Read lunyore MATAYO 18 Bible Online

MATAYO 18 - lunyore bible

MATAYO 18

¹Khunyinga yene yiyo abechi batsia khu Yesu nibaboola, “Niwina oli omukhongo mu Bwami bwomwikulu?”

²Nalanga omwana omutu, namwikhasia hakari mubo naboola mbu.

³“Siahene mubool'langa, Nimuba nimurasukhana mwaba singa abaana batu, simwakhenjile mu Bwami bwomwikulu kata hati.

⁴Omundu oba niyechiehia naba singa omwana mutu uyu, niye oli omukhongo mu Bwami bwomwikulu.

⁵Omundu oba niyenjisia omwana mulala singa mbu muliira lianje nise owaba niyenjisisie.

⁶“Omundu wosi naba niyesirasia mulala khu batu yaba abasubilanga khwise okhukhola tsimbi, akwana okhubohwa oluchina lwarekoreko mwikosi lilie alumbwa mulutungu lweinyanza.

⁷Balitsiboolelwa abomusibala khulwo okhwesirasia! Okhuba ebiesirasio sibilibula okhwitsa; nebutswa alitsiboolelwa omundu tsana oleranga ebiesirasio!

⁸“Omukhono kukwo nohomba esilenje sisio nisiba nisikhwemel'la okhukhola tsimbi osikhalache, osifuube ehale. Nobulahi khuibe okhwinjila mubulamu niwalema omukhono nohomba esilenje okhuyomba okhuba nemikhono chibili nohomba nebilenje bibili ma ofuubwe mumul'lo okurasimanga.

⁹Kata imoni yiyo neba nekhwemel'la okhukhola tsimbi ochitsomole, ochifuube ehale. Nobulahi okhwinjila mubulamu noli ne imoni ndala, okhuyomba okhuba netsimoni tsibili ma ofubwe mumul'lo kwe Kehena.

¹⁰“Henge murachaaya mulala khu batu yaba, okhuba mubool'langa, Abamalaika babwe sibachweyanga okhuhenga mumoni mwa Papa wanje oli mwikulu tawe. [

¹¹Okhuba Omwana wo Mundu yetsa okhuhonia esiali nisiakora.][9]

¹²Mukanakana mbwena? Omundu niyakhaba namakondi emia, elala khuko ndikora sialekha amakhumi karano nakane, nakarano nakane, atsie mubikulu, arune elikor're?

¹³Naba nalinyoola, mubool'langa tooto mbu alisangal'langa okhusila okhuyomba akandi amakhumi karano nakane na karano nakane akaali ngarakor're.

¹⁴Kata nimbwo, Papa wenywe oli mwikulu, siyenyanga mulala khu batu yaba akore tawe.

¹⁵“Omwana wenywe naba nakhukhol'la obubi tsia omubool'le esikhasie. Nebutswa okhole mbwo n'naye mwenyene. Naba nakhuhulila, khe uchelesisie omwana wenywe.

¹⁶Ne naba narakhuhulila, bukula omundu mulala nohomba babili bandi, otsie n'nabo khuye, kho obukobokheli bwa babili nohomba bataru buralile.

¹⁷Ne naba nasuula okhuhulila yabo obool'le likanisa. Ne naba nasula okhuhulila likanisa; abe khuibe singa omundu orali omusubili noho singa omusololi wobusuru.

¹⁸“Siahene mubool'langa, amang'ana kosi akamulisula khusibala Nyasaye yakhakasule; kosi akamulihuchil'la musibala Nyasaye yakhakahuchil'le.

¹⁹“Khandi mubool'langa, Babili khwinywe nimuba nimuhambana khwing'ana liamusaba, Papa wanje oli mwikulu yakhamukholela.

²⁰Okhuba aha babili nohomba bataru bali muliira lianje, ndi halala n'nabo.”

²¹Ma Petero yatsia khu Yesu, namubool'la, “Omwami, omwana wefwe alakhol'la obubi hali khanga nimulekhelanga? Okhwola hali khane nakhataru?”

²²Yesu namubool'la, “Sikhubool'la omulekhele okhwola khane nakhataru; nebutswa esia amakhumi kane nakataru hali khane nakhataru.

²³Khulwe yako Obwami bwomwikulu bufwanana nomwami mulala owaruna okhubala nende abarumikhili baabe.

²⁴Olwa yachiaka okhubalilisia n'nabo, mulala yaleerwa khuye, owali nelikobi etsitalanta[10] etsielefu likhumi.

²⁵Nebutswa sichila yabula esiokhumurunga, omwami uwe yalaka akusibwe, nende omukhasi, nabaanabe nende ebiayali nali n'nabio biosi, likobi lirungwe.

²⁶Kho omurumikhili watsana yakwa hasi namusikamila, naboola, ‘Omwami wesimilisie khwise, ndakhakhurunge biosi.’

²⁷Omwami womurumikhili uyo yamubelel'la, namuboholola namulekhela likobi lilie.

²⁸“Nebutswa omurumikhili tsana yarula natsia, nanyoola mulala khubarumikhili basie, owali nelikobi khuye etsidinari[11] emia ndala; namufumila mwikosi bumika, naboola, ‘Urunge likobi lianje.’

²⁹Kho omurumikhili wasie yakwa hasi namuhomba, naboola, ‘Wesimilisie khwise ndakhakhurunge.’

³⁰Nebutswa siyayanza tawe, natsia namufuba mubuhambe, alaluhe alarunge likobi liosi.

³¹Olwa abarumikhili basie balola akali nikekhol'le, babelela okhusila, nibatsia nibabool'la omwami wabwe kosi akali nikekhol'le.

³²Kho omwami uwe yamulanga okhwitsa khuye, namubool'la, ‘Ibe omurumikhili omubi, ndakhulekheye likobi lilio liosi sichila waimombele.

³³Nawe sikakhakwanile okhubela omurumikhi wasio tsimbabasi?’

³⁴Ma omwami uwe uyo lirima limuhamba, namura mubuhambe, alaluhe alarunge likobi lilie liosi.

³⁵Khandi nimbwo Papa wanje womwikulu alimukholela, nimuba nimuralekhelana simulala no mwana wabwe mumioyo chienywe.”