo musasianga ling'ana lia Nyasaye khulwe esiimo sienywe.

⁷Inywe abakalama, Isaya yali habwene olwa yarooba khwinywe naboola:

⁸‘Abandu yaba bangohanga neminwa chiabwe, nebutswa emioyo chiabwe chili ehale khwise.

⁹Okhundekayakaya khwabwe nokhwabutswa, sichila bebaalanga amalako kabandu ol'la namalako kanje!’ ”

¹⁰Yesu yalanga omukanda kwitse khuye, nababool'la, “Muhul'le, nimumanyilisie!

¹¹Sisili esinjilanga mumunwa kwomundu nisio esibiyinjia omundu tawe; nebutswa esirulanga mumunwa nisio esiononianga omundu.”

¹²Kho abechi baabe nibatsia khuye nibamureeba, “Umanyile Abafarisayi besiral'le olwa bahuliye ling'ana yilio?”

¹³Nebutswa yakalusia nababool'la, “Buli esirakwa esia Papa wanje womwikulu araraka, siakhehwe.

¹⁴Murabbahendela tawe! Bo nababofu abemel'langa ababofu bandi, ne omubofu naba niyemel'la omubofu undi bombi babili balakwa mubuko.”

¹⁵Petero nakalusia namubool'la, “Khwibaal'le esifune siolukano yilu luboolanga.”

¹⁶Nakalusia nababool'la, “Nenywe khandi musili okhumanyilisia?

¹⁷Siesindu siosi esinjila mumunwa sibiranga nisitsia munda, ma sihiinibwa esioba.

¹⁸Nebutswa ebindu ebirulanga mumunwa birulanga mumwoyo; ne nibio ebiononianga omundu.

¹⁹Ebirulanga mumwoyo namakani amabi, obwiri, obuhehi, obusambale, obwibi, obukobokheli bwobubehi, amanyeko.

²⁰Yibio nibio ebiononianga omundu. Nebutswa okhulia mamisu sibiononianga omundu tawe.”

²¹Yesu yarulaho natsia mutsingongo tsia Turo nende Sidoni.

²²Ne lola, omukhasi Omukanaani niyetsa narula mumbeka tsana, nahanzukha naboola “Omwami, Omwana wa Daudi, umbeele tsimbabasi; omukhaana wanje ali nes'sieno ne ali muliiba libi.”

²³Nebutswa Yesu siyamukalusia ling'ana tawe. Ne abechi baabe batsia khuye nibamuhomba nibaboola, “Mukaye atsie; sichila akhulondanga nahanzukha.”

²⁴Yesu nakalusia nababool'la, “Ndarumwa butswa khumakondi akakora, abali abaana ba Isiraeli.”

²⁵Nebutswa omukhasi niyetsa namusikamila naboola, “Omwami, ukhonye.”

²⁶Namukalusia naboola, “Sibuli bulahi okhubukula ebiokhulia biabaana okhufuubila tsimbwa tawe.”

²⁷Nebutswa naye namubool'la, “Yako kali habwene, Omwami: kata tsimbwa tsiliitsanga ebitonye ebikwitsanga okhurula khumesa yomwami watsio.”

²⁸Kho Yesu nakalusia namubool'la, “Omukhasi obusubili bubwo nobukali, kabe khuibe obwa wenyele.” Nomukhaana uwe nahonibwa kukhwo.

²⁹Yesu narula yo, niyoola khundulo weinyanza ya Galilaya; naniina musikulu, niyekhalayo.

³⁰Emikanda emikali nichiitsa khuye, nibaleera abatiecheli, nababofu nende abakwa amamuma, nende abalema nende abalwaye abandi abenji, nibabara habilenje bibie; naye nabahonia.

³¹Kata omukanda kwachenya, olwa balola abakwa amamuma bal'lomanga, ne abalema bali abachima ne abatiecheli bachendanga ne ababofu balolanga, ma nibafumia Nyasaye wa Isiraeli.

³²Yesu yalanga abechi baabe betse khuye, nababool'la; “Mbeleleye omukanda, sichila leelo nelitukhu elia khataru nibamenyele n'nase mbarali nebiokhulia. Ne sinzenya okhubaseebula nibali neinzala tawe, khase bakharemela khunjila.”

³³Ne abechi nibamubool'la, “Khwakhatoola hena musitsiimi muno ebiokhulia ebihela okhuliisia omukanda omukali singa yiku?”

³⁴Yesu nabareeba, “Muli ne mihayila chianga?” Nibaboola, “Chine nachitaru nende orusutse oruhel'le.”

³⁵Yesu nalaka omukanda kwikhale hasi.

³⁶Nabukula emihayila tsana chine nachitaru nende orusutse; naboola embwo khu Nyasaye namekania, naha abechi baabe, ne abechi nibaha emikanda.

³⁷Bosi balia nibekura. Abechi nibatol'lesia ebitonye ebiasikala, ebitinyilo bine nabitaru mbitsuuye.

³⁸Nabo abalia bahela abasaatsa etsielefu tsine, abakhasi nende abaana mbarabbal'lwe.

³⁹Ma Yesu nasebula emikanda, naniina muliaro niyola mutsingongo tsia Magadani.