Read lunyore MATAYO 8 Bible Online

MATAYO 8 - lunyore bible

MATAYO 8

¹Olwa Yesu yekha okhurula musikulu, emikanda eminji chiamulonda.

²Ne lola omundu mulala owobuchele yetsa khuye namusikamila, namubool'la, “Omwami niwakhayanza onyala okhusiiya.”

³Yesu nanyiila omukhono kukwe, namutilakhwo ma naboola “Nyanzile, osiiyikhe.” Ne nonoho omundu tsana nasiiywa obuchelebwe.

⁴Yesu namubool'la, “Lola orabool'la khwo omundu wosi tawe, nebutswa otsie khumwesaalisi, akhuhengelesie ma khulwa okhumanyia abandu mbu umal'le okhusiyikha, ohaane esihanwa esia Musa yalaka.”

⁵Olwa Yesu yenjila mu Kaperinaumu, etswoni ya Baroma yetsa khuye, namuhomba

⁶namubool'la: “Omwami, omurumikhili wanje ulwal'le. Ukwiye likara ma atsunwa okhusila.”

⁷Yesu namubool'la “Nanzitse okhumuhonia.”

⁸Etswoni namukalusia naboola, “Omwami, singwan'ne ibe okhwinjila munyumba yanje. Laka butswa ling'ana lionyene ne omurumikhili wanje alahona.

⁹Nase ndi omundu oli inyuma wobunyali bwoburuchi, khandi ndi nende abasikari inyuma wanje. Ndakanga mulala, ‘Tsia!’ ne atsia; noundi, ‘Itsa!’ ne yetsa; ne nindaka omusumba wanje, ‘Khola yili!’ nakhola eliatsana.”

¹⁰Olwa Yesu yahulila yaka yachenya, nabool'la abandu abali mbamulondanga, “Siahene mubool'langa, sili okhunyoolakhwo omundu wosi mu Isiraeli, oli nobusubili obukali singa yibu tawe.

¹¹Mubool'langa, Abenji balitsa okhurula ebukwe nende emasaba, balekhale halala nende Aburahamu nende Isaka nende Yakobo, khwisabo mu Bwami bwomwikulu.

¹²Nebutswa abaana abakhakwanile baabe abobwami, balafubwa esioba musiilima esimwamu titit'ti; aha bakhalakaye nibakhwayula ameno kabwe.”

¹³Yesu nabool'la etswoni, “Tsia ingo uwo, ne akosubiye kalakholwa khuibe.” Omurumikhili uwe yahona musaa yene yiyo.

¹⁴Yesu yenjila munyumba ya Petero, ne yaho yalola nyakhusalanyene Petero nakon'ne nalwala omurengo.

¹⁵Yesu namutila omukhonokwe, ne omurengo kwamulekha; nabuukha, ma nachiaka okhubatenda.

¹⁶Olwa kwola mukolooba, abandu bamuler'ra abalwaye abenji abali nebisieno. Yesu yahinia emioyo emibi nende ling'ana nahonia bosi abali nibalwala.

¹⁷Yakhola yaka mbu akomuroobi Isaya yali niyaboola kahesikhe mbu “Ye omwene yabukula obutekhele bwefwe, niyetuukha obulwaye bwefwe.”

¹⁸Olwa Yesu yalola omukanda omukali nikumubotokhan'ne, yalaka abechibe mbu batsie oluchelekha lundi olweinyanza.

¹⁹Ne Omwibaali wamalako yetsa khuye, namubool'la, “Omwibaali, ndakhulonda hosi hosi ahotsitsanga.”

²⁰Yesu namukalusia, “Ebibwe bili namako kabio, ne amanyonyi kokhwikulu kali nebitsu biako, nebutswa Omwana wo Mundu siali nende ahanyala okhuhuluukhila tawe.”

²¹Omundu undi khubechi baabe namubool'la, “Omwami mbuchilil'la mbu nzie okhuyabila Papa wanje mbelio.”

²²Nebutswa Yesu namukalusia, “Nonda; lekha abafu bayabile abafu babwe abene.”

²³Yesu yenjila muliaro, ne abechi baabe batsia halala n'naye.

²⁴Ne lola, imbumbuyeka ingali yachiaka okhuhungutsa khunyanza, ne eliaro niliba mubutinyu bwokhweyinikha musi. Nebutswa Yesu yali nakonanga.

²⁵Abechi nibatsia khuye nibamubusia, nibamubool'la, “Omwami, okhuhonie; khuli ahembi okhutiba.”

²⁶Yesu nababool'la “Busina muli noburi obwinji? Muli abobusubili obuti.” Ma nabuukha, nakondekhela omuyeka nende ebikubuli bieinyanza; kho khwaliho okhulenjela okhukali.

²⁷Siomundu yachenya. Ma nibaboola, “Ni mundu mbwena uno? Kata omuyeka neinyanza bimuhulilanga!”

²⁸Olwa Yesu yali niyol'le injelekha weinyanza musibala sia Gerasi, yabukaana nende abandu babili abali nibarul'le mubilindwa. Abandu yabo bali nende ebisieno ma khandi abahalaba muno, kata omundu wosi naranyala okhubir'ra khunjila iyo tawe.

²⁹Ne lola bahanzukha mbaboola, “Nefwe khuli na sina n'nawe ibe Omwana wa Nyasaye? Witsile yino okhukhusandia amatukhu nikasili okhwola noho?”

³⁰Ne sialiho esiayo sietsimbitsi nisiayanga ahembi khubo.

³¹Ebisieno yibio nibimuhomba Yesu mbiboola, “Noba nokhuhinia, okhurume khutsie musiayo sietsimbitsi.”

³²Ne Yesu nabibool'la, “Tsie.” Nibirula nibitsia nibinjila mutsimbitsi. Esiayo siosi nisiselengera, nisikwa munyanza, ma nisitibila mwo.

³³Abayi besiayo yisio nibelukha, nibatsia mwitaala, nibabool'la abandu amang'ana kosi akali nikekhol'le khubebisieno.

³⁴Kho abandu bosi abomwitaala barula, nibatsia okhwakan'na Yesu; ne olwa bamulola, bamuhomba arule musibala siabwe.