Read lunyore MARIKO 3 Bible Online

MARIKO 3 - lunyore bible

MARIKO 3

¹Yesu yenjila khandi musinakoki, ne yalimwo omundu owomukhono kwali nikwanyela.

²Habwene yaho abandu baliho abarunanga esia bamusitakilakhwo, khe nibamuhenga balole naba nahonia omundu uyo mwitukhu lie Sabato.

³Yesu nabool'la omundu owomukhono kwali nikwanyela, “Yitsa hambeli hano.”

⁴Ma nabareeba, “Kahuchil'lwanga okhukholanga amalahi mwitukhu lie Sabato nohomba amabi; okhuhonia obulamu nohomba okhwira?” Nebutswa sibakalusiakhwo ling'ana liosi tawe.

⁵Ma Yesu nabahenga bosi nelileko, nabeelela sichila emirwe chiabwe chiali nichioma singa lichina. Ma nabool'la omundu uyo, “Nyila omukhono kukwo!” Ma nanyiila omukhonokwe, nikuhona.

⁶Abafarisayi barula bwangu esioba, halala nende abandu bomukanda kwa Herode nibaloosia singa obwa banyala okhumwira.

⁷Yesu yarulaho halala nende abechi baabe, natsia khuluchinga lweinyanza ya Galilaya, ne omukanda omukali kwamulonda. Betsa okhurula Galilaya nende okhurula Ebuyahudi

⁸nende Yerusalemu, Idumea nende khuluchelekha lwomuchela kwa Yorodani, ma nende okhurula mumbeka tsia Turo nende Sidoni. Abandu yabo bosi betsa khu Yesu sichila bali nibahul'la ebindu ebinji ebiayakhola.

⁹Yesu nabool'la abechi baabe bamurechekhele eliaro, khase omukanda kwakhamumiina.

¹⁰Yali nahonisie abandu abenji, ma abalwaye bosi bali nibemin'nanga khuye bamutilekhwo.

¹¹Olwabandu abali nende emioyo chiesifwabwi bamulola, belumba hasi imbeliwe, nibahanzukha, “Ibe niwe Omwana wa Nyasaye.”

¹²Nebutswa Yesu yabakaya butinyu balekhe okhumubuula khubandu.

¹³Yesu yaniina musikulu, nalanga abandu abayali niyenyele omwene. Nibatsia khuye,

¹⁴ma niyela likhumi nababili nabalanga “abarumwa”, babe halala n'naye, khandi abarume okhutsia okhukamba

¹⁵ne babe nobunyali bwokhuhinia ebisieno.

¹⁶Likhumi nababili abali okhwelwa mbabano: Simoni (owa Yesu yakulikha Petero),

¹⁷Yakobo nende Yohana, abaana ba Sebedayo (Yesu yabakulikha Boanerige, eliboolanga abaana beikhupa),

¹⁸Anderea nende Filipu, Batsolomayo, Matayo, Tomasi, Yakobo wa Alufayo, Tadayo, Simoni omukanaani[1] nende

¹⁹Yudasi Isikariote, owamala nasiemana Yesu.

²⁰Ma Yesu natsia ingo. Omukanda kwabandu khandi nikwebunjikha, kata Yesu nende abechi baabe sibaali abanyala okhulia tawe.

²¹Olwabandu baabe bahul'la mbwo batsia okhumubukula sichila abandu bali nibaboolanga ulalukhile.

²²Ne abebaali ba Malako abali nibarul'le Yerusalemu nibaboola, “Ali nende Belisebuli khandi ahinianga ebisieno khulwobunyali bwomukhongo webisieno.”

²³Yesu nabalanga, nababool'la mutsingano, “Setani yakhanyala mbwena okhuhinia Setani?

²⁴Obwami nibwakhakabukhana mumikanda, nichilwana obwami yibwo sibunyala okhusinjila tawe

²⁵ne inyumba niyakhakabukhana mumikanda echiyingananga, inyumba tsana yakhatiba.

²⁶Ne nikakhaba obwami bwa Setani bwakhakabukhana mumikanda sibunyala okhusinjila tawe nebutswa bwakhatiba tibo.

²⁷“Abulaho omundu onyala okhwinjila munyumba yomundu wetsingufu ma ayaake emiandu chichie nararangile okhumuboha omundu wetsingufu uyo; khe abe onyala okhuyaaka emiandu chichie.

²⁸Siahene mubool'langa abandu bakhalekhelwe tsimbi tsiabwe nende amanyeko kosi akabakhaboola khu Nyasaye.

²⁹Nebutswa owakhanyeka Omwoyo Omutsienukhu siyakhalekhelwe tawe, nebutswa aliba nobubi obweinziayo.”

³⁰Yesu yaboola mbwo sichila bali nibaboolanga, “Ali nomwoyo kwesifwabwi.”

³¹Nyina Yesu nende abaana babwe boola hayali nali, nibasinjila esioba, nibarumana alangwe.

³²Omukanda kwabandu kwali nikwikhaye nikumufumbiye. Kho nibamubool'la “Mamawo nende abaana benywe bali esioba bakhurunanga.”

³³Yesu nababool'la, “Mama wanje nende abaana befwe nibena?”

³⁴Nahenga abali nibekhaye nibamufumbiye, naboola, “Lole, yaba nibo mama wanje nende abaana befwe.

³⁵Omundu wosi okholanga akobulaliho bwa Nyasaye niye awefwe, mbotswa nende mama wanje.”