Read lunyore MARIKO 14 Bible Online

MARIKO 14 - lunyore bible

MARIKO 14

¹Kali nikasili amatukhu kabili okhwola khwisabo lie Pasaka nende elio Mukaati okuralimwo amamela; abesaalisi abakhongo nende abebaali ba Malako bali nibakhabanga injila yokhufumil'la mwo Yesu masilisi ma bamwire.

²Nebutswa baboola, “Khurakhamutila mumatukhu kelisabo tawe, abandu bakhakhola indiri.”

³Olwa Yesu yali nali Betsania munyumba ya Simoni omuchele, niyekhaye nalitsanga, omukhasi yetsa khuye nali nende echupa yamafura akahunyanga esuswa indahi akobukusi obutinyu, niyaraka echupa, natsukhil'la amafura yako khumurwe kwa Yesu.

⁴Balala khubandu abaliho basinyikha nibaboola, “Nibuha sina okhwononia amafura singa yaka?

⁵Kakhakusibubwe etsidinari[13] okhuyomba etsimia tsitaru ma tsilakabul'lwa abatakha.” Nibamufukula butinyu.

⁶Nebutswa Yesu yababool'la, “M'mulekhe! Mumunyasianga busina? Ukholeye omulimo omulahi.

⁷Abatakha muli n'nabo amatukhu kosi, munyala okhubakhonya munyinga tsiosi tsiamwenyele. Nebutswa ise sinambetsenge n'nenywe tsinyinga tsiosi tawe.

⁸Ye ukhol'le akanyala; ubakhile omubili kwanje amafura okhukurechekha khulwo okhuyabilwa.

⁹Mubool'langa tooto mbu hosi musibala aha Amang'ana Amalahi kakhakambwe, akomukhasi uno akhol'le kakhaboolwe khulwo okhumwitsul'la.”

¹⁰Yudasi Isikariote, mulala khubali abechi likhumi nababili, yatsia khubesaalisi abakhongo khulwo okhusiemana Yesu.

¹¹Abesaalisi abakhongo olwa bahul'la amang'ana yako basangala, nibamulaka okhumuha amapesa. Yudasi nachiaka okhuruna injila yokhumusiemana.

¹²Litukhu liokhuranga lie Lisabo lio Mukati okuralimwo amamela, litukhu liesimeme sielikondi sie Pasaka okhwirwa, abechi baabe bamureba, “Wenyanga khukhulombele hena okhulia khwelisabo lie Pasaka?”

¹³Yesu yamala naruma babili khubechi baabe nababool'la, “Mutsie mwitaala ne namubukane nomusaatsa nalebe nachingile isongo yamaatsi. Nam'mulonde,

¹⁴okhwola munyumba mwanayenjile, ma namubool'le mwene nyumba, ‘Omwibaali aboolanga, sili hena esikoti sianje siabacheni, omwandiila Lisabo lie Pasaka halala nabechi banje?’

¹⁵Naye omwene namumanyie inyumba ingali yekorofa, niyal'lwe niyerechekhele. Mulombele omwene yimwo.”

¹⁶Abechi baabe batsia mwitaala, nibanyoola ebindu biosi singa obwa Yesu yali nababooleye; ma nibalomba Lisabo lie Pasaka.

¹⁷Olwomukolooba kwola, Yesu yetsa nende abechibe likhumi nababili.

¹⁸Olwa bali nibekhaye khubiokhulia, Yesu naboola, “Mubool'langa tooto mbu mulala khwinywe olitsanga n'nase, nayasiemane.”

¹⁹Abechi nibabelela nibachiaka okhumureeba simulala, “Khali nise noho?”

²⁰Yesu nababool'la, “Nimulala khwinywe abechi likhumi nababili; otonjelanga n'nase mulutaabo l'lala.

²¹Omwana wo Mundu nafwe, singa obwa Amahandiko Amatsienukhu kaboolanga khuye, nebutswa alitsiboolelwa omundu uyo olisiemana Omwana wo Mundu! Bwakhabeye obulahi khumundu uyo alabula okhwibulwa!”

²²Olwa bali nibalitsanga, Yesu yabukula omukaati, nakulaamila ikhabi, nakumekania, ma nahelesia abechi baabe naboola, “Bukule, yiku nomubili kwanje.”

