Read lunyore MATAYO 6 Bible Online

MATAYO 6 - lunyore bible

MATAYO 6

¹“Mwelinde, murakhola obulahi bwenywe imbeli wabandu mbu bamulole tawe. Nimuba nimukhola obulahi bwenywe imbeli wabandu, simulinyoola amatani okhurula khu Papa wenywe oli mwikulu tawe.

²“Kho nyinga okholanga aketsimbabasi tsitsio khumutakha orelolesia singa abakalama bakholanga mutsisinakoki nende mumihanda tawe. Bakholanga mbwo mbu abandu babafumie. Siahene mubool'langa mbu bamal'le okhunyoola amatani kabwe.

³Nebutswa ibe nyinga ohaananga ebietsimbabasi khumutakha, oralekha kata omulina uwo owokhusibafu amanye tawe.

⁴Ma ebihanwa bietsimbabasi bibio bibe ebiamambiswi. Ne Papa wenywe ololanga akamambiswi alakhuha amatani.

⁵“Ne nyinga musaayanga muraba singa abakalama. Bo bayanza okhusaaya masinjila mutsisinakoki nende mumasanganjila mbu abandu babalole. Siahene mubool'langa, bamal'le okhunyoola amatani kabwe.

⁶Nebutswa nyinga ibe osaayanga, winjile munzu yiyo ebulili, nomal'le okhwikala omuliango, osaaye khu Papa uwo oralolekhanga. Ne Papa uwo ololanga akokholanga mumambiswi alakhuha amatani.

⁷“Olwa musaaya murelakalakania singa Abetsimbia abakaalanga mbu Nyasaye yakhabahulila khulwa amang'ana kabwe amenji tawe.

⁸Inywe murafwana n'nabo tawe. Papa wenywe umanyile ebia mutakhanga nimusili okhumusaba.

⁹Kho inywe musaaye mbu: ‘E Papa wefwe oli mwikulu, Eliira lilio litsienukhu lifumibwe.

¹⁰Obwami bubwo bwitse, obulalilo bubwo bukholwe musibala singa obwa bukholwanga mwikulu.

¹¹Okhuhe leelo ebiokhulia biefwe biesielitukhu.

¹²Okhulekhele okhwona khwefwe singa obwa khulekhelanga abakhwonelanga.

¹³Orakhuhila mukhutemwa nebutswa okhusoole khumabi.’

¹⁴“Nimuba nimulekhela abandu okhwona khwabwe, Papa wenywe oli mwikulu naye alamulekhela okhwona khwenywe.

¹⁵Ne nimuba nimuralekhela abasienywe okhwona khwabwe, Papa wenywe salamulekhela okhwona khwenywe.

¹⁶“Ne nyinga muhonganga okhulia murakhunyia hamoni singa abakalama bakholanga tawe. Babihianga m'moni mwabwe kho abandu balole singa bahongele okhulia. Mubool'langa siahene, bamal'le okhunyoola amatani kabwe.

¹⁷Ne ibe olwa ohonganga okhulia webakhe amafura m'moni mumwo, ma olombe liiswi lilio

¹⁸mbu abandu balekhe okhumanya mbu ohonganga okhulia, nebutswa Papawo oralolekhanga yenyene alamanya. Ne Papawo ololanga mambiswi alakhuha amatani.

¹⁹“Murebikhile amabiikhilo musibala, ha matsilihi nende olukukhu biononinjia, khandi habebi bafunakanga nibeeba tawe.

²⁰Harali mwebikhile amabiikhilo mwikulu aha matsilihi nende olukukhu biranyala okhwononia, kata abebi sibanyala okhufunaka tawe.

²¹Sichila ahe libere lilio lili, niho ahomwoyo kukwo kuli.

²²“Tsimoni tsili singa etaya yomubili. Nitsiba nitsili habwene, omubili kukwo kwosi kuletsulamwo obulafu;

²³nebutswa nitsiba tsimbi, omubili kukwo kwosi kulaba musiilima: Kho obulafu obuli mwibe mbuba esiilima, mako obwesilima sili esikhongo!

²⁴“Abulaho omundu onyala okhurumikhila abaami babili, sichila alanzukhila mulala namuyanza oundi; khandi alaba omusubilwa khumulala ne nachiaya oundi. Simunyala okhurumikhila Nyasaye nende emiandu tawe.

²⁵“Niko akachila nimubool'la mbu murahendela obulamu bwenywe, esianamulie kata esianamunywe, nohomba akemibili chienywe, esia namwebiikhe. Obulamu sibuyomba ebiokhulia? Ne omubili sikuyomba tsingubo?

²⁶Mupaale khwo khusifwanani siamanyonyi akokhwikulu, sikarakanga kata sikachesanga, nohomba sikarelanga mubiachi, ne Papa wenywe womwikulu akalisianga. Inywe simukayomba okhusila?

²⁷Ali hena khwinywe onyala okhwemetakhwo kata esaa ndala khubulamu bubwe khulwa okhuhendela?

²⁸“Kata nisina esichilanga nimuhendela khuketsingubo? Henge khwo amatanya komubulimo obwa kakhulanga; sikanyakhananga khumulimo kata okhunaba tsingubo tawe.

²⁹Nebutswa mubool'langa mbu kata omuruchi Solomoni mubukhongo bubwe bwosi siyayebiikhakhwo singa elala khuko tawe.

³⁰Nyasaye niye obiikhanga obulimo tsingubo, obuliho n'nondi ne mukamba bufuubwa m'mul'lo. Sialamubiikha mbwo obulahi okhuyomba ebindu yibi inywe abobusubili obutututu?

³¹“Khe murahenda emioyo chienywe nimuboola, ‘Nakhulie sina?’ nohomba ‘Nakhunywe sina?’ nohomba ‘Nakhwebikhe sina?’

³²Okhuba ebiene yibio biosi Abetsimbia babirunanga. Papa wenywe oli mwikulu wamanya mbu mutakhanga ebindu yibio biosi.

³³Nebutswa murange okhuruna Obwami bwa Nyasaye mbelio nende kosi akobulunji bubwe, naye alamuhelesia ebindu yibio.

³⁴Khulwe yako murahendela akomukamba, okhuba omukamba kulahendela akakwo. Sielitukhu lili nokhuhendela khwalio eliene.