Read lunyore MARIKO 6 Bible Online

MARIKO 6 - lunyore bible

MARIKO 6

¹Yesu yarula habwene yaho natsia musibala siabwe, abechi baabe nibamulonda.

²Litukhu lie Sabato olwa liola, yachiaka okhwibaala musinakoki.[3] Abenji abamuhul'la bachenya, nibaboola, “Yanyoola hena amang'ana yaka kosi? Nibuchesi sina obwa yahebwa yibu? Khandi akholanga mbwena akamangalimwa yaka?

³Sali niye omubaatsi wetsimbao, omwana wa Mariamu, ahabwe Yakobo, Yose, Yuda nende Simoni? Ababotsobe sibamenyele n'nefwe hano?” Ma nibaba nende honzoni n'naye.

⁴Yesu nababool'la, “Omuroobi ahebwanga oluyali habundu hosi, nimurali musibala siabwe, mubekho baabe, nende munyumba mumwe mwene.”

⁵Siyali onyala okhukholayo eliamakana liosi tawe, nikarali yara amakhonoke khubalwaye bati, nabahonia.

⁶Yahuka muno khulwa okhubula okhusubila khwabwe. Ma Yesu nachenda mumataala akali ahembi habwene yaho niyebaal'la abandu.

⁷Yalanga abechi likhumi nababili, nachiaka okhubaruma sibabili sibabili. Nabahelesia obunyali bwokhuhinia emioyo chiesifwabwi

⁸ne nabalaka, “Murakhabukulakhwo esindu siosi khulwoluchendo tawe nerali indabusi yonyene. Murakhachinga omukaati, nohomba omutata kwomusumi, nohomba amapesa mumitata chienywe tawe.

⁹Mwebiikhe akaala nebutswa murebiikha amakoti kabili tawe.”

¹⁰Khandi nababool'la, “Hosi aha namwinjisibwenge munyumba, mumenye munyumba yimwo okhwola olwa mulirulayo.

¹¹Habundu hosi ahabandu nabasulenje okhumwinjisia, nohomba okhumuhul'la, muruleho ne mubungul'le olukukhi oluli mutsindubar'ro tsienywe. Yilio lilaba lichetsiyio khubo.”

¹²Kho nibatsia nibakamba mbu abandu barule mutsimbi tsiabwe.

¹³Nibahinia ebisieno ebinji, nibabakha abalwaye amafura, nibabahonia.

¹⁴Omuruchi Herode yahul'la amang'ana yako kosi, sichila oluyali lwa Yesu lwalanda habundu hosi. Abandu balala baboolanga “Yohana Omubaputisi usimukukhile okhurula mubafwa, niko akachila ali nobunyali okhukhola akokhuchenyia.”

¹⁵Abandi nabo nibaboola, “Ni Elija.” Abandi nibaboola, “Nomuroobi singa mulala khubaroobi bakhale.”

¹⁶Nebutswa olwa Herode yakahul'la yaboola, “Uyu ni Yohana! Ndamukhalaka omurwe nebutswa usimukukhile.”

¹⁷Herode mwene yali okhuruma abandu okhufumila Yohana nibamuboha mubuhambe. Herode yakhola mbwo khulwa Herodia owa yali niyalera, kata nikali yali omukhasi wa Filipu, omwana wabwe.

¹⁸Yohana yali niyabool'la Herode, “Sibuli obulahi ibe okhubukula omukhasi womwana wenywe tawe.”

¹⁹Ma Herodia yali niyamusinyikhila Yohana okhusila, niyenya okhumwira, nebutswa siyanyala tawe.

²⁰Herode yali niyaria Yohana sichila yamanya nomundu omulunji ma omutsienukhu, ma namulinda obulahi. Herode yayanzanga okhumuhulila Yohana, kata nikali mbu inyuma wokhumuhulila yanyakhananga mumwoyo.

²¹Herodia yanyoola obweyangu khwitukhu liokhwitsul'la okhwibulwa khwa Herode. Herode yalomba lisabo khulwa abaami basie nende abakhongo ma nende abakhulundu ba Galilaya.

²²Omukhaana wa Herodia yenjila nasalama ma nayanzisia Herode nende abachenibe. Omwami nabool'la omukhaana uyo, “Usabe siosi esiawenya ne nakhuhelesie.”

²³Khandi namwesuhila naboola, “Esianausabe siosi, nakhuhelesie, kata niyakhaba enusu yobwami bwanje.”

²⁴Khe omukhaana uyo yarula natsia okhureba nyina, “Sabe sina?” Naye namukalusia, “Osabe omurwe kwa Yohana Omubaputisi.”

²⁵Omukhaana nakalukha khumuruchi tsimbilo namusaba, “Nyenyanga umbelesie lunondi omurwe kwa Yohana Omubaputisi nikuli khulutabo.”

²⁶Omuruchi nabelela okhusila, nebutswa sichila esiesuhosie, esiayesuuha imbeli wabacheni baabe siyayenya okhumusul'la tawe.

