Read lunyore MATAYO 21 Bible Online

MATAYO 21 - lunyore bible

MATAYO 21

¹Olwa Yesu nende abechibe bali nibool'le ahembi Yerusalemu, boola Betsifage, Khusikulu sia Miseituni. Habwene yaho Yesu yaruma babili khubechi baabe okhwemela,

²nababool'la, “Mutsie mwitaala, injelekha, nonoho namunyoole esikhili nebohelwe, nesimoosi siayo halala. Mutsiboholole, munderele.

³Ne omundu naba namubool'la ling'ana, mumubool'le, ‘Omwami atsienyanga’; ne nonoho alatsilakhula tsiitse.”

⁴Yaka kakholwa mbu amang'ana akomuroobi yaboola kahesikhe mbu:

⁵“Boolela litookho lia Yerusalemu, Lola, Omwami uwo yetsanga khuibe nomuhoma, ne yetsanga nali khu esikhili, nende khusimosi siesikhili.”

⁶Kho abechi batsia, nibakhola aka Yesu yali nabalachile,

⁷nibaleera esikhili, nende esimoosi siayo, nibaala khwo tsingubo tsiabwe, Yesu niyekhala khwo.

⁸Omukanda kwabandu abenji baala tsingubo tsiabwe khunjila ne abandi nibaremaka tsisaka tsiemisaala nibaala khunjila.

⁹Ne emikanda echiamwemel'la, nende echiamulonda, bahanzukha, nibaboola, “Hosana khu Mwana wa Daudi! Nowe ikhabi owitsanga muliira lio Mwami! Nyasaye ahebwe oluyali!”

¹⁰Olwa Yesu yenjila Yerusalemu, abomwitaala bosi bayakukha, nibaboola “Niwina uyo?”

¹¹Ne emikanda nichiboola, “Uyu niye omuroobi, Yesu wa Nasareti elie Galilaya.”

¹²Yesu yenjila mu Hekalu ya Nyasaye, nahinia bosi abali nibakusianga nende okhukula mu Hekalu. Khandi yafung'amia etsimesa etsie yabo abasilanianga amapesa nende tsindebe tsiabakusi bamakhulwi;

¹³nababool'la, “Kahandikwa mbu Nyasaye yaboola: ‘Inyumba yanje elilangwa inyumba yokhusaaya.’ Nebutswa inywe muchikhol'le oluhangaywa lwabanuli!”

¹⁴Ababofu nende abalema beetsa khuye mu Hekalu naye nabahonia.

¹⁵Nebutswa abesaalisi abakhongo nende abebaali ba Malako basinyikha olwa balola amang'ana akokhuchenya aka yakhola, nende abaana nibahanzukhanga mu Hekalu nibaboola, “Hosana khu Mwana wa Daudi!”

¹⁶Kho nibamureeba, “Ohulilanga akababoolanga?” Yesu nabakalusia, “Yee; nenywe musili okhusoma akahandikwa mbu: ‘Okhurula muminwa chiabaana nende echiabanunanga olinyoola okhwitsomia okhuli habwene?’ ”

¹⁷Yesu nabalekha, narula mwitaala natsia Betsania, nakonayo.

¹⁸Ne omukamba okwalondakhwo olwa Yesu yali nakalukhanga mwitookho, yali neinzala.

¹⁹Nalola omukhuyu mulala khunjila sibeka, natsia khukwo, ne siyanyoola khwo esindu habula amasafu konyene. Ma nakubool'la, “Amakhuyu karaama khuibe okhurulana leelo na khasotso tawe.” Kukhwo omukhuyu kwoma.

²⁰Abechi bakulola ma nibachenya nibaboola “Omukhuyu kwomele mbwena kukhwo?”

²¹Yesu yakalusia nababool'la, “Siahene mubool'langa, nimuba nimusuubila, nimurabba na honzoni, mulakhola yaka akakholeye omukhuyu yiku. Ne sikali yaka konyene tawe, nebutswa kata nimuba nimwakhabool'la esikulu yisi, ‘Simukha wefuube munyanza,’ ne kalekhola.

²²Nimuba nimusubila, mulanyoola kosi akamuba nimureba mukhusaaya.”

²³Yesu niyenjiye khandi mu Hekalu. Ne olwa yali niyebaalanga, abesaalisi abakhongo nende abemeli babandu batsia khuye nibamureeba, “Okholanga yaka mubunyali sina? Khandi niwina owakhuha obunyali okhukhola yaka?”

