Read lunyore MATAYO 9 Bible Online

MATAYO 9 - lunyore bible

MATAYO 9

¹Yesu yaniina muliaro, niyambukha niyoola mwitaala liabwe.

²Ne lola abandu bamuler'ra omundu owakwa likara, nakoniibwe khusirili sisie. Olwa Yesu yalola obwa bali nobusubili obukali yabool'la owakwa likara, “Mwana wanje lema omwoyo. Tsimbi tsitsio tsilekheywe.”

³Ne abalala khubebaali ba Malako mbaboola mumioyo chiabwe, “Omundu uyu anyekanga Nyasaye.”

⁴Ne Yesu yamanya amapaalo kabwe, nababool'la, “Nisina esichil'le nimukanakana amang'ana amabi mumioyo chienywe?

⁵Okhuba eliangu ne elili hena, okhuboola ‘Tsimbi tsitsio tsilekheywe,’ nohomba okhuboola, ‘Sinjila ochende?’

⁶Nebutswa nase ndamumanyia mbu Omwana wo Mundu ali nobunyali musibala okhulekhela tsimbi.” Kho nabool'la owakwa likara “Sinjila, wetukhe esirili sisio, otsie ingo uwo.”

⁷Kho omundu tsana nasinjila ma natsia ingo uwe.

⁸Olwabandu balola akatsana yako baria, nibetsoomia Nyasaye, ohetsanga abandu obunyali singa yibwo.

⁹Yesu yarula musibala yisio ne olwa yali nabiranga mwo, yalola omusololi wobusuru olangwanga Matayo niyekhaye ahasolol'langa obusuru. Yesu namubool'la “Nonda.” Naye nasinjila namulonda.

¹⁰Olwa Yesu yali niyekhaye munyumba ya Matayo khubiokhulia, abasololi bobusuru abenji nende aboni bandi nibetsa nibekhala halala nende Yesu nabechi baabe khubiokhulia.

¹¹Abafarisayi abalala balola yaka, nibareba abechi baabe, “Busina Omwibaali wenywe aliitsanga halala nabasololi bobusuru nende aboni bandi?”

¹²Yesu yahulila akababoola ma nabakalusia, “Abandu abalamu sibarunanga omulesi tawe, nebutswa yabo abali abalwaye.

¹³Tsie mweke esisina sieling'ana yili mbu: ‘Nzenya tsimbabasi, sinzenya emisango chietsisolo tawe.’ Sindaitsa okhulanga abandu abalunji tawe, nebutswa aboni.”

¹⁴Kho abechi ba Yohana betsa khuye, nibamureeba, “Busina ifwe nende Abafarisayi khuhonganga okhulia nebutswa abechi baabo sibahonganga khwo okhulia tawe?”

¹⁵Yesu nababool'la, “Mukalanga mbu abalangilwe mus'selelo banyala okhubelela olwomusaatsa mwene es'selelo asili n'nabo? Sikakhanyalikha tawe. Nebutswa amatukhu kakhetse olwomusaatsa mwene es'selelo alihiinibwa khubo, ne nilwo olwa balihonga okhulia.

¹⁶“Abulaho omundu onabilanga esilaka esiyia khungubo ikhulu; okhuba esilabi esinabilwe khungubo ikhulu, silameta okhuchirandula.

¹⁷Kata omundu wosi yakhatsukha khwo amalwa amatoro mumitata chiamaselo emikhulu? Okhuba emitata chiakharandukha, ma amalwa nikasundukha hasi. Ngarali amalwa amatoro katsukhwanga mumitata emiyia ne biosi bimenya bulahi.”

¹⁸Nyinga Yesu yali nasiboola yaka, omwami mulala mu Bayahudi yetsa khuye namusikamila, namubool'la, “Omukhaana wanje wakhafwa butswa luno, witse omurekhwo omukhono ma alaba mwoyo.”

¹⁹Yesu narula namulonda halala nende abechi baabe.

²⁰Ne lola, omukhasi undi owali naratsanga munda emihika likhumi na chibili, namulonda inyuma, natila khulusiche lweingubo yiye.

²¹Yaboola mumwoyokwe, “Nimba nindiilakhwo butswa khungubo yiye yonyene, ndakhahona.”

²²Nebutswa Yesu nasukhana namulola, namubool'la mbu “Lema omwoyo omukhaana wanje. Obusubili bubwo bukhuhonisie.” Habwene na habwene, omukhasi tsana nahona.

²³Ma Yesu niyenjila munyumba yomukhulundu. Ne olwa yalola abandu nibakhupanga ebisiliba, nende yabo abali nibakholanga esikhu,

²⁴yababool'la, “Murule esioba mwesi. Omukhaana siafwiye tawe; akonanga butswa tsindoolo,” Nabo nibamutsekhel'la.

²⁵Ne olwa abomukanda bali nibahiinibwe esioba, Yesu yenjila mukari natila omukhono kwomukhaana uyo naye nabuukha.

²⁶Amang'ana yako kalanda musibala yisio siosi.

²⁷Yesu yarula musibala yisio ne olwa yali nabiranga, ababofu babili bamulonda, nibalanjisia nibaboola, “Ibe Omwana wa Daudi, okhubeele tsimbabasi.”

²⁸Nyinga Yesu yenjila munyumba, ababofu yabo betsa aha yali; Yesu nabareeba, “Musubilanga mbu nyala okhumuhonia?” Nibamukalusia, “Yee Omwami.”

²⁹Ma Yesu nabatila khutsimoni tsiabwe, nababool'la, “Kabe khwinywe singa obwa musubiye.”

³⁰Netsimoni tsiabwe tsiekukha. Yesu nabalaka butinyu, naboola “Murabool'la khwo omundu wosi tawe.”

³¹Nabo nibarula nibalandia amang'ana yako musibala yisio siosi.

³²Olwa abandu yabo bali nibatsitsanga abandu nalebe balera khu Yesu omundu owakwa omusilu sichila yali nes'sieno.

³³Olwes'sieno siahinibwa mumundu omusilu tsana, omundu uyo yachiaka okhul'loma ma abandu bosi nibachenya. Ma nibaboola “Khusili okhulolakhwo akafwana mbu mu Isiraeli tawe.”

³⁴Nebutswa Abafarisayi baboola mbu “Ahinianga ebisieno khulwo obunyali bwomukhongo webisieno.”

³⁵Yesu yayeyema mumataala amakali nende amatu kosi. Yebaala mutsisinakoki tsiabwe nakamba Amang'ana Amalahi ako Bwami, nahonia abandu abali nobutekhele bwetsimbila tsiosi nende obulwaye.

³⁶Olwa yalola emikanda, omwoyokwe kwetsulamwo netsimbabasi khubo, sichila bali nesihenda mwoyo, mbasalaana singa amakondi akabula omwayi.

³⁷Ma nabool'la abechi baabe mbu, “Lichesa nelikhongo, ne abakholi bemilimo nabatututu.

³⁸Kho musaaye Omwami welichesa arume abakholi bemilimo mwichesa lilie.”