Read lunyore MATAYO 7 Bible Online

MATAYO 7 - lunyore bible

MATAYO 7

¹“Murakhalachila abandi esiina, kho Nyasaye alekhe okhumukhalachila esiina,

²okhuba Nyasaye yakhamukhalachile esiina singa obwa nenywe mukhalachilanga abandi. Ne amalako kamurumikhilanga khubandi niko aka Nyasaye yakharumikhile khwinywe.

³Ne busina ohenganga akhaswaswi akhali mumoni yomwana wenywe, nebutswa norahendela khwo omukul'lo okuli mumoni mumwo omwene?

⁴Kata wakhabool'la mbwena omwana wenywe lekha khuhinie akhaswaswi akhali mumoni yiyo ne lola omukul'lo nikuli mumoniyo omwene?

⁵Omukalama ibe, ranga ohinie omukul'lo okuli mumoni yiyo mbelio, khe nawe wakhalola bulahi okhuhinia akhaswaswi akhali mumoni yomwana wenywe.

⁶“Murahelesia tsimbwa esili esitsienukhu tawe, tsilasukhana butswa ma tsimulume. Murafuuba tsinyuma tsienywe mutsimbitsi tawe, tsilatsisena butswa nebilenje biatsio.

⁷“Sabe mulahebwa, rune mulanyoola; khong'onde mulekulilwa.

⁸Okhuba siomundu osabanga ahebwanga, ne orunanga anyoolanga, naye okhong'ondanga yekulilwanga.

⁹Ni mundu sina khwinywe owomwanawe yakhamusaba obusuma wamuha lichina?

¹⁰Nohomba niyakhamusaba isutse wamuha inzokha?

¹¹Inywe, abali ababi mwamanya okhuha abaana benywe ebihanwa ebilahi. Kho Papa wenywe oli mwikulu sialasilaana muno okhumuhelesia ebindu ebilahi yabo abamusabanga!

¹²“Khol'le abandi akamwenyanga nabo bamukhol'le: Yaka niko aka amalako ka Musa nende amalako kabaroobi kebaalanga.

¹³“Mwinjile okhubir'ra musilibwa esinyelele okhuba esilibwa esiokhwinjila mukhutiba nesibambukhu khandi injila etsitsanga mu Kehena neimbambukhu, ne abenji bachendanga khuyo.

¹⁴Nebutswa esilibwa esitsitsanga mubulamu nesitititi ne injila eyinjilanga mubulamu neindinyu ne abachinyoolanga nibati.

¹⁵“Muchetsihe khubaroobi bobubehi, abetsanga khwinywe nibafwana singa amakondi nebutswa musi bali singa ebibwe ebilulu.

¹⁶Mulibamanyila khubikholwa biabwe. Amahwa sikamanga khwo emisabibu tawe khandi ebisisia sibiamangakhwo amakhuyu tawe.

¹⁷Omusaala omulahi kwamanga ebiamo ebilahi, nebutswa omusaala omubi kwamanga ebiamo ebibi.

¹⁸Omusaala omulahi sikunyala okhwama ebiamo ebibi, nohomba omusaala omubi sikunyala okhwama ebiamo ebilahi tawe.

¹⁹Ne omusaala kwosi okuraama ebiamo ebilahi kuremakungwa nikufuubwa mumul'lo.

²⁰Kho mulimanya abaroobi bobubehi khulwe ebikholwa biabwe.

²¹“Sibali bosi abananganga Omwami, Omwami, abakhenjile mu Bwami bwomwikulu tawe; nibarali yabo abakholanga obulalilo bwa Papa wanje oli mwikulu bonyene.

²²Olwe litukhu liesiina liakhoole abenji balimboolela, ‘Omwami, ifwe khwakamba amang'ana ka Nyasaye muliira lilio, ne muliira lilio, khwahinia ebisieno ebinji nikhukhola akamangalimwa.’

²³Nilwo olwa ndibabool'la habulafu, ‘Sindamumanyakhwo kata hati tawe. Rule khwise inywe abakholi bobubi.’

²⁴“Khe siomundu ohulilanga amang'ana kanje yaka nakakhola, alafwananibwa nomundu omuchesi, owombokha inyumba yiye khulwanda.

²⁵Ifula yakwa, ma emichela nichitsula ne imbumbuyeka nehunguutsa khunyumba yiyo. Nebutswa siyakwa tawe, sichila yombokhwa khulwanda.

²⁶“Ne siomundu ohulilanga amang'ana kanje kano narakakhola tawe, alafwananibwa nomundu omusilu owombokha inyumba yiye khumuyekhe.

²⁷Ifula yakwa, ma emichela nichitsula, imbumbuyeka nehunguutsa khunyumba yiyo, nekwa. Ne okhukwa khwayo khwali okhukali muno.”

²⁸Olwa Yesu yali namal'le okhuboola amang'ana yako abemikanda bachenya khubwibaali bubwe.

²⁹Siyali singa abebaali ba Malako; nebutswa yebaala nobunyali.