Read lunyore MATAYO 26 Bible Online

MATAYO 26 - lunyore bible

MATAYO 26

¹Olwa Yesu yali namal'le okhuboola amang'ana yaka kosi, yabool'la abechi baabe,

²“Inyuma wamatukhu kabili singa mumanyile, nalibe Lisabo lie Pasaka, ne Omwana wo Mundu alasiemanwa mbu abambwe.”

³Olwene yilwo abesaalisi abakhongo nende abakhulundu babandu bebunjikha halala mumuchitsi kwOmwesaalisi Omukhongo owalangwa Kayafa,

⁴nibakaasia amang'ana masilisi mubuchesi singa nabamwire.

⁵Nebutswa, baboola, “Karakhaba khwitukhu lielisabo, khase indiri yakhabuukha mubandu.”

⁶Yesu yali nali Betsania, munyumba ya Simoni omuchele.

⁷Olwa Yesu yali niyekhaye nalitsanga, omukhasi oundi yetsa khuye owali nesichupa siamafura akobukusi obutinyu muno, nakatsukha khumurwe kwe.

⁸Ne olwa abechi baabe balola ling'ana yili basiendekha nibaboola, “Kohuywe butswa mbwo busina?

⁹Amafura kesuuswa yaka akobukusi obutinyu, khane kakusiibwe obukusi obutinyu, ma amapesa kalahebwa ababisandu.”

¹⁰Nebutswa Yesu nakamanya, nababool'la “Munyasianga omukhasi uyo busina? Yakholeye omulimo omulahi.

¹¹Inywe mulabetsanga nababisandu amatukhu kosi; nebutswa ise sindi n'nenywe amatukhu kosi tawe.

¹²Okhuba yanzukhil'liye amafura khumubili kwanje kuno, akhol'le yako khulwa okhurechekha khukhuyabilwa khwanje.

¹³Siahene mubool'langa, hosi aha amang'ana amalahi kalikambwangwa musibala siosi, akomukhasi uno akhol'le kakhaboolwe okhumwitsul'la.”

¹⁴Ma mulala khubechi likhumi nababili yabo, owalangwa Yuda Isikariote yatsia khubesaalisi abakhongo

¹⁵nabareeba, “Mwakhambelesia sina, nimba nindakhamureela Yesu mumakhono?” Nibabasia ebitonye biefetsa amakhumi kataru nibamuhelesia.

¹⁶Ne okhurula olwene yilwo Yudasi nachiaka okhuruna injila yokhumusiemana.

¹⁷Litukhu liokhuranga elielisabo lio Mukaati okuralimwo amamela, abechi batsia khu Yesu nibamureeba, “Wenyanga khukhulombele lisabo lie Pasaka yiyo hena?”

¹⁸Naye nababool'la “Mutsie mwitaala khumundu nalebe, mumubool'le, ‘Omwibaali aboolanga, inyinga yanje eli ahembi; nzitsanga okhukhol'la Epasaka munzu yiyo halala nabechi banje.’ ”

¹⁹Abechi bakhola singa Yesu yabalaka ma nibalomba Epasaka.

²⁰Olwa kwola mukolooba, Yesu yekhala halala nende abechi baabe, likhumi nababili khubiokhulia.

²¹Ne olwa bali nibalitsanga, Yesu naboola, “Mubool'langa tooto, mulala khwinywe nayasiemane.”

²²Abechi nibabelela muno, nibachiaka okhumureeba siamulala, “Omwami nise nohomba?”

²³Yesu nakalusia naboola, “Owa khutonjelanga n'naye omukhono mulutaabo niye owanausiemane.

²⁴Omwana wo Mundu alafwa singa obwa Amahandiko kaboolanga khuye; nebutswa alitsiboolelwa omundu uyo olisiemana Omwana wo Mundu! Bwakhabeye bulahi khumundu uyo alabula okhwibulwa!”

²⁵Yudasi, owamusiemana, namukalusia naboola, “Omwibaali, khali nise nohomba?” Naye namukalusia, “Ubooye.”

²⁶Olwa bali nibalitsanga, Yesu yabukula omukaati nakulaamila ikhabi, namekania, ma naha abechi baabe, naboola, “Bukule, mulie, yiku nikwo omubili kwanje.”

²⁷Ma nabukula es'sanda nakhupa embwo khu Nyasaye nabaha, naboola, “Nywekhwo mwesi;

²⁸okhuba kano namatsahi kanje akemuma, akaratsa khulwa abenji khulwo okhulekhelwa khwetsimbi.

