Read lunyore MATAYO 25 Bible Online

MATAYO 25 - lunyore bible

MATAYO 25

¹“Olwene yilwo Obwami bwomwikulu bulifwananibwa khubakhaana likhumi abali okhubukula etsitaya tsiabwe, nibarula okhutsia okhwakaan'na omusaatsa wes'selelo.

²Barano khubo bali abahingwa, ne barano nibaba abachesi.

³Abahingwa babukula etsitaya tsiabwe, nebutswa sibabukula amafura n'natsio tawe.

⁴Nebutswa abachesi babukula amafura mutsichupa halala netsitaya tsiabwe.

⁵Omwene s'selelo yasisil'la, kho abakhaana bosi barengetsa nibakona.

⁶“Nebutswa mubutukhu hakari okhulanjisia khwaliho, ‘Omusaatsa wes'selelo ngwoyo! Rule mumwakan'ne!’

⁷Ma abakhaana yabo bosi nibabuukha nibalomba etsitaya tsiabwe.

⁸Kho abahingwa nibabool'la abachesi, ‘Khuhekhwo khumafura kenywe, sichila etsitaya tsiefwe tsisimanga.’

⁹Nebutswa abachesi babakalusia, ‘Sikanyalikha tawe sichila sikakhahela ifwe nende inywe tawe. Tsie khubakusianga mukule akenywe.’

¹⁰Olwa abakhaana tsana bali nibasitsia okhukula amafura, omusaatsa wes'selelo yetsa, ne abali niberechekhele benjila n'naye mus'selelo, ma omuliango nikwikalwa.

¹¹“Olwe inyuma abakhaana basiabwe yabo nibetsa mbaboola, ‘Omwami, Omwami, khwikul'le.’

¹²Nebutswa yakalusia, ‘Tooto mwene, mubool'langa inywe, simumanyile tawe.’ ”

¹³Niko akachila nimubool'la, “Mulinde sichila simumanyile litukhu nohomba esaa tawe.

¹⁴“Olwene yilwo Obwami bwomwikulu bwakhabe singa omundu owali niyenya okhutsia oluchendo musibala sindi. Yalanga abarumikhili baabe nabaha emiandu chichie.

¹⁵Yaha owokhuranga etsitalanta tsirano, owakhabili tsibili, ne owakhataru ndala; simulala okhuhelana nobunyali bubwe. Kho nasamula okhutsia oluchendo.

¹⁶Nonoho owabukula etsitalanta tsirano yatsia nakhol'la emilimo, natola obukhala etsindi tsirano.

¹⁷Khandi nimbwo owali niyabukula etsitalanta tsibili yatola obukhala etsindi tsibili.

¹⁸Nebutswa omurumikhili owabukula etalanta ndala yatsia nayaba obuko hasi, nabisa efetsa yomwami uwe.

¹⁹“Inyuma wamatukhu amenji omwami wabarumikhili yabo yetsa, nabala n'nabo.

²⁰Uyo owali niyanyoola etsitalanta tsirano yenjila naboola kowe ‘Omwami wambelesia etsitalanta tsirano nzietsi, ndatola obukhala etsindi tsirano.’

²¹Omwami uwe namubool'la ‘Omurumikhili omulahi omusubilwa wali okhuba omusubilwa khubitututu, ndakhubikha khubinji, injila mubusangali bwomwami uwo!’

²²“Khe omurumikhili owali niyanyoola etsitalanta tsibili niyetsa naboola, kowe, ‘Omwami, wamba etsitalanta tsibili, nzietsi, ndatola obukhala etsindi tsibili.’

²³Omwami uwe namubool'la, ‘Omurumikhili omulahi omusubilwa, wali okhuba omusubilwa khubitututu, ndakhubikha khubinji, injila mubusangali bwomwami uwo.’

²⁴“Khandi naye owabukula etalanta ndala yetsa naboola kowe, ‘Omwami, ndamanya oli omundu omutinyu ochesanga ahoraraaka, obunjelesianga ahorasasia.