²⁷Khe Herode naruma omusikari okhuleera omurwe kwa Yohana. Omusikari natsia naremaka omurwe kwa Yohana mubuhambe,

²⁸nakuler'ra khulutabo, naha omukhaana, naye omukhaana nahelesia nyina.

²⁹Olwa bechi ba Yohana bakahulila, batsia okhubukula om'bili kukwe nibayabila musilindwa.

³⁰Abarumwa bosi bakalukha khu Yesu nibamubool'la kosi akabali nibakhol'le nende okhwibaala.

³¹Abandu abenji bali nibetsangaho ne nibatsia kata Yesu nende abechi baabe sibanyoola obweyangu bwokhulia esiokhulia tawe. Kho Yesu nabool'la abechi baabe, “Khutsie fwenyene habundu ahabandu barali, khuhuluukhe hati.”

³²Nibarula bonyene muliaro, nibatsia habandu barali.

³³Nebutswa abandu abenji babalola nibatsitsanga, ne nibabamanya. Ma abenji nibarula mumataala kosi, nibelukha nibatsia ha Yesu nende abechi baabe bali nibatsitsanga nibaranga okhwolayo.

³⁴Olwa Yesu yarula muliaro, yalola omukanda omukali kwabandu, ma nababelel'la, sichila bali singa amakondi akarali nomwayi. Nachiaka okhubebaal'la amang'ana amenji.

³⁵Olwa mukolooba kwola, abechi baabe nibetsa khuye, nibamubool'la, “Hano nimusitsiimi, ne luno isi ibir're.

³⁶Sebula abandu batsie mumikunda echili ahembi nende mumataala babe abanyala okhwekul'la ebia banyala okhulia.”

³⁷Nebutswa Yesu nababool'la, “Mubahelesie ebiokhulia.” Nabo nibamureeba, “Khutsie okhukula emikaati echihela etsidinari[4] etsimia tsibili khubahelesie?”

³⁸Yesu nabareeba, “Muli nende emikaati chianga? Tsie mulole.” Olwabali nibaluutsi nibamubool'la, “Nemikaati chirano nende tsisuche tsibili.”

³⁹Yesu yamala nabool'la abechi baabe bekhasie abandu bosi mubituma khubunyasi.

⁴⁰Nibekhala mubituma bietsimia nende ebiamakhumi karano.

⁴¹Ma Yesu nabukula emikaati chirano nende tsisuche tsibili, nahenga mwikulu, nabisaayila ikhabi, namekania emikati, nahelesia abechi baabe bakabul'le abandu. Khandi nakabulania etsiali tsisutse tsibili khubosi.

⁴²Abandu bosi nibalia ma, nibekura.

⁴³Abechi nibatol'lesia ebitonye biemikati nende tsisutse nibetsusia ebitinyilo likhumi nende b'bili.

⁴⁴Ne abalia emikaati yichio bali abasaatsa etsielefu tsirano.

⁴⁵Bwangu bwangu Yesu yalaka abechi baabe banine muliaro, bamuranjil'le okhutsia Betsisaida, khuluchelekha lundi lweinyanza, naye omwene nasikala nasebula emikanda chiabandu.

⁴⁶Olwa yamala okhusebulana n'nabo yatsia musikulu okhusaaya.

⁴⁷Olwa kwola mukolooba, eliaro liali nilili munyanza hakari, naye nali yenyene khuluchinga.

⁴⁸Yalola abechi baabe nibanyakhananga okhufuka eliaro, sichila imbutsa yali nehungutsanga okhurula imbeli wabwe. Obukwe nibusebanga, Yesu yatsia khubo nachendanga khumatsi. Yali niyenya okhubabira,

⁴⁹nebutswa bamulola nachendanga khumatsi, nibapaala nesinasukhila, nibakhupa etsikhwisi.

⁵⁰Bosi barimukhwa ikholo olwa bamulola. Nebutswa Yesu yal'loma khubo bwangu, “Muleme emioyo, nise. Muraria tawe.”

⁵¹Ma naniina muliaro mwabali, ne imbutsa nelenjeela. Nibahuka okhusila,

⁵²sichila sibamanyilisia ling'ana liemikaati tawe. Tsinganakani tsiabwe sitsiakamanyilisia bwangu tawe.

⁵³Bambukha inyanza, niboola musibala sia Genasareti, nibaboha eliaro khuluchinga.

⁵⁴Olwa barula muliaro abandu nibam'manya Yesu bwangu.

⁵⁵Nibelukha bwangu mulukongo lwosi, nibachiaka okhuchinga abalwaye nibakon'ne khubirili biabwe, nibabahila hosi habahul'langa Yesu ali.

⁵⁶Hosi ha Yesu yatsitsanga, mumataala amakali nende amati, nohomba mumikitsi abandu bakonianga abalwaye mubiiro, nibamuhomba batile kata khulusiche lweingubo yiye. Ne bosi abamutilakhwo bahona.