Read lunyore MATAYO 24 Bible Online

MATAYO 24 - lunyore bible

MATAYO 24

¹Yesu yarula mu Hekalu, ne yali natsitsanga olwa bechi baabe batsia khuye nibamumanyia amombokho ke Hekalu.

²Yesu nabakalusia, “Yee tooto, simulola yaka kosi? Mubool'langa, sililisikala khwo lichina elala khulindi tawe, elirakhafuubwe hasi tawe.”

³Olwa Yesu yali niyekhaye Khusikulu sia Miseituni, abechi baabe betsa kasilisi nibamureeba mbu, “Khubool'le khwo, akene yaka kaliekhola nyinga sina, nisilolelo sina esilimanyia okhwitsa khukhwo nende esihesi siesibala?”

⁴Yesu naye yakalusia nababool'la, “Mwelinde muralekha omundu wosi amukaate.

⁵Abenji bakhetse muliira lianje nibaboola, ‘Nise Masihi,’ balisiamia abandu abenji.

⁶Mulihulila akobulwani nende akoluyali lwamahe; murakharimukhwe ikholo tawe. Yibio okhwola biekhole nebutswa esihesi nisisili okhwola.

⁷Lihanga lilisera lihanga lindi, ne obwami bulisera obwami bundi. Khandi bilibaho inzala nende okhutechela khwesibala habundu hosi.

⁸Ne yako kosi kaliba butswa singa okhuchiaka khweinumwa.

⁹“Ma bakhamuhaane mbu mukhupibwe esibi, bakhamwire, netsimbia tsiosi tsiakhamubihil'lwe khulwanje.

¹⁰Kho olwene yilwo abenji bakhalekhe obusubili bwabwe, ne bakhasiemane omundu nowasie, bakhabihil'lane abene khubene.

¹¹Abaroobi bobubehi abenji bakhalolekhe, ne balikosia abandu abenji.

¹²Okhubela mbu obubi bwakhenjihe, obuyanzi bwabenji bulisima.

¹³Nebutswa oliefwila okhwola khusihesi, alihonibwa.

¹⁴Ne Amang'ana Amalahi yaka ako Bwami kalikambwa musibala siosi kabe oburibuli khubetsimbia tsiosi, ma khe esihesi siletse.

¹⁵“Khe olwa mulilola Esies'sinyo esio omuroobi Danieli yaboola, nisisinjiiye hatsienukhu (osomanga amanyilisie esifune yisi.)

¹⁶Olwene yilwo abali mu Buyahudi belukhile mubikulu.

¹⁷Naye oli khus'sechese sieinyumba alekhe okhwikha hasi abukule ebindu ebili munzu yiye.

¹⁸Naye oli mumukunda arakalukha ingo okhubukula ingubo yiye tawe.

¹⁹Are bane khu yabo abaliba tsinda nende abanunianga mumatukhu yako.

²⁰Musaaye okhwilukha khwenywe khuretsa khwaba mutsinyinga tsiobusindu, nohomba mwitukhu lie Sabato:

²¹okhuba olwene yilwo khwakhabe ho okhukhupibwa esibi okhukali, esibi singa yisio sisialikhwoho okhurulana okhuchiaka khwesibala okhwola leelo tawe. Kata sisilibakhwo ho khandi tawe.

²²Amatukhu yaka kalabula okhututuhibwa khane omundu siyakhahonokokhele khwo kata mulala tawe, nebutswa khulwa abelwa baabe, amatukhu yako kalatutuhibwa.

²³“Kho omundu wosi mwitukhu yilio nalimubool'la, ‘Lola, Masihi ali hano nohomba ali hala,’ murakhasubila tawe.

²⁴Aba Masihi bobubehi, nende abaroobi bobubehi bakhabisukhe ne balilolesia ebilolelo ebikhongo nebiokhuchenya, mbu babakosie abelwa ba Nyasaye nikaba nikanyalikha.

²⁵Lole! Ndekholeleye okhumubool'la.

²⁶“Kho nibaba nibamubool'la, ‘Lole! Ali musitsiimi’; murakharule: nohomba nibaboola ‘Lole! Ali munzu ebulili,’ murakhasubile tawe.