²⁹Ne mubool'langa, sindinywakhwo khandi ewaini yiyi tawe, okhwola nyinga ndinywa ewaini imbia n'nenywe mu Bwami bwa Papa wanje.”

³⁰Ma nibemba ne nibarula nibatsia Khusikulu sia Miseituni.

³¹Ma Yesu nababool'la, “Inywe mwesi mulelukha nimundekha obutukhu bwalelo sichila kahandikwa mbu, ‘Ndakhere omwayi, ne amakondi komusiayo kakhasalane.’

³²Nebutswa olweinyuma nimalile okhusimukusibwa, nditsia Galilaya.”

³³Petero naye namukalusia, “Bosi nibaba nibakhulekha, ise sinakhulekhe tawe.”

³⁴Yesu namubool'la, “Siahene khubool'langa, obutukhu bwalelo, etaywa nesili okhulakula, naundeyambakhane esiakhataru.”

³⁵Petero namubool'la, “Kata nikambel'le fwe n'nawe, sinakhweyambakhane tawe.” Abechi bandi bosi baboola amang'ana amatelwa yako.

³⁶Olwene yilwo Yesu yatsia nende abechi baabe halala habundu ahalangwa Getsesemani, nababool'la, “Mwikhale hano, nisitsia okhusaaya hala.”

³⁷Nahila Petero halala nabasiani ba Sebedayo babili, nachiaka okhuba nesibeela nokhuhenda omwoyo.

³⁸Ma nababool'la mbu, “Omwoyo kwanje kuli nesibeela esinji, sinyala kata okhunzira, mwikhale hano, mulinde n'nase.”

³⁹Niyesundakhwo hambeli hatututu, nakwa mafung'ama, nasaaya, naboola, “E, Papa wanje, ngali akanyalikha, hinia es'sanda sieminyakhano khwise. Nebutswa karabba singa obwanzenyanga, nebutswa kabe obwa ibe wenyanga.”

⁴⁰Ma Yesu nakalukha khubechi bataru yabo nanyoola nibakonanga; ma nabool'la Petero, “Kali mbwena inywe bataru simwali abanyala okhulindil'la n'nase kata khulwa esaa ndala tawe?

⁴¹Mulinde nimusaaya mbu murenjila mukhutemwa tawe. Omwoyo kuyanzile nebutswa omubili kutofuye.”

⁴²Yesu yatsia okhusaaya olwakhabili, “Papa wanje, nikali mbu es'sanda esiokhunyakhana yisi sisinyala okhuhinibwa khwise, nebutswa okhwola sinywekhwo, kho lekha obulalilo bubwo bwekhole.”

⁴³Khandi nakalukha khubechi nanyoola nibakonanga tsindoolo. Sibali abanyala okhwikula tsimoni tsiabwe tawe.

⁴⁴Khandi Yesu natsia okhusaaya olwakhataru, naboolanga amang'ana amatelwa.

⁴⁵Ma nakalukha khubechi naboola, “Musikonanga nimuhuluukha? Lole, esaa yol'le eyo Omwana wo Mundu okhuhanwa khubunyali bwabandu betsimbi.

⁴⁶Bukhe, khutsie. Lole, omundu ousiemananga ngwoyo!”

⁴⁷Yesu yali nasil'loma olwa Yudasi Isikariote mulala khubechi, yoola. Yali nomukanda omukali kwabandu abali nibarumilwe nabesaalisi abakhongo nende abakhulundu.

⁴⁸Yudasi omusiemani tsana yali nasimile omukanda mbu: “Omundu owanzia okhutsunzuna niye owatsana, mumutile.”

⁴⁹Yudasi yatsia silunji khu Yesu naboola “Emilembe khwibe Omwibaali” ma namutsunzuna.

⁵⁰Yesu namubool'la, “Khola bwangu akakhuler're, omulina.” Kho betsa nibatila Yesu nibamuhandakhwo butinyu.

⁵¹Mulala khu yabo abali nende Yesu yachomola olukanga naremaka omurumikhili wo Mwesaalisi Omukhongo, nakhalaka esirwi sisie.

⁵²Yesu namubool'la, “Kalusia olukanga mulwola lwalwo. Yabo abalwananga nolukanga balerwa nolukanga.

⁵³Ibe siomanyile mbu ndakhareebele Papa wanje okhukhonya; naye bwangu yakharumiye amahe kabamalaika okhuyomba likhumi nakabili?

