Read lunyore MATAYO 2 Bible Online

MATAYO 2 - lunyore bible

MATAYO 2

¹Yesu yebulwa mwitaala lia Betselehemu ye Buyahudi mumatukhu koburuchi bwomwami Herode. Olwene yilwo abandu abachesi khuketsiyasulwe barula ebukwe nibetsa Yerusalemu,

²nibareeba, “Ali hena uyo omwana owibuywe okhuba omuruchi wa Bayahudi? Khuluutsi eyasulwe yiye ebukwe, ma khwitsile okhumwekayakaya.”

³Ne olwomuruchi Herode yahulila yako, ikholo nemurimukha halala nende bosi abali n'naye mu Yerusalemu.

⁴Yabunjelesia halala abesaalisi abakhongo nende abebaali ba Malako nabareeba, “Masihi anyala okhuba niyebuliywe hena?”

⁵Bamubool'la, “Mwitaala lia Betselehemu ye Buyahudi okhuba kano niko akomuroobi yahandika:

⁶‘Nawe Betselehemu musibala sia Yuda, sioli omutututu mubaruchi ba Yuda tawe; okhuba mwibe alirulamwo omuruchi oliemel'la abandu banje Abaisiraeli.’ ”

⁷Kho Herode nalanga abachesi abamanya aketsiyasulwe masilisi, nabareebelesia kalaha ni nyinga sina olweyasulwe yalolekha.

⁸Yamala nabaruma Betselehemu, nababool'la, “Mutsie muhengelesie nesinani khwing'ana liomwana mutoro; ne nyinga nam'munyoole namwitse okhumbool'la, mbu nase nanzie okhumwekayakaya.”

⁹Nyinga bali mbahuliye akomuruchi, barulaho nibatsilil'la noluchendo lwabwe, ne eyasulwe eya bali nibalutsi ebukwe, yabemel'la neluha nesinjila habundu ho mwana yali nali.

¹⁰Ne olwa balola eyasulwe basangala nokhusangala okhukali.

¹¹Benjila munyumba, ne olwa balola omwana omutoro nende Mariamu nyinawe, basikama hasi nibamwekayakaya nibaboholola amabere kabwe nibamuha ebihanwa bietsahabu nobwali nende manemane.[1]

¹²Ma bakalukha musibala siabwe khunjila yindi, okhuba Nyasaye yali nabachetsihisie mwilooro mbu barakalukhila owa Herode tawe.

¹³Nyinga bali nibamal'le okhutsia, lola Om'malaika wo Mwami yalolekha khu Yosefu mwilooro naboola, “Sinjila obukule omwana na nyina, wilukhe otsie Emisiri. Ne mubeyo okhwola olwa ndikhubool'la, sichila Herode arunanga omwana omutoro amwire.”

¹⁴Yosefu yabuukha nabukula omwana omutoro na nyinamwana mbarula butukhu nibatsia Emisiri.

¹⁵Ne yamenyayo okhwola okhufwa khwa Herode. Yaka kekhola mbu ako Mwami yaboola, okhubir'ra mumuroobi kahesikhe; “Ndali okhulanga omwana wanje okhurula Emisiri.”

¹⁶Khe nyinga Herode yalola obwa yali nabatsilwe nabachesi abarula ebukwe yasinyikha. Yalaka mbu abaana abasiani bosi abali mu Betselehemu, nende mutsimbeka tsiasio tsiosi, abemihika chibili nende abali hasi wemihika yichio berwe singa obwa yali namanyilisisie habwene khubachesi.

¹⁷Akomuroobi Yeremia yali okhuboola kahesikha munjila yiyi, mbu:

¹⁸“Liyoka liahul'likha Rama, Okhulakaya nende tsindekhuulu tsinyinji, Raheli yekhuulanga abaana baabe Ne usuye okhuhotselesibwa, sichila bafwiye.”

¹⁹Herode namal'le okhufwa, Om'malaika wo Mwami yabisukha khu Yosefu mwilooro nali Emisiri,

²⁰namubool'la “Buukha obukule omwana omutoro na nyinamwana, ma okalukhe musibala sia Isiraeli; sichila abali mbarunanga okhwira omwana omutoro baafwa.”

²¹Kho Yosefu yabuukha nabukula omwana omutoro na nyinamwana, m'batsia musibala sia Isiraeli.

²²Nebutswa olwa Yosefu yahul'la Arikelau arukanga Ebuyahudi musilenje sia Herode samwanawe, yali okhuria okhutsiayo. Olwa Nyasaye yali namuchetsihisie mwilooro yamala natsia mumbeka tsia Galilaya.

²³Ma namenya mwitaala elilangwa Nasareti; kho akomuroobi yali niyaboola kahesikhe, mbu: “Alilangwa Omunasareti.”