Read lunyore MARIKO 12 Bible Online

MARIKO 12 - lunyore bible

MARIKO 12

¹Yesu yachiaka okhuboola n'nabo mutsingano: “Yaliho omundu owaraka omukunda kwemisabibu, nakwebela olukaka, ma nayabamwo obuko bwokhukhamilamwo tsisabibu, ne niyombokha inyumba yabalindi. Yamala nakulekhela abalimi natsia musibala sindi esiehale.

²Mumatukhu kelichesa yaruma omurumikhiliwe khubalimi yabo amuler're khubiamo biomukunda kukwe.

³Abalimi nibamutila, nibamukhupa, nibamukhunga sila esindu m'makhono.

⁴Naruma khandi omurumikhili undi, naye khandi nibamukhupa tsinguma m'murwe, nibamuchayilisia.

⁵Mwene mukunda khandi naruma omurumikhili undi, omwene uyo abalimi bamwira. Abandi bali okhurumwa balala bakhupwa ne abenji niberwa.

⁶Yasikala nomundu mulala, omwanawe owayali niyayanza okhusila. Olweinyuma yaruma omwene uyo naboola, ‘Nabamuhelesie oluyali sichila no mwana wanje!’

⁷Nebutswa abalimi yabo babool'lana, ‘Uyo niye owakhalamilwe emiandu, chende khumwire, ma obulame bubwe nabube obwefwe.’

⁸Ma nibamufumila, nibamwira, nibamufuba esioba womukunda kwemisabibu.

⁹Kho mwene mukunda alikhola mbwena? Yakhetse okhubamala abalimi yabo ma alahelesie abandi omukunda yikwo okhulinda.

¹⁰Musili okhusomakhwo obwa Amahandiko Amatsienukhu kaboolanga? ‘Lichina eliabombokhi basuula eliene yilio likwiye eliobukhonyi abukali khu nyumba.

¹¹Yili liakholwa nende Omwami mako obwa lili likaasu muno.’ ”

¹²Abesaalisi abakhongo, abebaali ba Malako nende abakhulundu bamanya olukano yilwo lwali khubo. Kho batema okhutila Yesu, nebutswa bamulekha nibatsia sichila baria omukanda.

¹³Kho abalala khu Bafarisayi nende abalondi bomukanda kwa Herode barumwa khu Yesu bamureke mumang'ana kaake.

¹⁴Nibatsia khuye nibamubool'la, “Omwibaali, khwamanya ibe oli omundu watooto, soritsanga omundu wosi tawe. Kata sohenganga obukali bwomundu tawe, nebutswa wibaalanga akatooto ka Nyasaye khubandu. Nomusilo okhurunga obusuru khumuruchi wa Baroma noho? Khurunge nohomba khubule okhurunga?”

¹⁵Nebutswa Yesu yamanya obubatsa bwabwe ma nababool'la, “Busina mundemanga? Manyie efetsa ndole.”

¹⁶Nibamuler'ra efetsa ndala. Nabareeba “Likondo yili nende olwanzilo yilu nebiawina?” Nibamukalusia “Nebiomuruchi wa Baroma.”

¹⁷Ma Yesu nababool'la, “Muhelesie Omuruchi ebio Omuruchi ne muhe Nyasaye ebia Nyasaye.” Nibachenya muno n'naye.

¹⁸Abasadukayi ababoolanga okhusimukukha khwa abafu khubulaho batsia khu Yesu, nibamureeba,

¹⁹“Omwibaali, Musa yakhuhandichila mbu: ‘Omundu niyakhafwa ma alekhe omukhasiwe sila omwana, amwabo we khatimba akabusie omukhasi uyo, yebul'le awabwe abaana.’

²⁰Kho baliho abamwabo bane nabataru. Owokhuranga yaleera omukhasi ne nafwa nasili okhwibula omwana.

²¹Amwabowe wakhabili nakabusia omukhasi tsana, naye khandi nafwa nasili okhwibula omwana, nowakhataru khandi mbwo.

²²Bosi bane nabataru bafwa sila omwana. Olweinyuma omukhasi uyo naye yamala nafwa.

²³Litukhu liokhusimukukha omukhasi uyo yakhabe owa wina, sichila bosi bane nabataru bamutesiakhwo?”

²⁴Yesu nababool'la, “Inywe mukor're, sichila simwamanya Amahandiko Amatsienukhu nohomba obunyali bwa Nyasaye tawe.