⁵⁴Nebutswa munjila iyo, Amahandiko Amatsienukhu akaboolanga okhwola yaka kekhole kakhahesikhile mbwena?”

⁵⁵Ma Yesu nal'loma nomukanda, “Mwitsanga khwise singa omunuuli netsinganga nebikulume? Bulitukhu ndekhala mu Hekalu ninzibaalanga neinywe simwayindila tawe.

⁵⁶Nebutswa yaka kosi kekhol'le kho akabaroobi bahandika mu Mahandiko Amatsienukhu kahesikhe.” Abechi baabe bosi nibamulekha ma nibelukha.

⁵⁷Yabo abali nibatil'le Yesu bamuhila munyumba ya Kayafa, Omwesaalisi Omukhongo aha abebaali ba Malako nabakhulundu bali nibebunjikhile halala.

⁵⁸Petero yalondanga Yesu ehale okhwola m'mukitsi kwo Mwesaalisi Omukhongo. Yenjila m'mukitsi ma niyekhala nabalindi okhulola aketsa okhwekhola.

⁵⁹Abesaalisi abakhongo nende abesiina bosi batema okhunyoola obukobokheli bwobubehi khu Yesu mbu bamwire.

⁶⁰Ne sibaali abanyala kata okhubunyoola tawe, nekata mbwo abandu abenji barul'lamwo nibaboola akobubehi khuye. Olwokhumal'likha abasatsa babili basinjila

⁶¹ma nibaboola, “Omundu uyu yaboola, ‘Nyala okhusambula Ehekalu ya Nyasaye ne inyuma wamatukhu kataru ninjiombokha khandi.’ ”

⁶²Omwesaalisi Omukhongo nasinjila nabool'la Yesu, “Sioli nelikalusio elionyala okhuhana khumasitako kositakilwanga yaka tawe?”

⁶³Nebutswa Yesu yabuna tsi khandi Omwesaalisi Omukhongo nal'loma khuye, “Muliira lia Nyasaye oli mwoyo luno khuretsanga khusiesuho: khubool'le noba noli Masihi, Omwana wa Nyasaye.”

⁶⁴Yesu namukalusia, “Khe ubooye. Nebutswa mubool'langa mwesi: Okhurula luno okhutsilil'la imbeli namulole Omwana wa Nyasaye niyekhaye khumukhono musaatsa okwo wobunyali khandi niyetsanga khwilumbesi liomwikulu!”

⁶⁵Khu yaka Omwesaalisi Omukhongo yarandula tsingubo tsitsie ma naboola, “Onyala Okhunyeka Nyasaye! Sikhutakha abakobokheli bandi tawe! Mumal'le butswa okhuhul'la okhunyeka khukhwe.

⁶⁶Mupaalanga sina?” Nibakalusia, “Esiina simufwiliye kho okhwola afwe.”

⁶⁷Khe bamufutsila amare m'moni khandi nibamukhupaka; nende yabo abamwala tsimbi,

⁶⁸nibaboola, “Khuroobele, Masihi! Fwanania khwo niwina okhutuyile!”

⁶⁹Petero yali niyekhaye esioba m'mukitsi olwa mulala khubarumikhili bakhaana bo Mwesaalisi Omukhongo omurumikhili mukhana wamulala khubesaalisi abakhongo yetsa khuye ma naboola, “Kata ibe walinji nende Yesu Omugalilaya.”

⁷⁰Nebutswa yambakhana imbeli wabwe bosi. Nakalusia naboola, “Simanyile akol'lomangakhwo tawe.”

⁷¹Ma natsia esioba mubwinjil'lo bwom'mukitsi. Omurumikhili mukhana undi namulola khandi naboola khubasaatsa abaliho, “Omundu uyo yalinji nende Yesu Omunasareti.”

⁷²Khandi Petero niyambakhana nakalusia, “Ndesuhanga mbu simanyile omundu uyo tawe!”

⁷³Olunyuma lwoluhono olutititi abasatsa abali nibasinjiyeho betsa khu Petero nibaboola, “Akatooto kali mbu oli mulala khubo, khandi kata okhul'loma khukhwo khumanyianga mbu oli mulala khubo.”

⁷⁴Khe Petero naboola, “Ndesuhanga mbu, mboolanga akatooto! Simanyile omundu uyo tawe!” Habwene nahabwene etaywa nelakula,

⁷⁵ma Petero niyetsul'la aka Yesu yali niyamubool'la. “Etaywa nesili okhulakula, naundeyambakhane esiakhataru.” Yatsia esioba ma nalakaya obululu.