Read lunyore MATAYO 4 Bible Online

MATAYO 4 - lunyore bible

MATAYO 4

¹Kho Yesu yemel'lwa nende Omwoyo okhutsia musitsiimi okhutemwa nende Setani.

²Ne olwa yali niyahonjele inzala amatukhu amakhumi kane, om'basu nobutukhu naralitsangakhwo esiokhulia tawe, inzala yamala nemuluma.

³Ma Setani niyetsa khuye namubool'la “Noba noli Omwana wa Nyasaye, laka amachina yaka kakwe obusuma.”

⁴Nebutswa Yesu yakalusia, “Akahandikwa kaboolanga: ‘Omundu sialamenya khulwobusuma bwonyene tawe, nebutswa khu sieling'ana elia Nyasaye al'lomanga.’ ”

⁵Ma khandi Setani namuhila Yerusalemu, litookho Litsienukhu, namusinjisia khubutenje bwes'suli sie Hekalu.

⁶Namubool'la: “Noba noli Omwana wa Nyasaye ruuma hasi; sichila akahandikwa kaboolanga: ‘Nyasaye alalaka abamalaika baabe khumang'ana kako, nabo balakhuletel'la mumakhono kabwe, khase wakhesikar'ra esilenjesio khwichina.’ ”

⁷Yesu namubool'la, “Khandi Akahandikwa kaboolanga: ‘Oratema Omwami Nyasaye uwo tawe.’ ”

⁸Ma khandi Setani namuhila ikulu wesikulu esirambi namumanyia oburuchi bwosi bwesibala muluyali lwabwo lwosi.

⁹Ma namubool'la, “Yibi biosi ndakhuha noba nokwa hasi niundekayakaya.”

¹⁰Ma Yesu namubool'la, “Rula otsie Setani, sichila Akahandikwa kaboolanga mbu ‘Winamilenje Omwami Nyasaye uwo nomurumikhila yenyene.’ ”

¹¹Kho Setani narula khu Yesu, ne abamalaika nibetsa nibamurumikhila.

¹²Nyinga Yesu yahulila mbu Yohana ureywe mubuhambe yatsia Galilaya.

¹³Yarula Nasareti natsia Kaperinaumu, litaala elili ahembi neinyanza ya Galilaya mutsimbeka tsia Sabuloni na Nafutali.

¹⁴Yaka kekhola kachile akomuroobi Isaya yali niyaroba kahesikhe,

¹⁵“Esibala sia Sabuloni nende esibala sia Nafutali khunjila yokhunyanza injelekha wa Yorodani, Galilaya esibala sia betsinzibulo.

¹⁶Abandu abamenyanga musiilima Balalola obulafu obukhongo. Nabo abamenyanga mutsimbeka tsiesiliima siolufu, obulafu nabubakhile.”

¹⁷Okhurula khunyinga yene iyo Yesu yachiaka okhukamba nokhuboola, “Murule mutsimbi tsienywe okhuba Obwami bwomwikulu buli ahembi!”

¹⁸Olwa Yesu yali nachendanga khuluchinga lweinyanza ya Galilaya, yalola abamwabo babili abali abalubi. Mulala khubo yali Simoni owalangwa Petero nende amwabowe Anderea. Bali nibalubanga tsisutse namakoko munyanza.

¹⁹Yesu yamala ababool'le, “Munonde nase namwibaal'le obwokhuluba abandu.”

²⁰Ne bwangu nibalekha amakoko kabwe nibamulonda.

²¹Yatsilil'la hambeli okhurula yaho ma nalola abamwabo bandi babili, Yakobo na Yohana abaana ba Sebedayo. Nabo bali mbali muliaro halala nende samwana wabwe Sebedayo nibarechekhanga amakoko kabwe. Ma Yesu nabalanga.

²²Nabo bwangu nibalekha eliaro halala na samwana wabwe nibamulonda.

²³Yesu yabotokhana musibala sia Galilaya siosi niyebaalanga mutsisinakoki[2] tsiabwe nakamba Amang'ana Amalahi akobwami nahonianga obulwaye tsimbila tsiosi mubandu.

²⁴Ifuma yiye yalanda musibala sia Siria siosi, kho abandu nibamuler'ra bosi abali mbalwala nende abali nokhutsunwa lukano, nende abali nebisieno, nabetsindulume, nende abakwa amakara nabahonia.

²⁵Emikanda emikali chiamulonda echiarula Galilaya, nende Dekapoli[3], na Yerusalemu ne Ebuyahudi; nende injelekha wa Yorodani.