Read lunyore MARIKO 1 Bible Online

MARIKO 1 - lunyore bible

MARIKO 1

¹Yikhu nikhwo okhuchiaka khwa Mang'ana Amalahi aka Yesu Kristo Omwana wa Nyasaye.

²Kachiaka singa obwo omuroobi Isaya yahandika musitapu sisie. “Nyasaye yaboola, ‘Lola rumanga omurumwa wanje akhuranjil'le; olikhulombela injila yiyo.’

³Omundu nalebe alanjisianga musitsiimi, ‘Mulombele Omwami injila yiye, mulunjisie emihanda chichie.’ ”

⁴Yohana Omubaputisi yalolekha musitsiimi nakambanga mbu abandu barule mutsimbi tsiabwe kho babaputiswe khulwa okhulekhelwa khwetsimbi.

⁵Abandu abenji barula Ebuyahudi nende Yerusalemu nibatsia khuye, nibeyama tsimbi tsiabwe naye nababaputisa mumuchela kwa Yorodani.

⁶Yohana yali niyebikhile ingubo eyalombwa khubwoya bweingamia ne niyeboha olukhoba lweliseelo mus'sienje sisie. Esiokhulia sisie sialinji tsisiche nende obukhi bwom'mutsuru.

⁷Yakambila abandu naboola, “Aliho omundu owitsanga inyuma wanje oli omukufuhalu okhunyomba, kata ise singwan'ne okhwinama okhubohol'la emikoye chiebilaaro bibie tawe.

⁸Ise mubaputisanga m'matsi, nebutswa ye yakhamubaputise mu Mwoyo Omutsienukhu.”

⁹Mumatukhu yako Yesu yetsa okhurula Nasareti, litaala lia Galilaya ne nabaputiswa na Yohana mumuchela kwa Yorodani.

¹⁰Olwa yarula m'maatsi, yalola likulu nilikukha ne Omwoyo singa likhulwi nayela khuye.

¹¹Omwoyo nikurula mwikulu nikuboola, “Ibe niwe omwana wanje owandayanza, owasangal'langa okhusila.”

¹²Ne bwangu Omwoyo namwemel'la okhutsia musitsiimi,

¹³namenyamwo amatukhu amakhumi kane nateemwanga nende Setani. Yamenyanga halala netsinyama tsiomubulimo, ne abamalaika bali nibamurumikhilanga.

¹⁴Olwa Yohana yali nareywe mubuhambe, Yesu yatsia Galilaya, nakamba Amang'ana Amalahi ka Nyasaye naboola

¹⁵“Inyinga yol'le, Obwami bwa Nyasaye buli ahembi, murule mutsimbi tsienywe ma musubile Amang'ana Amalahi.”

¹⁶Olwa Yesu yali nabiranga khuluchinga lweinyanza ya Galilaya, yalola abalubi babili; Simoni nende omwana wabwe Anderea, nibalubanga tsisutse nende amakoko kabwe.

¹⁷Yesu nababool'la, “Munonde, nase namwibaal'le obwokhuluba abandu.”

¹⁸Ne bwangu nibalekha amakoko kabwe, nibamulonda.

¹⁹Yatsia hambeli hati ne nalola Yakobo nende Yohana, abaana ba Sebedayo. Nabo khandi bali nibekhaye muliaro liabwe nibarechekhanga amakoko kabwe.

²⁰Yesu nabalanga bwangu, ne nibalekha samwana wabwe Sebedayo muliaro halala nende abarumikhili, nibamulonda.

²¹Yesu nende abechi baabe boola mwitaala lia Kaperinaumu, ne litukhu liesabato elialondakhwo yenjila musinakoki nachiaka okhwibaala.

²²Abandu bosi abamuhul'la bahuka singa obwa yebaala, sichila siyayibaala singa abebaali babwe Bamalako tawe, nebutswa yebaala singa owali nobunyali.

²³Ne omundu yenjila musinakoki iyo owali nomwoyo kwesifwabwi,

²⁴nahanzukha naboola, “Wenya sina khwifwe, ibe Yesu wa Nasareti? Witsile okhukhwononia noho? Ndakhumanya niwe omurumwa omutsienukhu wa Nyasaye.”

²⁵Yesu yakondekhela omwoyo kwesifwabwi nakubool'la, “Siling'ana, rula m'mundu uyu!”

²⁶Omwoyo kwesifwabwi nikumusambakasia omundu uyo, nikuhanzukha namayoosi amakali, ma nikurula muye.

²⁷Abandu bosi nibachenya, nibarebana, “Kano nimang'ana sina? Buno nobwibaali obuyia noho? Omundu uyu ali nobunyali bwokhulaka emioyo chiebisieno, ne nichimuhul'la.”

²⁸Oluyali lwa Yesu lwalanda bwangu habundu hosi musibala sia Galilaya.

²⁹Yesu halala nabechibe barula musinakoki, batsia munyumba yanga Simoni nende Anderea; ne Yakobo nende Yohana batsia halala n'nabo.

³⁰Nyakhusala Simoni yali nakon'ne, sichila yali nalwala omurengo. Olwa Yesu yenjila munyumba nibamubool'la akobulwaye bubwe.

³¹Yesu niyesunda homulwaye yali nali, namutila omukhono, namubusia. Ne omurengo kwamala nikuhona ma nachiaka okhubatenda.

³²Hamukolooba, olweliuba liali niliyel'le, abandu baler'ra Yesu abalwaye bosi nende abali nebisieno.

³³Abandu bosi obomwitaala yimwo bebunjikha hamuchitsi weinyumba tsana.

³⁴Yesu nahonia abenji abali nende obulwaye tsimbila lukano; nahinia ebisieno ebinji, nebutswa siyabihuchil'la okhuboolakhwo esindu tawe, sichila biali nibiamumanya.

³⁵Omukamba kwalondakhwo, eliuba nilisili okhurula, Yesu yabuukha narula munyumba, natsia habundu ahebisu yenyene okhusaaya.

³⁶Simoni nende abasie nibatsia okhumukhaba.

³⁷Olwa bamulola nibamubool'la, “Abandu bosi bakhukhabanga.”

³⁸Yesu nababool'la, “Chende khutsie mumataala kandi akali ahembi ngambekhwoyo, nisio esiachila ninzitsa.”

³⁹Ma natsia habundu hosi mu Galilaya nakambanga mutsisinakoki tsiabwe ne nahinia ebisieno.

⁴⁰Omundu owali nalwalanga obulwaye bwobuchele yatsia khu Yesu, namusikamila, ma namuhomba, “Noba noyanza, onyala okhusiya.”

⁴¹Yesu namubelel'la, nanyiila omukhono kukwe, namutilakhwo ma naboola, “Nyanzile, osiiyikhe.”

⁴²Ne bwangu obuchele niburula khumundu uyo ma nasiyikha.

⁴³Yesu namubool'la atsie bwangu ne namukaya butinyu,

⁴⁴namubool'la, “Orakhabool'lakhwo omundu akekholekhele tawe. Nebutswa otsie khumwesaalisi akhuhengelesie, ma khulwa okhumanyia abandu mbu umal'le okhusiyikha ohaane esihanwa esia Musa yalaka.”

⁴⁵Nebutswa omundu uyo yatsia nachiaka okhulandia amang'ana yako habundu hosi, nikachila Yesu siyali onyala okhwinjila mwitaala liosi kol'lani tawe, nikamuhachia okhumenya esioba ahebisu. Kata mbwo abandu bamutsiila okhurula tsimbeka tsiosi.