²³Khandi nabukula es'sanda, naboola embwo khu Nyasaye, ma nabaha; ne bosi nibanywela khus'sanda yisio.

²⁴Nababool'la, “Yaka namatsahi kanje akeindakano, akaratsa khulwabandu abenji.

²⁵Siahene mubool'langa, sindakhanywekhwo khandi ewaini yemisabibu tawe okhwola litukhu yilio olwa ndakhanywe ewaini imbia mu Bwami bwa Nyasaye.”

²⁶Ma nibemba olwembo, nibarula, nibatsia Khusikulu sia Miseituni.

²⁷Yesu yabool'la abechi baabe, “Inywe mwesi namunzilukhe, sichila Amahandiko Amatsienukhu kaboolanga, ‘Ndakhere omwayi ne amakondi kosi kakhasalaane.’

²⁸Nebutswa nimal'le okhusimukukha ndakhamwemel'le okhutsia Galilaya.”

²⁹Petero namubool'la, “Kata nikali abandi bosi nabakhwilukhe, ise sinakhwilukhe tawe.”

³⁰Yesu namubool'la, “Siahene khubool'langa, obutukhu bwalelo etaywa nesili okhulakula khabili, naundeyambakhane esiakhataru.”

³¹Nebutswa Petero nameeta okhuboola obutinyu, “Kata nikali okhwola khufwe n'nawe, sinakhulekhe tawe.” Abechi bosi nibabola singa mbwo.

³²Niboola habundu halangwa Getsesemani. Yesu nabool'la abechi baabe, “Mwikhale hano olwamba nisaaya.”

³³Nabukula Petero, Yakobo nende Yohana nabahila sibeka, nachiaka okhuhumania okhusila nende okhunyakhana mumakani.

³⁴Nababool'la, “Omwoyo kwanje kuli nesibeela esinji, esinyala kata okhunzira. Mwikhale yaha muliinde.”

³⁵Niyesunda hambeli hati, niyelumba hasi, nasaya mbu nikakhanyalikha ebise biamanyakhano bibire khuye.

³⁶Naboola, “Papa wanje, khuibe kosi kanyalikha. Hinia es'sanda sieminyakhano yisi khwise. Nebutswa karakhaba obweise nyenya tawe, nikarali kabe singa obweibe wenyanga.”

³⁷Ma nakalukha khubechi baabe bataru, nanyoola nibakonanga tsindoolo, nabool'la Petero, “Simoni, okonanga? Siwali onyala okhulinda kata esaa ndala tawe?”

³⁸Ma nababool'la, “Muliinde nimusaaya mubule okhwinjila mukhutemwa. Omwoyo kuyanzile, nebutswa om'bili nomutofu.”

³⁹Natsia okhusaaya khandi, nakalukhilanga amatelwa tsana.

⁴⁰Nakalukha khandi, nanyoola bakon'ne. Tsimoni tsiabwe tsiali nitsisimbile khulwe tsindoolo.

⁴¹Olwa yakalukha khubo olwakhataru yababool'la “Musikona tsindoolo nimuhuluukha? Luno kahel'le! Esaa yol'le! Omwana wo Mundu alarebwa mumakhono kabetsimbi.

⁴²Bukhe, khutsie. Lole omusiemani wanje ali ahembi.”

⁴³Olwa Yesu yali nasiboola, Yudasi, owali mulala khubechibe likhumi nababili niyoola halala nende omukanda kwabandu okwali nende tsimbanga nende tsindabusi. Abandu yabo bali nibarumilwe nende abesaalisi abakhongo, abebaali ba Malako nende abakhulundu.

⁴⁴Omusiemani Yudasi yali nabasimile ma nababooleye, “Owananzunzune niye, mumutile, mumuhile bulahi.”

⁴⁵Olwa Yudasi yoola, yatsia ahembi nende Yesu, namubool'la “Omwibaali.” Ma namutsunzuna.

⁴⁶Aba yali n'nabo nibafumila Yesu, nibamura mubuhambe.

⁴⁷Mulala khubali nibasinjiyeho yatsomola olukanga lulwe, naremaka omurumikhili wo Mwesaalisi Omukhongo, namukhalaka esirwi.

⁴⁸Yesu nababool'la, “Mwitsile nende tsimbanga netsindabusi okhundila singa omunuuli?

