Read lunyore MARIKO 15 Bible Online

MARIKO 15 - lunyore bible

MARIKO 15

¹Olwa bwasia, mukamba tsur'ri abesaalisi abakhongo nende abakhulundu nende abebaali ba Malako nende abesiina bosi balomba omuse nibaboha Yesu, nibamuhila nibamuhana khu Pilato.

²Pilato nareeba Yesu, “Ibe niwe Omwami wa Bayahudi?” Yesu nakalusia, “Kho ubooye.”

³Abesaalisi abakhongo nibamusitaka namang'ana amenji.

⁴Pilato namureeba “Siokalusianga ling'ana liosi tawe? Lola singa bakhusitakanga namang'ana amenji.”

⁵Nebutswa Yesu siyakalusiakhwo ling'ana kata elala tawe, kata Pilato yahuka okhusila.

⁶Sielitukhu lie Lisabo lie Pasaka, Pilato yali niyanala okhubohol'la mulala khubahambe owabandu bamureba.

⁷Olwene yilwo yaliho omundu owalangwa Barabba yali nali mububohe halala nende abandi abeindiri abali nibakhola obwiri mundiri yabwe.

⁸Abomukanda abenji batsia khu Pilato nibamureeba abohol'le mulala singa obwa yali niyanala okhubakhol'la.

⁹Pilato nabareeba, “Mwenyanga muboholol'le Omwami wa Bayahudi?”

¹⁰Yaboola mbwo sichila yamanya mbu abesaalisi abakhongo bahila Yesu khuye khulwo khusiendekha.

¹¹Nebutswa abesaalisi abakhongo batsuuba omukanda barebe Pilato ababoholol'le Barabba.

¹²Pilato nabareeba khandi, “Kho mwenyanga khol'le sina omundu uyu owamulanganga Omwami wa Bayahudi?”

¹³Abandu bosi nibakhupa esikhu nibaboola, “Omubambe!”

¹⁴Nebutswa Pilato nabareeba “Busina? Akhol'le amabi sina?” Nebutswa bakhupa liyoka likali nibaboola “Mubambe.”

¹⁵Pilato yaruna okhuyanzisia abomukanda, ma nabohol'la Barabba ne nalaka Yesu atiabwe tsikhoba ma namuhana mbu abambwe.

¹⁶Abasikari nibahila Yesu mulukala lwehango homuruchi, nibabunjelesia omukanda kwosi okwa basikari.

¹⁷Nibamubiikha ingubo isembe, nibafumba ingara yamahwa nibara khumurwe kukwe.

¹⁸Ma nibachiaka okhumusiesia, “Mulembe Omwami wa Bayahudi!”

¹⁹Nibamukhupaka khumurwe nende olusaala, nibamufutsila amare, nibamusikamila nibamwekayakaya.

²⁰Olwa bali nibamal'le okhumutsekhel'la, nibamubiikha tsingubo tsitsie omwene. Ma nibamuhila esioba okhumubamba.

²¹Olwabali khunjila nibatsitsanga, bakaana nomundu mulala owalangwa Simoni okhurula Ebukurene. Yali nali khuluchendo natsitsanga mwitookho likali, ne abasikari nibamuhachia okhuchinga omusalapa kwa Yesu. (Simoni uyu niye owali samwana Alekisanda nende Rufusi).

²²Bahila Yesu habundu halangwanga Gologotsa, eliboolanga “Habundu wesihanga.”

²³Nibamuhelesia ewaini netsokanibwe mwo manemane, nebutswa Yesu yasula okhutsinywa.

²⁴Ma nibamubamba ne nibakabana tsingubo tsitsie, nibatsikhupila imbulu okhubisia eyomundu abukulakhwo.

²⁵Tsiali etsisaa tsitaru tsia mukamba olwa bamubamba.

²⁶Ne olwanzilo lwokhusitakwakhwe lwahandikwa hekulu mbu: “Omwami wa Bayahudi.”

²⁷Khandi babamba abanuli babili halala nende Yesu, mulala khumukhonokwe omusaatsa ne oundi khumukhonokwe omukhasi. [

²⁸Mbwo akahandikwa mu Mahandiko Amatsienukhu kahesikha akaboolanga “Yabalwa halala nende abakholi bobubi.”][14]

²⁹Abandu ababir'rangaho basungusa emirwe chiabwe nibanyeka Yesu nibaboola, “Haa! Niwe osambulanga Ehekalu ma otsiombokha m'matukhu kataru.

³⁰Bulano okhesoole, wikhe okhurula khumusalapa.”

³¹Khandi abesaalisi abakhongo nende abebaali ba Malako bamukokonyela nibaboola, “Yahonianga abandi, ne sanyala okhwehonia omwene tawe.

³²Khulole Kristo, Omwami wa Isiraeli niyekha okhurula khumusalapa, ne nakhumusubile!” Ne abandu babili aba Yesu yabambwa n'nabo khandi bamunyeka.

³³Olwa tsiola etsisaa tsisasaba etsia m'mbasu esibala siosi siamwama okhwola etsisaa tsirano natsine.

³⁴Ne olwesaa yakharano nakhane yoola, Yesu yahanzuukha nomwoyo omukali naboola, “Eloi, Eloi, lama sabakitsani?” eliboolanga, “Nyasaye wanje, Nyasaye wanje, undekhele busina?”

³⁵Abalala khubandu abali nibasinjiyeho olwa bahul'la yaka bamala nibaboola, “Hul'le, alanganga Elija.”

³⁶Mulala khubo yelukha tsimbilo, niyetsusia amaatsi amalulu mungofuma, nara khulusaala, namuha anywe, naboola, “Lekha khulole Elija naba niyetsa okhumwisia okhurula khumusalapa.”

³⁷Yesu yahanzuukha nomwoyo omukali, ma nafwa.

³⁸Ingubo eyasinganga mu Hekalu yarandukha ebitonye b'bili okhurula ikulu okhwola hasi.

³⁹Etswoni wabasikari bamahe owali nasinjiye imbeli womusalapa olwa yalola obwa Yesu yahanzuukha ma nafwa, yaboola, “Siahene omundu uyu yali Omwana wa Nyasaye!”

⁴⁰Baliho abakhasi bandi abahengelanga ehale. Mubene yabo balimwo Mariamu Magadalena, Mariamu nyina Yakobo omutu nende Yosefu, ma nende Salome.

⁴¹Bali nibalondele Yesu olwa yali Galilaya nibamurumikhila. Baliho abakhasi bandi abenji abetsa Yerusalemu halala n'naye.

⁴²Nyinga mukolooba kwola, sichila liali litukhu liokhulomba lisabo, eliokhuranjil'la Esabato,

⁴³Yosefu wa Arimatsia omundu woluyali khubesiina, owali nalindil'langa Obwami bwa Nyasaye yarul'lamwo. Natsia khu Pilato sila oburi, nasaba omubili kwa Yesu.

⁴⁴Pilato yachenya okhuhul'la mbu Yesu umal'le okhufwa. Kho yamala nalanga etswoni wabasikari namureeba nikali afwiye khale.

⁴⁵Namal'le okhumanya bulahi okhurula khutswoni wabasikari, yahelesia Yosefu omubili kwomufu.

⁴⁶Yosefu yakula ingubo yekatani niyesia omubili hasi, nakuboha neingubo yekatani, nakura musilindwa esiayabwa mulwanda; ma nakongomia lichina likali nara m'muliango kwesilindwa.

⁴⁷Ne Mariamu Magadalena nende Mariamu nyina Yosefu balola aha Yesu yayabibwa.