Read lunyore MATAYO 20 Bible Online

MATAYO 20 - lunyore bible

MATAYO 20

¹“Okhuba Obwami bwomwikulu bufwanana singa omwene nyumba, owasamula mukamba tsuli okhuhandika abalimi batsie mumukunda kukwe kwemisabibu.

²Yahuchilisania nabalimi yabo okhubarunga esilingi ndala khwitukhu, ma yabaruma mumukunda kukwe kwemisabibu.

³Narula etsisaa tsitaru, nalola abandi basinjiye musiiro, nibarakholanga esindu,

⁴khandi nabo nababool'la, ‘Inywe mutsie mumukunda kwemisabibu, ne namuhelesie esimuhel'le habwene.’ Nibatsia.

⁵Khandi yarula etsisaa tsisasaba nende etsisaa tsirano natsine, nakhola singa akene yako.

⁶Khandi nyinga tsiola etsisaa likhumi na ndala yarula natsia, nanyoola abandi basinjiye, nababool'la, ‘Musinjiye hano busina om'basu kwosi sila emilimo?’

⁷Nibamubool'la, ‘Sichila omundu siakhulachile.’ Nababool'la, ‘Inywe nenywe mutsie mumukunda kwanje kwemisabibu.’

⁸“Nyinga bwela mukolooba, omwene mukunda yabool'la omunyapara uwe, ‘Langa abalimi, obarunge omurungo kwabwe, ochiachile khu abeinyuma okhwola khubokhuranga.’

⁹Abandu abasamusibwa etsisaa likhumi na ndala, barungwa simulala esilingi ndala.

¹⁰Ne nyinga abokhuranga betsa, bakaala bakharungwa okhuyomba yaho; nabo nibarungwa esilingi ndala butswa.

¹¹Ne olwa bali nibamal'le okhukabul'lwa bamumuchil'la khu omwene mukunda,

¹²nibamubool'la, ‘Abeinyuma bakhol'le emilimo esaa ndala yonyene nawe ubahelesisie okhuhelana n'nefwe, ne ifwe khwali okhutitikhana khumilimo om'basu mululu.’

¹³Nebutswa omwene mukunda nakalusia mulala khubo, ‘Omulina, sikhukholeye obubi tawe. Ibe omwene wali okhuhuchil'la esilingi ndala khumulimo kwosi okwelitukhu.

¹⁴Bukula eyiyo, otsie. Nyanzile okhuha uyu wokhumal'likha singa mbeye ibe.

¹⁵Sibuli obulahi okhukhola singa kanyanzisianga nebindu bianje omwene? Nohomba ibe ubeye ne imbalikha khulwo mwoyo kwanje okwokhuhaana?’ ”

¹⁶Ma Yesu namalila naboola, “Nimbwo abeinyuma balaba abeimbeli, ne abeimbeli balaba abeinyuma.”

¹⁷Olwa Yesu yali niyanichilanga okhutsia Yerusalemu, yahila abechi baabe likhumi nababili sibeka nibasili khunjila nababool'la,

¹⁸“Lole, khwanichilanga okhutsia Yerusalemu; ne Omwana wo Mundu alarebwa mumakhono kabesaalisi abakhongo nende abebaali ba Malako. Nabo balamukhalachila esiina esiokhwirwa,

¹⁹nibamuhaana mumakhono kabandu betsimbia, abakhamutsekhel'le, nibamutiaba netsikhoba, nokhumubamba khumusalapa: nebutswa litukhu liakhataru alasimukusibwa.”

²⁰Olwene yilwo mukha Sebedayo yetsa khu Yesu nabaana be babili namusikamila namureeba ling'ana elala.

²¹Yesu namureeba, “Wenyanga sina?” Naye namukalusia, “Usubisie mbu abaana banje babili bano nabekhale, mulala khumukhono kukwo omusaatsa ne oundi khumukhono kukwo omukhasi olwa nobe noli Omwami.”

²²Yesu nakalusia abasiani yabo naboola, “Simumanyile elia murebanga tawe. Mwakhanyala okhunywakhwo es'sanda esiokhunyakhana esia nzia okhunywa khwo?” Nibamubool'la, “Khwakhanyala.”

²³Yesu nababool'la, “Siahene mulanywela khwo khu es'sanda sianje; nebutswa okhwikhala khumukhono kwanje omusaatsa, nende khumukhono kwanje omukhasi sikali akanje okhuhaana. Yabo aba Papa wanje yalombela nibo abakharebwe habundu yaho.”

²⁴Olwa abechi bandi likhumi bahulila yaka, basinyikhila abamwabo babili yabo.

²⁵Kho Yesu nabalanga betse aha yali, naboola, “Mwamanya mbu abaami abomutsimbia, bali nobunyali khubo abene, ne abakhongo babwe bamihanga nobunyali.

²⁶Nebutswa sikakhaba singa mbwo khwinywe tawe. Omundu oba niyenyanga okhuba omukhongo mwinywe alaba omurumikhili wenywe;

²⁷naye oba narunanga okhuba owe imbeli alaba omusumba wenywe:

²⁸singa obwa Omwana wo Mundu siyaitsa okhurumikhilwa, nebutswa yetsa okhurumikha, nokhuhaana obulamu bubwe okhununula abandu abenji.”

²⁹Olwa Yesu nabechibe bali nibarulanga Yeriko, omukanda omukhongo kwamulonda.

³⁰Ababofu babili abali nibekhaye khundulo weinjila, bahulila mbu Yesu yali nabiranga, kho nibachiaka okhuhanzukha, “Omwana wa Daudi, okhubeele tsimbabasi!”

³¹Ne omukanda kwabakondekhela, basiling'ane! Nabo bahanzukha okhusila, nibaboola, “Omwana wa Daudi okhubeele tsimbabasi!”

³²Yesu yasinjila, nabalanga. Ma nabareeba, “Mwenya mukhol'le sina?”

³³Bamukalusia, “Omwami, khwenyanga tsimoni tsiefwe tsiikulwe!”

³⁴Yesu yababeleel'la, nabatila khu tsimoni tsiabwe; nonoho, bahenga, nibamulonda.