Read lunyore MATAYO 23 Bible Online

MATAYO 23 - lunyore bible

MATAYO 23

¹Olwene yilwo Yesu yal'loma nemikanda nende abechi baabe.

²Naboola, “Abebaali ba Malako nende Abafarisayi, bali nobunyali okhwinoosia Amalako ka Musa khu bandi.

³Kho amang'ana kosi aka bamubool'la mukakhole; nebutswa muralonda ebikholwa biabwe tawe; okhuba sibakholanga akababoolanga tawe.

⁴Babohanga ebilinga ebisiro ebili ebitinyu okhwetukha nibara khumabeka kabandu ne abene sibanyala okhutila khwo kata nesitere siabwe tawe.

⁵Bakholanga emilimo chiabwe chiosi mbu abandu babalole. Balombanga emiabalo chiabwe emibambukhu nende okhukalihia tsikhayayi etsiokhutsingubo tsiabwe.

⁶Bayanza obwikhalo bweimbeli mutsisinakoki nende mumasabo.

⁷Nokhusiesibwa mubiiro mbayanza abandu babalangenge ‘Omwibaali’.

⁸Ne inywe murayanza okhulangwa ‘Omwibaali’ sichila omwibaali wenywe nimulala, neinywe mwesi muli abamwabo.

⁹Muralanga omundu musibala Papa sichila Papa wenywe nimulala oli mwikulu.

¹⁰Kata muralangwe Abebaali sichila Omwibaali wenywe nimulala, naye ni Kristo.

¹¹Ne oli omukhongo mwinywe alaba omurumikhili wenywe.

¹²Owekalihianga alatutuhibwa ne owetutuhianga alakalihibwa.

¹³“Mulitsiboolelwa inywe abebaali ba Malako nende Abafarisayi, inywe abakalama. Mwikalanga omuliango kwo Bwami bwomwikulu imbeli wabandu. Ne abenya okhwinjila mubekalilanga. Nenywe abene simwenya okhwinjila mwo tawe. [

¹⁴“Mulitsiboolelwa inywe abebaali ba Malako nende Abafarisayi, inywe abakalama. Mweyinjisianga mutsinyumba tsiabakhutsakhali nimubanuula emiandu chiabwe mukhwekholokhosia khulwa okhusaaya khwenywe okhurambi. Khulwako esiina siakhamufwile okhusila.][13]

¹⁵“Mulitsiboolelwa inywe abebaali ba Malako nende Abafarisayi, inywe abakalama! Mukhalanianga inyanza nende esibala khulwa okhusukhania omundu mulala; ne nyinga aba niyekalukhanisie mbwo, mumukholanga abe omwana we Kehena okhuyomba inywe esiakhabili.

¹⁶“Mulitsiboolelwa inywe abemeli ababofu, ababoolanga ‘Omundu wosi naba niyesuha khu Hekalu sikali esindu, nebutswa oba niyesuha khu tsahabu ye Hekalu, webohele.’

¹⁷Khe esikhongokhwo nesili hena inywe ababofu abahingwa? Etsahabu nohomba Hekalu etsienulanga etsahabu?

¹⁸Khandi muboolanga, ‘Omundu wosi naba niyesuha khusitsu sikali esindu, nebutswa omundu wosi naba niyesuhila khusindu esihan'nwe khusitsu, ye ubohelwe nesiesuho sisie.’

¹⁹Ababofu inywe; esikhongo nesili hena, esihanwa, nohomba esitsu esitsienulanga esihanwa?

²⁰Khusifune isio owesuha khusitsu, yesuhanga khusio, nende biosi ebili khusio.

²¹Ne uyo owesuhanga khu Hekalu, yesuhanga khuyo nende khu Nyasaye omenyanga mwo.

²²Naye owesuhanga khwikulu, yesuhanga khuluruba lwa Nyasaye, nende owikhalanga khulwo.

²³“Mulitsiboolelwa, inywe abebaali ba Malako nende Abafarisayi, abakalama! Muhaananga esiekhumi khumiro nende khwisutsa nende tsikhano, nebutswa mwamayia amang'ana akali amakhongo akomuse mbu: Obulunji, tsimbabasi, nende obusubili. Yaka kakwana mulakakhola, ne nimuramayia akandi.

²⁴Inywe abemeli ababofu, museletsanga olukuyi ne mumilanga ingamia.

²⁵“Mulitsiboolelwa inywe, abebaali ba Malako nende Abafarisayi, abakalama! Musiyanga es'sanda nende olutaabo emukongo, nebutswa musi bitsuyemwo obunuuli nende obukhang'a.

²⁶Ibe Omufarisayi omubofu, ranga osiye es'sanda nende olutaabo musi, kho emukongo wabio ebe isiyikhu.

²⁷“Mulitsiboolelwa, inywe abebaali ba Malako nende Abafarisayi, abakalama! Sichila inywe muli singa ebilindwa ebiabakhwa lilongo lilafu ebilolekhanga esioba nibikasile, ne khane musi mbitsuyemwo amakumba kabafu, nende esifwabwi siosi.

²⁸Nambwo khandi nenywe mulolekhanga imbeli wabandu okhuba abalunji, nebutswa musi mwitsuye nobukalama nende obubi.

²⁹“Mulitsiboolelwa, inywe abebaali ba Malako nende, Abafarisayi! Inywe abakalama! Sichila mwombokhanga ebilindwa biabaroobi, nimubing'onihia ebilindwa biabalunji.

³⁰Nimuboola mbu ‘Khulaba abakhabeye ho mumatukhu akali akabakuka, khane sikhwasanjilana n'nabo okhuratsia amatsahi kabaroobi tawe.’

³¹Khe mbwo mwekobokhelanga abene akoburibuli mbu muli abaana be yabo abali okhwira abaroobi.

³²Kho mutsilil'le okhuhesia akabakuka benywe bachiaka.

³³Inywe abali singa tsinzokha, abetsukhulu bameni, mwakhahonokokha mbwena esiina okhutsia mu Kehena?

³⁴Khulwe yako lole, ise murumilanga abaroobi nende abandu abachesi nende abebaali. Mubene yaba mulibera abalala nimubabamba; ne bandi khubo mulibanywekhela mutsisinakoki nolukhoba, mulibakhupia esibi, nimubelusia okhurula mwitaala elala okhwola mulindi.

³⁵Mbwo esiina siamatsahi kabalunji bosi, akaratsibwa musibala siosi sibe khwinywe, okhurula mukhwirwa khwa Habili oraali nesikha okhwola khukhwirwa khwa Sakaria omusiani wa Barakia owa mwali okhwir'ra hakari we Hekalu nende esitsu siemisango.

³⁶Mubool'langa tooto mbu, yaka kosi kaliekhola khwisuba yili.

³⁷“Inywe abandu ba Yerusalemu! Mwiranga abaroobi nimubalasa amachina abarumwa aba Nyasaye yamurumila. Ne ni hali khanga nindemanga okhubunjelesia abaana benywe halala, singa enyabuli ebunjelesianga ebiminywi biayo mumbaha tsiayo; ne simwaimbuchil'la!

³⁸Lola; Ehekalu yenywe yakhalekhwe elakwe likunda.

³⁹Mubool'la mbu, okhurulana luno simulindola khwo khandi tawe, okhwola olwa muliboola mbu, ‘Noweikhabi owitsanga muliira lio Mwami.’ ”