Read lunyore MARIKO 5 Bible Online

MARIKO 5 - lunyore bible

MARIKO 5

¹Yesu nende abechi baabe boola khuluchelekha lundi olweinyanza ya Galilaya musibala sia Gerasi.

²Olwa Yesu yarula muliaro, yabukana nende omundu owarula mubilindwa. Omundu uyo yali nomwoyo kwesifwabwi muye,

³ne yamenyanga mubilindwa. Abulaho omundu owakhamubohele neminyol'lo.

⁴Yali niyabohwa esiakhenji nende ebisambo neminyol'lo, nebutswa buli lwosi yakatulanga eminyol'lo ne natonyania ebisambo. Abulaho omundu owali netsingufu tsiokhumwikal'la.

⁵Obutukhu nom'basu yalinji mubilindwa nende mubikulu nahanzukhanga ne niyekhalaka namachina.

⁶Olwa yalola Yesu nasilikhwo ehale, yelukha tsimbilo natsia khuye, namusikamila,

⁷nahanzukha nomwoyo omukali naboola, “Ibe Yesu, Omwana wa Nyasaye weikulu okhusila, oli nasina n'nase? Khusaayanga muliira lia Nyasaye, oranyasia tawe.”

⁸Yaboola mbwo sichila Yesu yali namubooleye, “Omwoyo kwesifwabwi, orule mumundu uyu”.

⁹Ma Yesu namureeba, “Eliira lilio niwina?” Naye namukalusia, “Eliira lianje ni Ligioni, sichila khuli abenji.”

¹⁰Ma nasaaya Yesu alekhe okhuruma emioyo chiesifwabwi okhurula musibala yisio.

¹¹Esiayo esikali sietsimbitsi siali nisiayanga hasikulu.

¹²Emioyo chiesifwabwi yichio nichimusaaya nichiboola, “Okhurume khutsie khwinjile mutsimbitsi.”

¹³Naye nachihuchil'la. Ma emioyo chiesifwabwi yichio nichirula, nichinjila mutsimbitsi. Ne esiayo siosi esietsimbitsi etsihela etsielefu tsibili nisiselengera nisitsia okhukwa munyanza, nisieyinikha m'matsi.

¹⁴Abaayi betsimbitsi yitsio belukha, nibalandia amang'ana yako mumataala nende mumichitsi. Abandu nibatsia okhulola akali nikekholekhele.

¹⁵Nibatsia khu Yesu, nibalola omundu walinji nemioyo chiesifwabwi niyekhaye, niyebikhile tsingubo ne nakungumile, ma nibaria.

¹⁶Abandu abakalola nikekholekhanga benoosia abandi akali nikekholekhele khu uyo owali nemioyo chiebisieno nende akekholekha khutsimbitsi.

¹⁷Nibachiaka okhumuhombelesia Yesu arule musibala siabwe.

¹⁸Olwa Yesu yali naninanga muliaro, omundu owalinji nomwoyo kwesifwabwi yamuhomba batsie n'naye.

¹⁹Nebutswa Yesu yamukaya namubool'la, “Tsia ingo wenywe, khubandu benywe, obabool'le amang'ana kosi ako Mwami akhukholeye, nende singa obwa akhubeeleye tsimbabasi.”

²⁰Ma omundu uyo natsia ma nachiaka okhulandia mu Dekapoli[2] amang'ana kosi aka Yesu yali namukholeye; abandu bosi nibachenya.

²¹Yesu yambukha khandi natsia khuluchelekha lundi lweinyanza nali muliaro. Omukanda omukali kwebunjikha khuye, ne yali nasinjiye khuluchinga lweinyanza.

²²Mulala khubemeli besinakoki, owalangwa Jairo yetsa khuye. Olwa yalola Yesu, yakwa hasi habilenjebie,

²³namuhomba naboola, “Omukhaana wanje nomulwaye ali ahembi okhufwa. Yanza witse omurekhwo emikhono chichio, atoole okhuhona ma abe omulamu.”

²⁴Kho Yesu narula halala n'naye. Abandu abenji okhusila nibamulonda, nibebunjikha khuye tsimbeka tsiosi.

²⁵Yaliho omukhasi mulala owali naratsanga amatsahi emihika likhumi nachibili.

²⁶Omukhasi uyo yali niyanyasibwa okhusila nende abalesi abenji. Yali niyamala etsilupia tsitsie tsiosi nebutswa siyahona tawe. Okhuratsa khwametekhanga butswa.

²⁷Yali niyahul'la oluyali lwa Yesu, ma niyenjila m'mukanda kwabandu okhurula inyuma, natila khulusiche olweingubo ya Yesu.

²⁸Yakhola mbwo sichila yebool'la m'mwoyokwe, “Nimba nindila khungubo yiye yonyene, nembona.”

²⁹Olwa yatila khulusiche lweingubo ya Yesu, okhuratsakhwe nikhukhalisia, namanya m'mubili kukwe mbu uhon'ne obulwaye bubwe.

³⁰Yesu yamanya bwangu mbu tsingufu tsirul'le muye. Ma nasukhana bwangu khumukanda kwabandu, nareeba, “Niwina otil'le khungubo yanje?”

³¹Abechi baabe nibamukalusia, “Ololanga obwomukanda kwebunjikhile khuibe, busina orebanga okhutil'lekhwo?”

³²Nebutswa Yesu yatsilil'la okhuhenga tsimbeka tsiosi amulole owali nakhol'le ling'ana yilio.

³³Omukhasi uyo yamanya akali nikekhol'le khuye, ma niyetsa natechelanga khulwoburi, niyelumba hasi imbeli wa Yesu, namubool'la obwatooto bwosi.

³⁴Yesu namubool'la, “Omukhaana wanje, obusubili bubwo bukhuhonisie. Otsie nomulembe, ohone obulwaye bubwo.”

³⁵Olwa Yesu yali nasil'loma, abandu betsa okhurula ingo wa Jairo, nibamubool'la “Omukhaanawo umal'le okhufwa. Busina onyasie Omwibaali khandi?”

³⁶Nebutswa Yesu yalechelesia akabali nibabooye ma nabool'la Jairo, “Oraria tawe, osubile butswa.”

³⁷Siyahuchil'la omundu wosi okhumulonda tawe, nibarali Petero, Yakobo nende amwabowe Yohana.

³⁸Olwa boola hango ha Jairo, Yesu yahul'la esikhu, okhwekhuula nende okhulakaya okhwinji.

³⁹Niyenjila munyumba, nababool'la, “Nisina esichilanga nimwekhuula nende okhulakaya? Omwana siafwiye tawe, akonanga tsindoolo.”

⁴⁰Nebutswa nabo nibamutsekhel'la. Ma nabahinia bosi esioba, nabukula samwana omwana nende nyina halala nende abechi baabe, nibenjila musikoti siomwana yali nalimwo.

⁴¹Namufumila omukhono, namubool'la, “Talitha kumi.” akaboolanga, “Omukhaana, khubool'langa buukha.”

⁴²Ne bwangu omukhaana nabukha, nachiaka okhuchenda. (Yali nemihika likhumi nachibili). Abandu nibachenya okhusila.

⁴³Yesu nabakaya okhusila mbu balekhe okhubool'lakhwo omundu wosi. Ma nababool'la bahelesie omukhaana uyo esiokhulia.