²⁴Yesu yabakalusia naboola, “Nase ndamureeba ling'ana elala, nimungalusia nase ndakhamubool'la obunyali bwakhol'langa mwo yaka.

²⁵Obunyali bwa Yohana bwarula hena? Bwarula khu Nyasaye nohomba bwarula mubandu?” Nibachiaka okhuhingana abene khubene, “Nikhuba nikhuboola, ‘Bwarula khu Nyasaye’ alakhureba, ‘Busina nimurasubila Yohana?’

²⁶Ne nikhuba ni khuboola, ‘Bwarula mubandu,’ khuritsanga emikanda sichila abandu bosi bahuchil'langa mbu Yohana nomuroobi.”

²⁷Kho nibakalusia Yesu, nibamubool'la, “Sikhumanyile tawe.” Naye nababool'la, “Khandi nase simubool'la obunyali bwakhol'langa yaka tawe.

²⁸“Ne mupaalanga mbwena? Yali ho omundu owali nabaana babili. Yatsia khumukhulundu, namubool'la, ‘Omwana, leelo tsia okhole emilimo mumukunda kwemisabibu.’

²⁹Nakalusia namubool'la, ‘Sinzia okhutsia tawe,’ nebutswa olwe inyuma nasukhania amakani natsia.

³⁰Samwana natsia khumusiani we omutu, namubool'la singa mbwo. Naye nakalusia naboola, ‘Ndatsia Omwami’, ne siyatsia tawe.

³¹Niwina khu bombi owakhola obulaliho bwa samwana?” Nibaboola, “Omusiani omukhulundu.” Kho Yesu nababool'la, “Siahene mubool'langa, abasololi bobusuru nende abasambale bamuranjil'langa okhwinjila mu Bwami bwa Nyasaye.

³²Okhuba Yohana yetsa khwinywe namumanyianga injila yobulunji, ne simwamusubila tawe; nebutswa abasololi bobusuru nende abasambale bamusubila. Nenywe, kata nyinga mwalola yaka simwasukhania amakani kenywe olweinyuma, mukhamusubila tawe.”

³³Yesu yaboola, “Hulile olukano lundi: Yaliho omundu omwene mukunda, owasimikha omukunda kwemisabibu, nakusir'ra olukaka, nayabamwo obuko bwokhukhamila mwo tsisabibu, niyombokha inyumba yabalindi, nakulekhela abalimi, natsia musibala sindi esiehale.

³⁴Mumatukhu kelichesa, yaruma abarumikhili khubalimi, atoole ebiamo biakwo.

³⁵Abalimi yabo babukula abarumikhili baabe, mulala nibamukhupaka, ne oundi nibamwira ne oundi nibamulasa namachina.

³⁶Khandi omundu tsana yaruma abarumikhili bandi abenji abayombele abokhuranga; abalimi nibabakhola singa abokhuranga.

³⁷Nebutswa olweinyuma yaruma khubo omwana uwe, naboola, ‘Siahene bakharia omwana wanje.’

³⁸Nebutswa abalimi, nyinga balola omwana, nibabool'lana, ‘Uyu niye owakhalamilwe emiandu, chende khumwire, kho obulame bubwe nabube obwefwe.’

³⁹Nibamufumila, nibamufuuba esioba womukunda kwemisabibu, nibamwira.

⁴⁰“Kho nyinga omwene mukunda yakhetse alibakhol'la sina abalimi yabo?” Yesu nareeba.

⁴¹Bamubool'la, “Alabakhuya pe abandu ababi yabo, nabahelesia abalimi bandi omukunda kwemisabibu, abalimuha ebiamo biakwo mutsinyinga tsiabio.”

⁴²Yesu nababool'la, “Musili okhusomakhwo obwa akahandikwa kaboolanga? ‘Lichina eliabombokhi basuula, eliene yilio likwiye eliobukhonyi obukali khunyumba. Yili liakholwa no Mwami. Mako obwa lili likaasu muno!’

⁴³“Khulwe yako mubool'langa, Obwami bwa Nyasaye bulihinibwa khwinywe, bulihebwa olwibulo lundi, oluliama ebiamo bialwo.” [

⁴⁴Naye owakhakwe khwichina yili alifunikha mubitonye; nebutswa naye owalilikwa khwo liakhamutubule singa olukukhi.][12]

⁴⁵Olwa abesaalisi abakhongo nende Abafarisayi bahulila tsingano tsitsie, bamanya abooyenje khubo.

⁴⁶Nabo olwa benya okhumutiila baria emikanda, sichila chiamuhuchil'la mbu nomuroobi.