Read lunyore MATAYO 5 Bible Online

MATAYO 5 - lunyore bible

MATAYO 5

¹Yesu yalola emikanda ma naniina khusikulu. Ne olwa yali niyekhaye, abechi baabe beetsa khuye,

²ma nachiaka okhwibaala naboola:

³“Bali neikhabi abehulilanga nabatakha khubindu biomwoyo sichila Obwami bwomwikulu nobwabwe.

⁴“Bali neikhabi yabo abali musibeela Nyasaye yakhabahotselesie.

⁵“Bali neikhabi yabo abali abahoma Nyasaye yakhabalaamile esibala.

⁶“Bali neikhabi yabo abali neinzala nobuluho khulwobulunji Nyasaye alibekusia.

⁷“Bali neikhabi yabo ababeelanga abasiabwe tsimbabasi, Nyasaye yakhababeele tsimbabasi.

⁸“Bali neikhabi yabo abali abasiiyikhu mumioyo balilola Nyasaye

⁹“Bali neikhabi abakholanga akomulembe Nyasaye yakhabalange abaana baabe.

¹⁰“Bali neikhabi abakhupibwangwa esibi khulwobulunji Obwami bwomwikulu nobwabwe.

¹¹“Muli neikhabi inywe nyinga abandu bamukondekhela nibamukhupia esibi nibamuchiikha amang'ana amabi kosi sichila muli abalondi banje.

¹²Musangale nimulema emioyo muno sichila amatani kenywe namenji mwikulu. Nimbwo abaroobi abaliho imbeli wenywe bakhupibwa esibi.

¹³“Inywe mufwana omunyu khubandu bosi. Nebutswa omunyu nikuba nikubulamwo esinosi kwakhatola mbwena esinosi siakwo khandi? Kubula obukhonyi khubandu, kho kulafubwa esioba abandu nibakusena nende ebilenje biabwe.

¹⁴“Inywe mufwana obulafu bwesibala siosi. Litaala eliombokhwa khusikulu silinyala okhubiswa tawe.

¹⁵Omundu wosi sahambianga etaya ma achifunikhila musipaala tawe habula achiretsanga khusihani siayo nebakhochisia bosi abali munyumba.

¹⁶Lekhe obulafu bwenywe bulabinjie mbwo imbeli wabandu mbu balole emilimo chienywe emilahi ma bafumie Papa wenywe oli mwikulu.

¹⁷“Murakanakana mbu ndetsa okhwononia amalako ka Musa nohomba okhwibaala khwabaroobi tawe. Sindaitsa okhwononia tawe nebutswa okhuralisia obwibaali bwabwe.

¹⁸Okhuba mubool'langa siahene, likulu nende esibala nibisili okhubira, inyukuta ndala kata akharonyelesi khalala sikhalirula khwo khumalako tawe okhwola kosi kalekhole.

¹⁹Khulwako omundu wosi oba niyononiakhwo lilako elala elili litututu muno khumatu yaka niyebaal'la abandi okhukhola mbwo, yakhabe omutututu mu Bwami bwo Mwikulu. Nebutswa omundu oba nahesia amalako niyebaal'la abandi okhukahesia niye oliba omukhongo mu Bwami bwo Mwikulu.

²⁰Kho mubool'langa mbu munyala butswa okhwinjila mu Bwami bwomwikulu nikakhaba obusubilwa bwenywe buyomba obusubilwa bwa Bafarisayi nende obwa Bebaali ba Malako.

²¹“Mwahulila obwabandu bakhale babool'lwa, ‘Oreera tawe; omundu wosi naba niyeera akwan'ne okhukhalachilwa esiina.’

²²Nebutswa ise mubool'langa, siomundu wosi oba nabihil'lwa[4] omwana wabwe akwan'ne okhukhalachilwa esiina: ne omundu oba nanyeka omwana wabwe akwan'ne okhulerwa imbeli wesiina siabakhulundu, ne omundu oba nalanga omwana wabwe esihingwa, alaba mubutinyu bwokhutsia m'mul'lo kwe Kehena.

²³Khulwe yako, noba nohananga esihanwa sisio khu Nyasaye khusitsu siemisango, niwitsul'la mbu owasio ali nesikha n'nawe,

²⁴lekha esihanwa sisio yaho imbeli wesitsu otsie olombe obulamu no mwana wenywe mbelio, kho okalukhe ohaane esihanwa sisio khu Nyasaye.

