Read lunyore MATAYO 22 Bible Online

MATAYO 22 - lunyore bible

MATAYO 22

¹Khandi Yesu yal'loma n'nabo mutsingano naboola mbu,

²“Obwami bwomwikulu bufwanana nomundu omwami, owalombela omwanawe lisabo lies'selelo.

³Yaruma abarumikhili baabe okhulanga abali mbalanjilwe betse mus'selelo: nabo sibayenya okhwitsa.

⁴Ma naruma abarumikhili bandi, naboola, ‘Bol'le abalanjilwe mbu, rechekhele ebiokhulia, tsing'ombe tsianje nende ebimoosi ebinolu bianje birilwe, ne ebindu biosi bierechekhele. Mwitse khwisabo lies'selelo.’

⁵Nebutswa bamanya, nibatsia butswa mulala mumukunda kukwe omwene, oundi mubukhalabwe;

⁶nabo abasikala bandi nibafumila abarumikhili tsana, nibabakhupia esibi, nibabera.

⁷Omwami yali noburima muno, naruma amahe kaake, nikabakhuya aberi batsana, nikasamba litaala liabwe.

⁸Ma nabool'la abarumikhili baabe mbu, ‘Es'selelo sierechekhele, nebutswa abalanjilwe sibakwan'ne.

⁹Ne luno tsie mumasanganjila, ne bosi abamunyoola, mubalange betse mus'selelo.’

¹⁰Abarumikhili tsana barula nibatsia mumihanda, nibabunjelesia bosi aba bali okhunyoola, abali ababi nohomba abalahi: ma abacheni nibetsula munyumba yes'selelo.

¹¹“Olwomuruchi yenjila okhuhenga abacheni, yalola mulala mwo orebikhile ingubo yes'selelo

¹²namubool'la, ‘Omulina, winjiye mbwena muno norali neingubo yes'selelo?’ Nasiling'ana tsitsitsi.

¹³Khe omuruchi nabool'la abarumikhi baabe, ‘Mum'bohe amakhono nende ebilenje, mumufuube musiilima titit'ti esiesioba. Ebwene iyio alalakaya nakhwayula ameno.’

¹⁴Okhuba abalangwa nabenji, nebutswa abelwa nibatu.”

¹⁵Kho Abafarisayi batsia, nibachela amang'ana khubwabwe obwa nabamureche mumang'ana kaake.

¹⁶Nibaruma khuye abechi babwe, nende balala khubandu ba Herode, nibareba, “Omwibaali, khwamanya ibe oli omundu watooto. Wibaalanga injila ya Nyasaye habwene, ne soritsanga omundu wosi tawe: sichila ibe sohenganga obukali bwomundu tawe.

¹⁷Kho okhubool'le opaalanga mbwena? Nomusilo okhurunga obusuru khumuruchi wa Baroma noho?”

¹⁸Yesu yamanya obubi bwabwe, naboola, “Inywe abakalama, mundemanga busina?

¹⁹Mumanyie efetsa yobusuru.” Nibamuler'ra esilingi.

²⁰Nabareeba, “Likondo yili nende olwanzilo yilu nebiawina?”

²¹Nibamukalusia, “Nebiomuruchi wa Baroma.” Kho Yesu nababool'la “Muhelesie omuruchi ebia omuruchi, ne muhe Nyasaye ebia Nyasaye.”

²²Ne olwa bahulila, bachenya, nibamulekha, ma nibatsia owabwe.

²³Khwitukhu liene yilio Abasadukayi betsa khu Yesu ababoolanga okhusimukukha khwa abafu sikhuliho tawe.

²⁴Ma nibaboola, “Omwibaali, Musa yaboola, ‘Omundu naba nafwa, narali nabaana, awabwe akabusie omukhasiwe, yebul'le omwana wabwe abaana.’

²⁵Ne balinjiho mwifwe abaana bomundu mulala bane nabataru. Omukhulundu yatesia omukhasi ma omusiani tsana nafwa, narali no mwana, nalekhela omwana wabwe omukhasiwe.

²⁶Khandi nimbwo kekhola khu owakhabili, nowakhataru, okhwola khu owa khane nakhataru.

²⁷Inyuma we yabo bosi, omukhasi naye nafwa.

²⁸Kho mukhusimukukha aliba omukhasi wawina khubo bane nabataru? Bosi bali nibamutesia khwo.”

²⁹Nebutswa Yesu yabakalusia nababool'la, “Mukorwanga nimuramanya Amahandiko Amatsienukhu nohomba obunyali bwa Nyasaye singa buli.

³⁰Okhuba mukhusimukukha, sibateesianga nohomba okhuteesibwa tawe, nebutswa baliba singa abamalaika bomwikulu.

³¹Nebutswa khumang'ana kokhusimukukha khwa abafu musili okhusomakhwo aka Nyasaye yali okhumubool'la? Okhuba yaboola,

³²‘Ise nise Nyasaye wa Aburahamu, Nyasaye wa Isaka, khandi Nyasaye wa Yakobo!’ Nyasaye siali Nyasaye wa abafu, nebutswa ni Nyasaye owa abali mwoyo.”

³³Olwa abemikanda bakahulila, bahuka khukokhwibaala khwe.

³⁴Olwa Abafarisayi bahulila mbu Yesu ubabunisie Abasadukayi, bebunjelesia halala.

³⁵Mulala mubo omwibaali wa Malako namureeba ling'ana, okhumuteema, naboola.

³⁶“Omwibaali, mumalako komuse lilako likhongo ne lili hena?”

³⁷Yesu namubool'la, “Oyanze Omwami Nyasayewo nomwoyo kukwo kwosi, nobulamu bubwo bwosi nokhulalila khukhwo khwosi.

³⁸Yili nilio lilako likhongo elili eliokhuranga.

³⁹Ne eliakhabili elifwana n'nalio ndieli, ‘Oyanze owasio singa obwa weyanzanga omwene.’

⁴⁰Amalako yaka kabili kaletel'langa omuse kwa Musa kwosi, nende amebaalo kabaroobi.”

⁴¹Nyinga Abafarisayi bali mbebunjikhile, Yesu yabareeba,

⁴²naboola, “Mulutsi mbwena ling'ana lia Masihi? Nes'soni siawina?” Nibamukalusia, “Nes'soni sia Daudi.”

⁴³Nababool'la, “Kho nisina esiachila Omwoyo niyemel'la Daudi okhumulanga Omwami? Okhuba Daudi yaboola,

⁴⁴‘Omwami yabool'la Omwami wanje, Ikhala khumukhono kwanje omusaatsa okhwola olwa ndakhare abasuku baabo hasi webilenje bibio.’

⁴⁵Daudi naba niyamulanga ‘Omwami’, Masihi yakhaba mbwena es'soni sisie?”

⁴⁶Siyaliho mulala owanyala okhumukalusia ling'ana tawe. Ne okhurula litukhu yilio abulaho owatsalikha khandi okhumureeba lireebo liosi liosi.