Read lunyore MATAYO 27 Bible Online

MATAYO 27 - lunyore bible

MATAYO 27

¹Khale mukamba tsuli, abesaalisi abakhongo bosi nende abakhulundu babandu baloosia obwokhwira Yesu.

²Nibamuboha neminyol'lo nibamuhila nibamura mumukhono kwa Pilato omukafuna we Buroma.

³Olwa Yudasi, owali okhumusiemana yalola Yesu nakhalachiywe esiina, yekalukhania, nakalusia ebitonye biefetsa amakhumi kataru khubesaalisi abakhongo nende abakhulundu.

⁴Naboola, “Khol'le tsimbi nisiemana omundu orali nesikha.” Nabo nibakalusia nibaboola, “Khuhendela sina khukene yako? Yako namang'anako omwene.”

⁵Yudasi yafuuba ebitonye biefetsa yibio mu Hekalu, narula mwo natsia niyesunga.

⁶Abesaalisi abakhongo babukula ebitonye biefetsa yibio, mbaboola, “Nomusilo okhubikha amapesa yaka mwibikhilo lie Hekalu, sichila namapesa akobukusi bwamatsahi.”

⁷Ma nibahuchilisania khuko, nibarumikhila ebitonye biefetsa okhukula Omukunda Kwomulonji, bayabilenje mwo abacheni.

⁸Niko akachila omukunda tsana kulangwanga “Omukunda kwamatsahi,” okhwola leelo.

⁹Nilwo olwa amang'ana akali ngaboolwa na Yeremia kahesikha, “Babukula ebitonye biefetsa amakhumi kataru, esichelo siabandu ba Isiraeli bali mbahuchiliye barunge khulwa ye.

¹⁰Nibarumikhila amapesa yako khulwo okhukula omukunda kwomulonji, singa Omwami yandaka.”

¹¹Yesu yasinjila imbeli wo Mukafuna Omuroma, owamureeba mbu “Ibe niwe Omwami wa Bayahudi?” Yesu namukalusia, naboola “Kho ubooye.”

¹²Nebutswa olwa abesaalisi abakhongo nende abakhulundu bamusinjil'la nokhumurebelesia, siyakalusia ling'ana tawe.

¹³Kho Pilato namubool'la “Siohul'langa amang'ana yaka kosi akabaribulanga khuibe tawe?”

¹⁴Nebutswa Yesu siyamukalusia kata ling'ana elala tawe. Khu yako omukafuna yachenya okhusila muno.

¹⁵Khu buli nyanga yelisabo lie Pasaka omukafuna yali niyanala okhuboholol'la emikanda omubohe mulala, owababa mbenyele.

¹⁶Khunyinga yene iyo yaliho omubohe owamanyikha muno owalangwa Barabba.

¹⁷Kho olwo omukanda kwebunjikha halala, Pilato yabareeba, “Mwenya muboholol'le wina? Barabba, nohomba Yesu olangwa Masihi?”

¹⁸Yali namanyile bulahi mbu abakhongo ba Bayahudi bali nibamureye mumakhono kaake khulwe isiendekha.

¹⁹Olwa Pilato yali niyekhaye munyumba yokhukhalachilamwo esiina, omukhasi uwe yamurumila ling'ana naboola, “Orasanga khwo mwing'ana liosi khumulunji uyu tawe, okhuba nyakhan'ne mwilooro obutukhu buhweye khumang'ana kaake.”

²⁰Abesaalisi abakhongo nende abakhulundu batsuuba abandu mbu basabe Pilato alakhuule Barabba ne Yesu abe niye owirwa.

²¹Nebutswa Pilato yareeba abomukanda, “Noli hena khu babili yaba owamwenya mulakhul'le?” Nibaboola, “Barabba.”

²²Ne Pilato nabareeba, “Nakhole mbwene Yesu uyu olangwanga Masihi?” Bosi nibamubool'la, “Abambwe!”

²³Pilato nabareeba, “Busina? Akhol'le bubi sina?” Nebutswa bahanzukha okhusila, nibaboola, “Abambwe.”

²⁴Olwa Pilato yalola sianyala esindu tawe, nebutswa indiri yali niyenya okhurulikha, yabukula amaatsi, niyesaaba amakhono kaake imbeli womukanda, naboola, “Mbula esikha mukhufwa khwomundu uyu. Inywe abene mulole eliamukhola.”

²⁵Ne abandu bosi nibamukalusia nibaboola, “Amatsahi kaake kabe khwifwe abene nende khubaana befwe.”

²⁶Ma Pilato nababoholol'la Barabba; nebutswa yariaba Yesu nolukhoba namura mumakhono kabwe bamubambe.

²⁷Kho abasikari ba Pilato bahila Yesu mu Lwarale lwa Pilato, ne omukanda kwosi okwabasikari nikwebunjelesia ho khuye.

²⁸Bamunabula tsingubo tsitsie nibamubiikha ekanzo inzakhanyu.

²⁹Ma nibalomba olusimbi lwamahwa nibara khumurwe kukwe, nende olusaala mumukhono kukwe omulunji; nibamusikamila, nibamutsekhel'la nibaboola, “Emilembe, Omwami wa Bayahudi!”

³⁰Mbamufutsila amare, khandi nibabukula olusaala nibamuriaba khumurwe.

³¹Olwa bali mbamal'le okhumutsekhel'la, nibamunabula ekanzo, ne nibamubiikha tsingubo tsitsie tsiene. Kho nibamuloobia esioba okhutsia okhumubamba.

