Read lunyore MATAYO 19 Bible Online

MATAYO 19 - lunyore bible

MATAYO 19

¹Olwa Yesu yali namal'le okhuboola amang'ana yaka, yarula Galilaya, natsia mutsimbeka tsie Ebuyahudi injelekha wa Yorodani.

²Ne emikanda emikhongo chiamulonda, nabahonia yo bosi.

³Abafarisayi betsa khuye nibateema okhumureka nibaboola “Nomusilo omusaatsa okhukhunga omukhasiwe khulwe esifune siosi siosi?”

⁴Yesu nakalusia, “Simwasoma, obwa Omulombi owabalomba abandu mukhuchiaka khwesibala mbu yalomba omusaatsa nomukhasi?

⁵Ma Nyasaye naboola, ‘Kho, khusifune yisio omundu alalekha samwana na nyina, alahambana nomukhasiwe, ne bombi balakwa omubili mulala.’

⁶Ne sibalaba babili khandi tawe, nebutswa omubili mulala. Niko akachila aba Nyasaye yahambania omundu arabukhania tawe.”

⁷Abafarisayi nibamureeba, “Nisina esiachila Musa nahuchil'la omusaatsa okhuhaana ebarwa yokhwabukhana nomukhasiwe?”

⁸Yesu nabakalusia, “Musa yamuhuchil'la okhukhunga abakhasi benywe khulwo obutinyu bwemirwe chienywe. Nebutswa mukhuchiaka khwesibala akene yako sikaliho tawe.

⁹Kho mubool'langa, omundu oba nakhunga omukhasiwe nikarali khusifune siobuheyi, nateesia omukhasi undi, aheyanga. Ne omundu oteesinjia omukhasi owali okhukhungwa aheyanga.”

¹⁰Abechi baabe nibamubool'la, “Amang'ana komusaatsa nende omukhasi nikaba nikali mbwo, khe nobukhala okhubula okhuteesania.”

¹¹Yesu nabakalusia naboola, “Yaka sikali khubandu bosi, nebutswa kali khu yabo aba Nyasaye yahuchil'la.

¹²Okhuba biliho ebifune nalebe ebichilanga abandu nibabula okhuteesia. Balala babulanga okhutesia sichila nabalate okhurula mutsinda tsia banyina, abandi balatwa bulatwa; ne abandi babulanga okhutesia khulwo Bwami bwomwikulu. Onyala okhufumila ling'ana yili alifumile.”

¹³Abandu bandi baleera abaana batititi khu Yesu abare khwo amakhono kaake, ma abasayile, nebutswa abechi baabe nibabakondekhela.

¹⁴Nebutswa Yesu yababool'la, “Lekhe abaana betse khwise, murabekal'la tawe sichila Obwami bwomwikulu nobwa bafwana singa yaba.”

¹⁵Yabarakhwo amakhono kaake, ma narulayo.

¹⁶Litukhu lindi omundu mulala yetsa khu Yesu namureeba, “Omwibaali nisina esilahi esiandakhakhola nduhe nyoole obulamu oburahwa?”

¹⁷Yesu namubool'la, “Ureebanga akeling'ana lilahi busina? Aliho mulala yenyene niye omulahi. Noba noruna okhwinjila mubulamu, fumila amalako.”

¹⁸Namureeba, “Na kali hena?” Yesu namukalusia “Orera, Oraheya, Oreba, Orakobokhela obubehi,

¹⁹Helesia papawo na mamawo oluyali, khandi oyanze owasio singa weyanzanga omwene.”

²⁰Omusiani tsana namubool'la, “Yako kosi ndamala okhuhesia, ning'ana sina elisilema khwise?”

²¹Yesu namubool'la, “Noba noruna okhuba omulunji tsia, okusie ebioli n'nabio biosi ohelesie abatakha, nawe olaba nelibiikhilo mwikulu; ma wiitse, unonde.”

²²Ne nyinga omusiani yahulila ling'ana yilio, yarula ho nabeleye; okhuba yali nali nemiandu eminji.

²³Ma Yesu nabool'la abechi, “Siahene mubool'langa, Buliba obutinyu khumundu omuhinda okhwinjila mu Bwami bwomwikulu.

²⁴Khandi mubool'langa nobutoro ingamia okhubirila mumuluhu kwesindani, okhuyomba omuhinda okhwinjila mu Bwami bwa Nyasaye.”

²⁵Olwa abechi bakahulila, bahuka okhusila, nibaboola, “Kho niwina onyala okhuhonibwa?”

²⁶Yesu yabahenga, nababool'la, “Yaka sikanyalikha khumundu, nebutswa khu Nyasaye amang'ana kosi kanyalikha.”

²⁷Kho Petero yakalusia, namubool'la, “Lola ifwe khwalekha biosi, nikhukhulonda. Kho khulinyoola sina?”

²⁸Yesu nababool'la, siahene mubool'langa inywe abali okhunonda, mutsinyinga tsio Khwibulwa Okhuyia olwa Omwana wo Omundu alikhala khuluruba mubukhongo bubwe, nenywe khandi mulikhala khutsiruba likhumi na tsibili, okhukhalachila tsimbia likhumi natsibili etsia Isiraeli esiina.

²⁹Ne simulala owalekha tsinyumba kata abasiani babwe, nohomba ababotsonyene kata samwana, nohomba nyina, kata abaana nohomba emikunda, khulwanje, alanyoola hali emia khandi alilamilwa obulamu oburahwa.

³⁰Nebutswa abenji abali abeimbeli balaba abeinyuma; ne abeinyuma balaba abeimbeli.