⁴⁹Sielitukhu ndalinji n'nenywe mu Hekalu ninzibaalanga ne simwaifumila tawe. Nebutswa luno okhwola Amahandiko Amatsienukhu kahesibwe.”

⁵⁰Abechi baabe bosi bamala nibamulekha nibelukha.

⁵¹Omusiani mulala yalonda Yesu niyeyabaye ingubo yekatani. Ne bateema okhumufumila.

⁵²Nebutswa yarimukha, nalekha ingubo yekatani, niyelukha esiekenye.

⁵³Bahila Yesu khu Mwesaalisi Omukhongo aha besaalisi abakhongo bosi, abakhulundu nende abebaali ba Malako bali nibebunjikhile.

⁵⁴Petero yamulondanga ehale niyenjila mulukala lwo Mwesaalisi Omukhongo, niyekhala nende abasikari niboranga omul'lo.

⁵⁵Abesaalisi abakhongo nende bosi abali musiina baruna obukobokheli bwokhusitaka Yesu khe babe abanyala okhumwira, nebutswa sibanyoola tawe.

⁵⁶Abandu abenji bahinia obukobokheli bwobubehi, nebutswa obukobokheli bwabwe sibwafwanana tawe.

⁵⁷Kata abalala basinjila nibakobokhela ob'behi buno khu Yesu;

⁵⁸“Khwahul'la naboola, ‘Nasambule Ehekalu yiyi eyombokhwa namakhono, ne mumatukhu kataru ndakhombokhe eyindi erayombokhwa namakhono.’ ”

⁵⁹Khandi kata mbwo obukobokheli bwabwe sibwahuchilisania tawe.

⁶⁰Omwesaalisi Omukhongo yasinjila hakari wabwe nareeba Yesu, “Solikhwo nende likalusio liosi tawe? Abandu yaba bakhuyal'langa siina?”

⁶¹Nebutswa Yesu yasiling'ana butswa, siyakalusia ling'ana liosi tawe. Omwesaalisi Omukhongo namureeba khandi, “Ibe niwe Masihi, Omwana wa Nyasaye oweikhabi?”

⁶²Yesu nakalusia, “Yee, ise nise ye. Khandi namulole Omwana wo Mundu niyekhaye khumukhono musatsa kwa Nyasaye Owobunyali, niyetsanga mumalumbesi komwikulu!”

⁶³Omwesaalisi Omukhongo yamala narandula tsingubo tsitsie mwirima ma naboola, “Sikhwenya khandi abakobokheli bandi tawe.

⁶⁴Muhuliye okhunyeka khukhwe. Mulolanga mbwena?” Bosi bamukhalachila esiina nibaboola mbu akwan'ne okhwirwa.

⁶⁵Abalala nibachiaka okhumufutsila amare, nibamufunikha tsimoni nibamwala tsimbi nibamubool'la, “Roobakhwo niwina okhukhupachile.” Abasikari bamubukula nibamwala tsimbi nabo.

⁶⁶Olwa Petero yali nasili hasi mumukitsi, omukhaana mulala khubarumikhi bo Mwesaalisi Omukhongo yetsaho.

⁶⁷Olwa yalola Petero niyoranga omul'lo yamuhenga, namubool'la, “Ibe khandi wali nende Yesu wa Nasareti.”

⁶⁸Nebutswa Petero yambakhana naboola, “Simumanyile tawe kata simbul'langa akoboolanga tawe.” Ma Petero narula esioba khulusimbo, ne etaywa nelakula.

⁶⁹Omukhaana uyo olwa yalola Petero khandi nachiaka okhubool'la abandu abali nibasinjiyeho. “Omundu uyu ni mulala khubo!”

⁷⁰Nebutswa Petero yambakhana khandi. Hatututukhwo abali nibasinjiyeho nibabool'la Petero, “Okhwola ibe obe mulala khubo, sichila oli Omugalilaya.”

⁷¹Nebutswa Petero yachiaka okhwelaama nende okhwesuha naboola, “Ise simanyile omundu owamuboolanga uyu tawe.”

⁷²Ne bwangu etaywa yalakula olwakhabili. Ne Petero yamala niyetsul'la aka Yesu yamubool'la, “Etaywa nesili okhulakula khabili, naundeyambakhane esiakhataru.” Ma narulikha mukhulakaya.