²⁵Nyinga abafu bakhasimukukhe sibaliteesia nohomba okhuteesibwa tawe; bakhabe singa abamalaika bomwikulu.

²⁶Nebutswa akokhusimukusibwa khwabafu, musili okhusoma akesitapu sia Musa siboolanga, ‘Ise nise Nyasaye wa Aburahamu, Nyasaye wa Isaka, khandi Nyasaye wa Yakobo.’

²⁷Kho siali Nyasaye wabafwa tawe nebutswa ni Nyasaye owabali mwoyo. Inywe mukor're okhusila!”

²⁸Mulala khubebaali ba Malako yetsa, nahul'la okhuhingana khwabwe. Olwa yalola mbu Yesu ubakalusisie bulahi, niyehinia namureeba, “Mumalako kosi nelili hena likhongo.”

²⁹Yesu namukalusia, “Eliokhuranga ndieli: ‘Hulila Isiraeli; Omwami Nyasaye wefwe niye Omwami yenyene.

³⁰Oyanze Omwami Nyasayewo nomwoyo kukwo kwosi, nobulamu bubwo bwosi, nokhulalila khukhwo khwosi, netsingufu tsitsio tsiosi.’

³¹Ne lilako liakhabili ndieli, ‘Oyanze owasio singa obwa weyanzanga omwene.’ Libulaho lilako lindi el'li likhongo okhuyomba yaka.”

³²Ma omwibaali Wamalako uyo namubool'la, “Bulahi; omwibaali. Ubooye habwene Nyasaye nimulala; ne abulaho oundi narali ye yenyene.

³³Ma okhwola omundu amuyanze nomwoyo kwosi, nokhulalila khwosi, netsingufu tsiosi, nokhuyanza owasie singa obwa yeyanzanga omwene. Yili neliobuha okhusila okhuyomba emilukha nende emisango echisambwanga chiosi.”

³⁴Yesu olwa yalola omundu uyo namukalusisie nobuchesi, yamubool'la, “Ibe soli ehale khu Bwami bwa Nyasaye tawe.” Inyuma weyako abulaho omundu khandi owatsalikha okhumureeba lireebo liosi.

³⁵Olwa Yesu yali niyebaalanga mu Hekalu, yareba, “Busina abebaali ba Malako baboolanga Masihi nes'soni sia Daudi?

³⁶Daudi mwene niyemeleywe nende Omwoyo Omutsienukhu yaboola mbu ‘Omwami yabool'la Omwami wanje: Ikhala khumukhono kwanje omusaatsa, okhwola olwa ndakhare abasuku baabo hasi webilenje bibio.’

³⁷Daudi omwene amulanganga Omwami, kho Masihi yakhaba mbwena es'sonisie?” Omukanda kwabandu kwamuhulila nobusangali.

³⁸Mukhwibaala khukhwe Yesu yaboola, “Mwelinde khubebaali ba Malako abayanza okhuchendachenda nibebikhile etsikanzo tsirambi nibasiesibwa nabandu nende oluyali mubiiro;

³⁹bayanza obwikhalo bweimbeli mutsisinakoki, nende okhubukula obweyangu bwoluyali mumasabo.

⁴⁰Nibeinjisia mutsinyumba tsiabalekhwa nibabanuula emiandu chiabwe nibemanyia khulwo okhusaaya khwabwe okhurambi. Litukhu liokhukhalachilwa bakhanyasibwe okhusila.”

⁴¹Yesu yali niyekhaye ahembi nende lisanduku lielibikhilo, nahenganga singa abomukanda abenji baretsanga efetsa yabwe mwibikhilo lie Hekalu. Abahinda abenji bahinia efetsa inyinji.

⁴²Omukhasi mulala omulekhwa omutakha niyetsaho nahaana orusendi rubili oruhelana nende ling'ondo elala.

⁴³Yesu nalanga abechi baabe nababool'la, “Siahene mubool'langa, omukhasi omulekhwa omutakha uyu uhan'ne okhuyomba abandi bosi abareye efetsa yabwe mwisanduku lielibikhilo.

⁴⁴Okhuba bosi bahan'nenge okhurula khubuhinda bwemiandu chiabwe, omukhasi uyu, kata nali omutakha, uhan'ne biosi ebiayali n'nabio, uhan'ne biosi ebiokhumenyela.”