²⁷Okhuba Omwana wo Mundu yakhetse singa oluheni luhenukhanga okhurula ebukwe ndulolekha okhwola emasaba.

²⁸“Ahesifwiye sili niho ahetsisori tsiebunjelesianga.

²⁹“Nebutswa nonoho amatukhu keminyakhano yako ngahweye eliuba liakhakwe esiilima ne omwesi sikuliakha tawe, netsinyininyini tsiakhakukhe okhurula khwikulu, ne obunyali bwomwikulu bwakhatechesibwe.

³⁰Olwene yilwo esimanyilo sio Mwana wo Mundu sililolekha khwikulu: ne abandu betsinzibulo tsiosi musibala bakhekhuule, olwa balilola Omwana wo Mundu niyetsanga mumalumbesi kokhwikulu nobunyali nende obukhongo obukali.

³¹Olwika olukali lwakhakhupe, naye aliruma abamalaika baabe okhutsia mutsimbeka tsine tsiesibala, balabunjelesie abandu baabe abelwa okhurula mumbeka tsiosi etsie esibala.

³²“Mukanakane khumukhuyu. Nyinga tsisaka tsiakwo tsibetsanga tsimbisi nitsisebukha amasafu katsio, ne mumanya omuhika kwol'le.

³³Nimbwo nenywe, nyinga muba nimulolanga yaka kosi nikekholanga, mumanye Masihi ali ahembi.

³⁴Yitsulile siahene mbu Lisuba yili sililibira, okhwola ebindu yibi biosi bilabe mbiekholekhele.

³⁵Likulu nende esibala biakhabire, nebutswa amang'ana kanje sikakhabire tawe.

³⁶“Abulaho omanyile litukhu yilio nohomba esaa yiyo kata abamalaika bomwikulu kata Omwana; nebutswa Papa yenyene niye omanyile.

³⁷Okhwitsa khwo Mwana wo Mundu khuliba singa kekhola mumatukhu ka Noa.

³⁸Okhuba mumatukhu yako imbeli wolucheka abandu balia nibanywa, abasaatsa nende abakhasi nibateesania, okhwola khwitukhu lia Noa yenjila musafina.

³⁹Ne sibamanyilisia tawe, okhwola olwolucheka lwetsa, ndubamuma. Nimbwo okhwitsa khwo Mwana wo Mundu khuliba.

⁴⁰Olwene yilwo abandu babili bakhabe mumukunda; mulala alibukulwa ne oundi alisikala.

⁴¹Abakhasi babili baliba nibasetsanga khuluchina; mulala alibukulwa ne oundi alisikala.

⁴²“Niko akachila mube meso, sichila simumanyile litukhu lio Mwami wenywe yakhetse tawe.

⁴³Omwene nyumba niyakhabeye namanyile esaa yomwibi yakhetselamwo yakhabeye meso, siyakhalekhele omwibi afunake inyumba yiye tawe.

⁴⁴Ne kho, inywe nenywe mukwana mube aberechekhu khasotso sichila Omwana wo Mundu yetsanga musaa eya muramanyile.

⁴⁵“Khe, niwina oli omulindi omusubilwa omuchesi? Ni uyo owomwami we yabikha mubulindi bwabarumikhili bandi okhubahelesia ebiokhulia munyinga yahabwene.

⁴⁶Ne omulindi uyo yakhaba omusangalu nikaba omwami we amunyoola nakholanga yako olwa achelela ingo!

⁴⁷Tooto mwene mubool'langa, alamubikha ikulu wemiandu chichie chiosi.

⁴⁸Nebutswa naba nali omulindi omubi niyebool'la butswa omwene, ‘Omwami wanje usisiliye okhwitsa

⁴⁹ne nachiaka okhukhupa abarumikhili basie, ne nalia nanywa nende abakholwi bamalwa.’

⁵⁰Omwami we yakhetse munyinga eyarapaalangakhwo tawe khandi khusaa eyaramanyakhwo tawe.

⁵¹Namuremania hakari mubitonye ma alamura halala nende abakalama. Ebwene iyio yakhalakaye nakhwayula ameno.