²⁵“Omundu naba nakhwinjil'la hango ma nakhuhila musiina, huchilisania n'naye olwobweyangu busiliho muroola musiina. Olwa muba nimwol'le musiina omusukuwo alakhuhana khumukhalachi, naye omukhalachi alakhuhana mumakhono komusikari nawe olafubwa mububohe.

²⁶Olamenyamwo okhwola olwoliba norunjile lisendi liokhumal'likha.

²⁷“Mwahulila mbu kaboolwa, ‘Oraheya tawe.’

²⁸Nase mubool'langa mbu, omundu wosi ohenganga omukhasi namwekomba umal'le okhuheya n'naye mumwoyokwe.

²⁹Kho imoni yiyo yomukhono musaatsa neba nekhwemel'la okhukhola tsimbi ochitsomole ma ochifuube ehale. Nobulahi okhusila ibe okhukosia khwo esitonye siomubili kukwo okhuyomba omubili kukwo kwosi okhufubwa mu Kehena.

³⁰Ne omukhono kukwo omusaatsa nikuba nikukhwemel'la okhukhola tsimbi okuremache ma okufuube ehale. Nobulahi okhusila okhukosia esitonye sisio silala, okhuyomba omubili kukwo kwosi kufubwe mu Kehena.

³¹“Khandi kaboolwa, ‘Omundu oba nakhunga omukhasi uwe, amuhe ebarwa yokhwabukhana.’

³²Nebutswa nase mubool'langa: omundu naba nakhunga omukhasiwe khusifune esirali esiobuheyi ali nesikha siokhumukhola omuheyi naba naleerwa nomusaatsa undi; ne omundu oba namuleera aheyanga n'naye.

³³“Khandi mwahulila abandu bakhale babool'lwa, ‘Orabula okhuhesia akokhwesuhakhwo tawe, nebutswa ohesie akawesuha khu Mwami okhukakhola.’

³⁴Nase mubool'langa, Muresuha kata na hati, kata khwikulu, sichila nilio oluruba lwa Nyasaye;

³⁵nohomba khusibala, sichila nisio indebe eyalambisianga khwo ebilenje bibie, kata oresuha khu Yerusalemu sichila nelitookho lio Mwami omukhongo.

³⁶Kata oresuha khumurwekwo, sichila sionyala okhukalukhania liswi lilio kata elala okhulikhola lilafu nohomba limwamu tawe.

³⁷Nebutswa amang'ana kenywe kabetsenje, ‘Yee, Yee!’ ‘Tawe, tawe;’ sichila akandi kosi akayomba yaka karulanga khumubi.

³⁸“Mwahulila mbu kaboolwa, ‘Imoni khumoni, ne elino khulino.’

³⁹Nebutswa nase mubool'langa; orarunga es'sialia khumundu okhukholeye obubi tawe. Omundu naba nakhwala oluhi khuluseya lwomukhono musaatsa omusukhanichisie oluseya olwelubeka lundi.

⁴⁰Ne omundu nakhuhila mukhuyalwa niyenyanga abukule lisati lilio, mulekhele abukule kata ne likoti.

⁴¹Ne omundu okhuhachia omuchinjile ebisiro bibie okhuhila ekilomita ndala, muhil'le etsikilomita tsibili.

⁴²Omundu naba nakhusaba esindu muhelesie; ne omundu oba niyenya okhuhamba esibere, muhambie.

⁴³“Mwahulila mbu kaboolwa, ‘Oyanze omulinawo ne osule omusukuwo.’

⁴⁴Nebutswa ise mubool'langa: Muyanze abasuku benywe mubasaayile abamukhupianga esibi,

⁴⁵Khe mube abaana ba Papa wenywe oli mwikulu. Okhuba yakhianga eliuba lilie khubandu ababi nende abalahi, khandi akwisianga ifula khubalunji nende abasiamu.

⁴⁶Nisina esiakhachila Nyasaye wamuha amatani nikakhaba muyanzanga butswa yabo abamuyanzanga bonyene? Kata abasololi bobusuru bakholanga mbwo.

⁴⁷Ne nimuba nimusiesia abaana benywe bonyene, mukholanga sina esia mubayombeye? Kata abetsimbia bakholanga mbwo.

⁴⁸Kho mube abalunji singa Papa wenywe oli mwikulu ali omulunji.