Read lunyore MATAYO 3 Bible Online

MATAYO 3 - lunyore bible

MATAYO 3

¹Mumatukhu yako Yohana Omubaputisi yetsa nakambanga musitsiimi sie Buyahudi, naboola:

²“Murule mutsimbi tsienywe okhuba Obwami bwo Mwikulu buli ahembi!”

³Yohana niye owomuroobi Isaya yal'lomakhwo olwa yaboola, “Omundu nalebe olanjisianga musitsiimi, ‘Mulombele OMWAMI injila yiye mulunjisie emihanda chichie.’ ”

⁴Tsingubo tsia Yohana tsana tsialiombwa khubwoya bweingamia, niyebohele olukhoba lweliseelo mus'sienje sisie, ne esiokhulia sisie siali tsisiche nende obukhi bwomusitsiimi.

⁵Abandu betsa khuye okhurula Yerusalemu nende Ebuyahudi yosi, nende mutsimbeka tsindi etsilondokhana nende omuchela kwa Yorodani tsiosi.

⁶Beyama tsimbi tsiabwe, naye nababaputisa mumuchela kwa Yorodani.

⁷Olwa Yohana yalola Abafarisayi abenji nende Abasadukayi nibetsanga okhubaputiswa, yababool'la, “Inywe abali singa tsinzokha! Niwina owamubool'la mbu munyala okhwilukha esinyasio sia Nyasaye ali ahembi okhuruma?

⁸Mukhole ebindu ebiakhamanyia mbu murul'le mutsimbi tsienywe.

⁹Ne murakanakana mbu munyala okhwilukha esinyasio sia Nyasaye mukhuboola mbu, ‘Aburahamu ni kuka wefwe.’ Mubool'langa mbu Nyasaye anyala okhubukula amachina yaka ma alombelemwo Aburahamu ebisoni.

¹⁰Imbatso yerechekhele okhurema ebisina biemisaala; siomusaala okuraama ebiamo ebilahi tawe, kularemakwa nikufubwa mumul'lo.

¹¹Ise mubaputisanga mumatsi okhumanyia mbu murul'le mutsimbi tsienywe, nebutswa uyo owitsanga inyuma wanje nowobunyali okhuyomba ise, ne singwan'ne okhuchinga ebilaro bibie tawe. Yakhamubaputise inywe mu Mwoyo Omutsienukhu nende mumul'lo.

¹²Ali nende olutelu lulwe mumukhono, alelula obuswache bwosi pe. Alabunjelesia ingano ye naara musiachi sisie, nebutswa alasamba omukhuutsi nende omul'lo okurasimanga tawe.”

¹³Inyinga yene yiyo Yesu yarula Galilaya niyetsa Yorodani aha Yohana yali nali mbu Yohana amubaputise.

¹⁴Nebutswa Yohana yatema okhumukaya naboola, “Kahel'le ise mbaputiswe nende ibe nawe witsile khwise?”

¹⁵Nebutswa Yesu yamukalusia naboola, “Umbuchil'le luno; sichila nimbwo kahel'le okhuhesia obulunji bwosi.” Kho Yohana yamuhuchil'la.

¹⁶Ne olwa Yesu yali nabaputisilwe, yatikulukha okhurula mumatsi. Yaho likulu ndikukha naye nalola Omwoyo wa Nyasaye niyekhanga hasi singa likhulwi, nayela khuye.

¹⁷Ma Omwoyo okhurula mwikulu, nikuboola, “Uyu niye Omwana wanje owandayanza, owasangal'langa okhusila.”