Read lunyore MATAYO 17 Bible Online

MATAYO 17 - lunyore bible

MATAYO 17

¹Inyuma wamatukhu kasasaba Yesu yabukula Petero, Yakobo nende Yohana omwana wabwe sibeka, nabahila khusikulu esirambi.

²Likondo lilie liakalukhanibwa imbeli wabwe. Obweni bwe nibwakha singa eliuba, netsingubotsie nitsilaba singa om'basu.

³Kho abechi bataru yabo nibalola Musa nende Elija nibal'lomanga nende Yesu.

⁴Petero nakalusia, nabool'la Yesu, “Omwami, nobulahi muno okhuba ifwe hano! Noba noyanza ndombokha amahindu kataru; elala libe elilio, ne elala elia Musa, ne elindi elia Elija.”

⁵Olwa yali nasiboola, lola omwoyo kwarula mwilumbesi nguboola “Uyu no mwana wanje owandayanza, ousangasianga muno; mumuhulile.”

⁶Ne olwa abechi bahulila omwoyo tsana, bakwa hasi mafung'ama, sichila, baria okhusila.

⁷Yesu yatsia owa bali nabatila khwo naboola, “Buukhe, murarie tawe.”

⁸Olwa bachingula tsimoni tsiabwe, sibalola omundu wosi tawe, narali Yesu yenyene.

⁹Olwa bali nibekhanga okhurula musikulu, Yesu yabalaka, naboola, “Murabool'la khwo omundu wosi akamulutsi tawe, okhwola olwa Omwana wo Mundu alisimukusibwa okhurula mubafwa.”

¹⁰Ma abechi baabe mbamureeba, “Nisina esichilanga abebaali ba Malako nibaboola khatimba Elija alarange okhwitsa?”

¹¹Nakalusia nababoolela, “Siahene, Elija aliranga okhwitsa, ne yakhakaasie ebindu biosi.

¹²Nebutswa mubool'langa mbu Elija wamala okhwitsa, ne abandu sibamumanya tawe, ne bamukhol'la kosi singa benya. Khandi nimbwo balamusalisia Omwana wo Mundu.”

¹³Kho abechi nibamanyilisia olwene yilwo ababooleyenje aka Yohana Omubaputisi.

¹⁴Nyinga Yesu nende abechibe bali nibakalukhile khumukanda, omundu undi niyetsa khu Yesu namusikamila, ma naboola,

¹⁵“Omwami, beela omwana wanje tsimbabasi! Ali ne indulume ne asalilanga bululu; hali khasotso akwitsanga mumul'lo, nohomba mumatsi.

¹⁶Ndamuleera khubechi babo ne nabo sibanyala okhumuhonia.”

¹⁷Yesu nakalusia naboola “Inywe lisuba elirali nobusubili eliasiama, ndiba halala n'nenywe okhwola lina? Mumunderele.”

¹⁸Yesu nakondekhela es'sieno ne nasio nisirula muye, ne omuyaaye uyo nahonibwa kukhwo.

¹⁹Kho abechi nibatsia khu Yesu sibeka nibamureeba, “Busina ifwe khwakhumbuywe okhuhinia es'sieno?”

²⁰Nababool'la, “Kali sichila obusubili bwenywe nobutititi. Siahene mubool'langa, nimuba nobusubili obutititi singa olukutsa lwelisatsi, mwakhabool'la esikulu yisi, ‘Simukha hano otsie hala!’ Nasio siakhasimukha. Sililiho ling'ana eliranyalikha khwinywe. [

²¹Nebutswa es'sieno esifwana yisio sisinyala okhurula nikhurali ho okhusaaya nokhuhonga okhulia tawe.]”[8]

²²Olwa bali bosi mbebunjikhile Egalilaya Yesu yababool'la, “Omwana wo Mundu alahanwa mumakhono kabandu;

²³ne nabamwire, ne mwitukhu liakhataru alasimukusibwa.” Kho abechi babelela muno.

²⁴Olwa boola Kaperinaumu, abasololi bobusuru bwe Hekalu batsia khu Petero, nibaboola, “Omwibaali wenywe arunganga obusuru bwe Hekalu?”

²⁵Naboola “Yee,” Ne olwa yenjila munyumba, Yesu, nal'loma khuye mbelio, nareeba, “Simoni, olutsi mbwe? Abaami besibala sino babukulanga omurungo noho obusuru khubaana babwe nohomba khubacheni?”

²⁶Petero namukalusia, “Khubacheni.” Yesu yamubool'la, “Kho abebule sibatakhungwa okhubanzwa tawe.

²⁷Nebutswa, khurabesirasia tawe, otsie khunyanza ma ofuube ingaka m'maatsi, ohinie isuche eranga okhuhambwa khwo, ne olwa wikula omunwa kwayo, nonyoolemwo eshekeli: ochibukule, ohaane khubasololi bobusuru khulwe ise nende khulwe ibe.”