²⁵Ndali okhuria, ninzia nimbisa etalanta yiyo mumaloba, lola njieyo, obe n'nayo.’

²⁶“Nebutswa omwami uwe yakalusia namubool'la, ‘Omurumikhili omubi omukara, wamanya njesanga aharaaraka, mbunjelesianga aharasasia;

²⁷niko akachila kakhakhuhel'le olara efetsa yanje khubasilanianga ma olwa nzitsile khane nyooye efetsa yanje nende injelesio.

²⁸Luno mumunuule etalanta iyo, muhe oli nende etsitalanta likhumi.

²⁹Okhuba khusiamulala oli n'nasio, alihebwa kho asilane n'nabio: nebutswa orali n'nasio, esiali n'nasio silahinibwa khuye.

³⁰Ne omurumikhili orakwanile uyu obula obukhala mumufuube musiilima titit'ti! Ebwene yiyo yakhalakaye nakhwayula ameno.’

³¹“Olwo Mwana wo Mundu yakhetse mubunyali bubwe nende abamalaika baabe bosi nibali halala n'naye, yaho aliikhala khuluruba lulwe lwobukhongo!

³²Ne abandu betsimbia tsiosi bakhebunjelesie imbeli uwe. Khe yakhahule yaba ne yaba, singa omwayi yahulanga amakondi kaake mutsimbusi.

³³Yakhare abandu abalunji khumukhono kukwe omusaatsa ne ababi khumukhono kukwe omukhasi.

³⁴Kho Omwami alibool'la abandu bokhumukhono kukwe omusaatsa, ‘Yitse inywe aba Papa wanje yalamila tsikhabi, mwitse mubukule emianduchiobwami obwa mwalombelwa okhurulana olwesibala sialombwa.

³⁵Okhuba ndali neinzala mukhamba esiokhulia; ndali nobuluho, mukhamba amaatsi; ndali omucheni mukhanyinjisia,

³⁶ndali esihechenye mukhambikha tsingubo; ndalwala mukhandenda; ndali mubuhambe mukhangonya.’

³⁷Abalunji balimukalusia, balaboole ‘Omwami, ni nyinga sina olwa khwakhulola noli neinzala, khukhakhuha ebiokhulia? Nohomba noli nobuluho, khukhakhunywesia?

³⁸Ni nyinga sina khwakhulola noli omucheni, khukhakhwinjisia? Nohomba noli esihechenye khukhakhubikha tsingubo?

³⁹Ni nyinga sina khwakhulola nolwala, nohomba mubuhambe khukhakhukonya?’

⁴⁰Omwami alibakalusia alaboole, ‘Siahene mubool'langa, singa mwakhol'la mulala khubamwabo banje abatu okhusila yaba, mwakhol'la ise!’

⁴¹“Olwene yilwo alibool'la yabo abali khumukhono omukhasi, ‘Murule khwise, inywe abalaamwa, mutsie mumulilo okurasimanga okwalombelwa Setani nabamalaika baabe.

⁴²Okhuba ndali neinzala, simwaimba esiokhulia; ndali nobuluho, simwainywesia;

⁴³ndali omucheni, simwainyinjisia; ndali esihechenye, simwaimbikha tsingubo; ndalwala, khandi ndali mubuhambe, simwaingonya tawe.’

⁴⁴“Olwene yilwo balikalusia balaboole, ‘Omwami, ni nyinga sina khwakhulola noli neinzala, nohomba nobuluho, nohomba omucheni, nohomba esihechenye, nohomba nolwala, nohomba mubuhambe, khukhabula okhukhurumikhila?’

⁴⁵Olwene yilwo alibakalusia, alaboole, ‘Siahene mubool'langa, singa mwabula okhukhol'la mulala khubamwabo banje abatu okhusila yaba, khe mwabula okhukhol'la ise.’

⁴⁶Ma abandu yaba bakhatsie mukhunyasibwa okhurahwa: nebutswa abalunji bakhatsie mubulamu oburahwa.”