Read lunyore MATAYO 16 Bible Online

MATAYO 16 - lunyore bible

MATAYO 16

¹Khandi Abafarisayi nende Abasadukayi betsa nibamutema nibamusaba abamanyie esilolelo esirula mwikulu.

²Naye nabakalusia, nababool'la mbu “Nyinga kuli mukolooba, muboolanga ‘Nakube omuheso; sichila likulu liakhanyile.’

³Ne nyinga kuli mukamba, muboolanga, ‘Leelo nebe ikhumaatsi sichila likulu limwamile.’ Mwamanya okhumanyilisia okhufwana khwelikulu nebutswa simunyala okhumanyilisia ebilolelo bietsinyinga tsino.

⁴Lisuba libi elirasubila Nyasaye lirunanga esilolelo; ne siliakhahebwa khwo esilolelo siosi, nisirali esilolelo sia Yona tawe.” Ma narula ho natsia.

⁵Nyinga abechi bambukha niboola oluchelekha lundi lweinyanza, bali nibebiliye okhuhilana emikati.

⁶Yesu nababool'la, “Mwelinde khumamela ka Abafarisayi nende Abasadukayi.”

⁷Nibachiaka okhuchelania amang'ana nibaboola; “Aboolanga yako sichila sikhuchingile khwo emikati tawe.”

⁸Yesu yamanya amakani kabwe, nababool'la, “Inywe abobusubili obutu muchelanga amang'ana busina? Sichila mubula ebiokhulia?

⁹Musili okhumanya, nohomba simwitsul'langa emihayila chirano echia bandu etsielefu tsirano, khandi ne ebitinyilo bianga ebia mwatol'lesia?

¹⁰Nohomba emihayila chine nachitaru echia abandu etsielefu tsine? Nebitinyilo bianga ebiamwatol'lesia?

¹¹Kali mbwena nimuramanya simboyenge ling'ana liobusuma? Nebutswa muchetsihe khumamela ka Abafarisayi nende Abasadukayi!”

¹²Kho bamanya mbu Yesu siyababool'langa bachetsihe khumamela akebiokhulia, habula khubwibaali bwa Abafarisayi nende Abasadukayi.

¹³Olwa Yesu yatsia mutsimbeka tsia Kaisaria Filipi, yareeba abechi baabe, mbu “Abandu baboolanga Omwana wo Mundu niye wina?”

¹⁴Nibaboola “Abalala baboolanga, Yohana Omubaputisi, abandi, Elija; nabandi, Yeremia, nohomba mulala khu baroobi.”

¹⁵Nabareeba “Nenywe muboolanga nise wina?”

¹⁶Simoni Petero nakalusia naboola, “Ibe niwe Kristo[7], Omwana wa Nyasaye oli mwoyo.”

¹⁷Yesu nakalusia namubool'la “Oli owe ikhabi, Simoni omwana wa Yona. Omundu siali niye okhubisuliiye akatooto yaka tawe, nebutswa ni Papa wanje oli mwikulu.

¹⁸Khandi nase khubool'langa kowe, ibe niwe Petero, ne khulwanda yilu ndiombokha khwo likanisa lianje; ne kata obunyali bwolufu sibulikhuleka tawe.

¹⁹Neakhuhe ebifungo biobwami bwomwikulu; ne ling'ana elioba nosula khusibala khuno Nyasaye alalisula; ne ling'ana elioba nohuchil'la khusibala Nyasaye alalihuchil'la.”

²⁰Ma nakaya abechi baabe barabool'la khwo omundu wosi mbu niye Kristo tawe.

²¹Okhurulana olwene yilwo Yesu yachiaka okhumanyia abechi baabe, naboola: “Kambel'le okhutsia Yerusalemu, nokhusalila okhwinji okhurula khubakhulundu, abesaalisi abakhongo nende abebaali ba Malako nokhwirwa, ne mwitukhu liakhataru okhusimukusibwa.”

²²Yaho Petero nahila Yesu sibeka nachiaka okhumukondekhela, naboola, “Nyasaye akhusinge khusindu ol'la yisio Omwami. Yaka karakhanyala okhwekhola khuibe tawe.”

²³Yesu nasukhana, nabool'la Petero, “Rula imbeli wanje, Setani: oli esiesirasio khu ise, sichila amapaalo kako yaka sikarulanga khu Nyasaye, nebutswa karulanga khubandu.”

²⁴Kho Yesu nabool'la abechi baabe, “Omundu wosi naba niyenya okhunonda, yekaye omwene yetukhe omusalapa kukwe, ma yanonde.

²⁵Okhuba omundu oba niyenyanga okhuhonia obulamu bubwe niye olibukosia; ne omundu naba nakosia obulamu bubwe khulwanje niye olibunyoola.

²⁶Okhuba ni bukhala sina, omundu naba nanyoola esibala siosi, ne nakosia obulamu bubwe? Nohomba omundu yakhahinia sina okhusilaania nobulamu bubwe?

²⁷Okhuba Omwana wo Mundu aliitsa mubukhongo bwa Samwana halala nende abamalaika baabe. Olwene yilwo yakhakabile siomundu okhuhela nokhukhola khukhwe.

²⁸Siahene mubool'langa, Baliho khubasinjiiye hano bano abarakhafwe kata hati tawe okhwola olwa balimulola Omwana wo Mundu niyetsanga singa Omwami.”