Read lunyore MARIKO 11 Bible Online

MARIKO 11 - lunyore bible

MARIKO 11

¹Olwa Yesu nende abechi be bali ahembi okhwola Yerusalemu boola Betsifage nende Betsania, ahembi Khusikulu sia Miseituni. Yesu yaruma babili khubechi baabe,

²nababool'la, “Mutsie mwitaala el'li imbeli wenywe. Olwa namube nimwinjilangamwo, namunyoole esimoosi siesikhili nisibohelwe, esiomundu wosi asili okhuninakhwo tawe. Musibohol'le musileere.

³Omundu wosi niyakhamureba, ‘Busina mukholanga mbwo?’ M'mubool'le, Omwami asienyanga ne nasikalusie hano bwangu!”

⁴Nibatsia, nibanyoola esimoosi siesikhili nisibohelwe khunjila hasilibwa. Olwabali nibasibohol'langa,

⁵balala khubandu abali nibasinjiye habwene yaho nibabareeba, “Busina mubohol'langa esimoosi siesikhili yisio?”

⁶Abechi nibakalusia singa obwa bali nibabooleywe nende Yesu; nibabalekha batsie n'nasio.

⁷Nibahil'la Yesu esimoosi siesikhili yisio. Nibaala tsingubo tsiabwe khusio ma Yesu niyekhalakhwo.

⁸Abandu abenji nibaala tsingubo tsiabwe khunjila; abandi nibaala tsisaka tsiemisaala etsiabaremaka m'mikunda.

⁹Abandu bosi abemela nende abalondakhwo inyuma nibalanjisia nibaboola, “Hosana. Noweikhabi owitsanga muliira lio Mwami.

¹⁰Nobweikhabi obwami obwitsanga obwa Daudi Papa wefwe. Hosana ikulu mwikulu.”

¹¹Yesu yenjila mwitaala Yerusalemu natsia mu Hekalu, nahengelesia buli sindu nebutswa sichila bwali nibwil'le, natsia Betsania halala nabechi likhumi nababili.

¹²Litukhu lialondakhwo, olwabali nibarulanga Betsania, Yesu yahul'la inzala.

¹³Nalola nasili ehale omukhuyu okwali namasafu amenji. Niyesunda ahembi n'nakwo alole nikali yakhanyoolakhwo litunde. Olwa yola khukwo siyanyoolakhwo litunde liosi tawe, nikarali amasafu konyene, sichila siyali inyinga yokhwama tawe.

¹⁴Yesu yamala nabool'la omukhuyu yikwo, “Abulaho owakhaliekhwo amatunde kako okhurula n'nondi nende khasotso.” Abechi baabe bahul'la amang'ana yako.

¹⁵Olwa bola Yerusalemu, Yesu yenjila mu Hekalu nachiaka okhukhunga abandu abali nibakusianga nende okhukula ebindu mwo. Nafung'amia etsimesa etsieyabo abali nibasilanianga amapesa, nende tsindebe etsieyabo abali nibakusianga amakhulwi.

¹⁶Siyahuchil'la omundu wosi okhubir'ra mu Hekalu nachingile esindu.

¹⁷Ma nabebaal'la, “Kahandikwa ‘Inyumba yanje yakhalangwe inyumba yokhusaaya khulwetsimbia tsiosi.’ Nebutswa inywe mwachikhola oluhangaywa lwabanuli.”

¹⁸Abesaalisi abakhongo nende abebaali ba Malako olwa bakahul'la, bachiaka okhuruna injila yokhumwira. Nebutswa baria sichila omukanda kwabandu kwosi kwachenya khukhwibaala khukhwe.

¹⁹Olwomukolooba kwola Yesu nende abechi baabe barula mwitaala.

²⁰Mukamba tsuli, olwabali nibabiranga, balola omukhuyu kwatsana nikunial'le kwosi okhwola khumisi.

²¹Petero nakwitsusia, nabool'la Yesu, “Omwibaali, lola, omukhuyu kwawalamile kunial'le.”

²²Yesu nababool'la, “Mube nobusubili mu Nyasaye.

²³Siahene mubool'langa, omundu niyakhabool'la esikulu yisi, ‘Simukha wefuube munyanza’ narali nende honzoni m'mwoyo kukwe, nebutswa nasubilanga mbu kosi akaboolanga kakhekhola, ne akhol'lwa akene yako.

²⁴Khulwe esifune isio mubool'langa, olwa musaayanga nimusaba esindu, musubile mbu musinyooye ne namuhebwe.

²⁵Olwa musinjilanga okhusaaya, mulekhele omundu wosi nimuba nimuli neling'ana n'naye, kho Papa wenywe oli mwikulu naye amulekhele okhwona khwenywe. [

²⁶Nebutswa nimuba nimuralekhela abasienywe okhwona khwabwe, Papa wenywe oli mwikulu salamulekhela okhwona khwenywe tawe.]”[12]

²⁷Niboola Yerusalemu khandi: Olwa Yesu yali nachendanga mu Hekalu, abesaalisi abakhongo, abebaali ba Malako nende abakhulundu batsia khu Yesu,

²⁸nibamureeba, “Okholanga yaka mubunyali sina? Niwina owakhuha obunyali bwokhukhola yaka?”

²⁹Nebutswa Yesu nababool'la, “Nase ndamureeba ling'ana elala; nimungalusia nase nemubool'la obunyali bwakhol'langamwo yaka.

³⁰Mbula obunyali bwa Yohana okhubaputisa bwarula khu Nyasaye nohomba khubandu? Mungalusie.”

³¹Nibachiaka okhuhingana abene khubene; “Nikhuboola, ‘Bwarula khu Nyasaye’ yetsa okhureeba, ‘Busina nimurasubila Yohana?’

³²Ne nikhuboola, ‘Bwarula khubandu.’ ” (Baria omukanda kwabandu sichila bosi basubila mbu Yohana yali omuroobi.)

³³Ma nibakalusia Yesu, “Ifwe sikhumanyile tawe.” Yesu naye nababool'la, “Nase simubool'la kholanga yaka nabunyali sina tawe.”