³²Olwa bali nibarulanga, banyoola omundu Omukurene, owalangwa mbu Simoni. Abasikari nibamuhachia yetukhe omusalapa kwa Yesu.

³³Bali okhwola habundu ahalangwa Gologotsa, eliboolanga “Habundu he Sihanga.”

³⁴Yaho bamuha ewaini netsokan'ne nende indulwe anywe: nebutswa olwa yatsanzamakhwo, siyachinywa tawe.

³⁵Bali okhumubamba, ma nibakabulana tsingubo tsitsie, mbatsikhupila imbulu.

³⁶Olwe inyuma, bekhalaho nibamulinda.

³⁷Hekulu womurwe kukwe baraho amahandiko akokhumuninil'la: “UYU NIYE YESU OMWAMI WA BAYAHUDI.”

³⁸Ma bamala nibabamba abanuli babili halala n'naye, mulala khumukhonokwe omusaatsa ne oundi khumukhonokwe omukhasi.

³⁹Ne yabo ababiraho nibamutsekhel'la nibanuya emirwe chiabwe nibaboola,

⁴⁰“Ibe owakhasambuye Ehekalu, ma wombokha mumatukhu kataru, wehonie wikhe okhurula khumusalapa noba noli Omwana wa Nyasaye.”

⁴¹Khandi mbwo abesaalisi abakhongo nende abebaali ba Malako nabakhulundu bamunyokhosia nibaboola,

⁴²“Yahonianga abandi, ne siakhanyala okhwehonia omwene? Siali niye Omwami wa Baisiraeli? Naba niyakhekha okhurula khumusalapa, nefwe khwakhamusubila.

⁴³Yasubila mu Nyasaye naboola mbu no Mwana wa Nyasaye. Lekhe khulola Nyasaye naba niyetsa okhumuhonia.”

⁴⁴Abanuuli tsana abayabambwa n'nabo khandi nabo bamunyeka mbwo.

⁴⁵Okhurula khusaa yakhasasaba yam'basu okhwola etsisaa tsirano natsine, esiilima siali khusibala siosi.

⁴⁶Ne olwe etsisaa tsirano natsine tsiali nitsili ahembi okhuhwa, Yesu yahanzuukha nomwoyo omukali naboola, “Eloi, Eloi, lama sabakitsani?” Akaboolanga, “Nyasaye wanje, Nyasaye wanje, undekhele busina?”

⁴⁷Abandi khubali nibasinjiye ho, bamuhulila, mbaboola “Omundu uyu alanganga Elija.”

⁴⁸Ahene yaho oundi khubo niyelukha tsimbilo, nabukula ingofuma, niyena mumatsi amalulu, nara khwitundu, natema okhumunywesia.

⁴⁹Abandi nibaboola “Lekha khulole Elija naba niyetsa okhumuhonia!”

⁵⁰Yesu nahanzukha khandi nomwoyo omukali, ne omwoyo ngurula.

⁵¹Ne lola ingubo eyasinganga mu Hekalu yarandukha ebitonye bibili okhurula hekulu okhwola hasi. Esibala siatechela ne tsinyanda tsiatikha;

⁵²ebilindwa biekukha; ne abandu ba Nyasaye abenji abali nibafwa basimukukha.

⁵³Barula mubilindwa ne inyuma wokhusimukukha khwa Yesu nibenjila mwitaala litsienukhu nibalolekha khubandu abenji kol'lani.

⁵⁴Olwe Etswoni nende abali nibalindanga Yesu n'naye, balola okhutechela khwesibala nende akali nikekhol'le, baria muno, nibaboola, “Siahene, uyu no Mwana wa Nyasaye.”

⁵⁵Baliho abakhasi abenji nibahengelanga ehale, bali mbalondenje Yesu okhurula Galilaya, ne bali nibamurumikhiyenje.

⁵⁶Mubene yabo yali Mariamu Magadalena, nende Mariamu nyina Yakobo na Yosefu, nende nyina Yohana na Yakobo abaana ba Sebedayo.

⁵⁷Nyinga kwola mukolooba, omusaatsa omuhinda mulala okhurula Arimatsia, eliira lilie Yosefu yetsa, naye omwene yali omwechi wa Yesu.

⁵⁸Yatsia khu Pilato nasaba omubili kwa Yesu. Pilato yalaka mbu akuhebwe.

⁵⁹Yosefu yabukula omubili kwatsana, nakuboha neingubo yekatani isiyikhu.

⁶⁰Nakura musilindwa sisie siene esiyia, esiayabwa mwichina. Ma nakongomia lichina likhongo nara khumunwa kwesilindwa, narulaho.

⁶¹Mariamu Magadalena nende Mariamu undi bali nibekhayeho nibahengele enasilindwa.

⁶²Kho litukhu elialondakhwo liali lie Sabato, abesaalisi abakhongo nende Abafarisayi bebunjelesia okhutsia khu Pilato, nibaboola,

⁶³“Omwami, khwitsul'langa omubehi uyu olwa yaali nasili mwoyo yaboola mbu: ‘Inyuma wamatukhu kataru ndakhasimukukhe.’

⁶⁴Khulwako laka esilindwa silindwe okhwola khwitukhu liakhataru, khase haundi abechi baabe bakhetsa nibeba omubilikwe butukhu, ma babool'le abandu, ‘Usimukukhile okhurula mubafu,’ ne obubehi bweinyuma bwakhayomba obwokhuranga.”

⁶⁵Pilato yababool'la, “Muli nende abalindi, tsie, musilinde muno singa mumanyile.”

⁶⁶Nibatsia, nibalinda esilindwa buli, nibarakhwo lichina butinyu nende abalindi.