Read lunyore MARIKO 8 Bible Online

MARIKO 8 - lunyore bible

MARIKO 8

¹Inyuma wamatukhu mati, omukanda kundi omukali kwabandu kwebunjikha khandi, ne sibali nende ebiokhulia tawe. Kho Yesu yalanga abechi baabe nababool'la,

²“Mbeleleye abandu yaba sichila bamenyele n'nase amatukhu kataru, ne sibalikhwo nende ebiokhulia tawe.

³Nimbaseebula batsie ingo nibali neinzala bakharemel'la khunjila, sichila abalala khubo barul'le ehale.”

⁴Abechi baabe nibamukalusia, “Musitsiimi muno omundu yakhanyoola hena ebiokhulia biokhulisia abandu yaba bosi?”

⁵Yesu nabareeba, “Muli nemikaati chianga?” Nabo nibamukalusia, “Chine nachitaru.”

⁶Nalaka omukanda kwosi okhwikhala hasi khubunyasi. Nabukula emikaati chine nachitaru yitsio, naboola embwo khu Nyasaye, nachimekania, nahelesia abechi baabe bakabul'le abandu, nabo nibakhola mbwo.

⁷Khandi bali nende orusutse rutititi. Yesu narusaayila tsikhabi, nalaka rukabul'lwe abandu khandi.

⁸Abandu nibalia, nibekura. Nibabunjelesia ebitonye biasikala nibetsusia ebitinyilo bine nabitaru.

⁹Abandu abalia bali etsielefu tsine. Yesu nabasebula,

¹⁰ne bwangu nanima muliaro halala nabechi baabe, natsia mutsingongo tsia Dalmanutsa.

¹¹Abafarisayi betsa, nibachiaka okhuhingana nende Yesu. Benya okhumuteema, ma nibamubool'la akhole akamangalimwa okhumanyia mbu ali nobunyali okhurula mwikulu.

¹²Yesu nasenya ma naboola, “Busina lisuba yili lirunanga esilolelo? Siahene mubool'langa, lisuba yili silihebwakhwo esilolelo siosi tawe.”

¹³Ma nabalekha, naniina khandi muliaro, nachiaka oluchendo lwokhwambukha oluchelekha lundi lweinyanza.

¹⁴Abechi bali nibebiliye okhubukula emikati; bali nende omukaati mulala kwonyene muliaro.

¹⁵Yesu nabalaka, “Mwelinde, mutsechihe khumamela ka Bafarisayi nende amamela ka Herode.”

¹⁶Abechi nibachiaka okhurebana abene khubene, “Aboolanga mbwo sichila sikhuli nemikati tawe.”

¹⁷Yesu nakamanya, nababool'la, “Busina muhingananga khulwokhubula emikati? Musili okhumanyilisia nohomba okhuhul'la? Emioyo chienywe chisitinyile butswa?

¹⁸Muli netsimoni ne simulolanga tawe? Muli namarwi ne simuhul'langa tawe?

¹⁹Olwa ndamekania emikaati chirano ma nimbelesia abandu etsielefu tsirano, mwabunjelesia ebitinyilo bianga nibitsuye nebitonye?” Nibamukalusia, “Likhumi na b'bili.”

²⁰“Ne olwa ndamekania emikaati chine nachitaru nimbelesia abandu etsielefu tsine, mwabunjelesia ebitinyilo bianga ebiebitonye?” Nibamukalusia, “Bine nabitaru.”

²¹Ma nababool'la, “Ma musilinji okhumanyilisia?”

²²Yesu yola Betsisaida halala nabechi baabe. Ne abandu nibamuler'ra omubofu, nibamuhomba amutilekhwo.

²³Yesu natila omubofu uyo omukhono, namuhila esioba welitaala. Namufutsila amare khutsimoni tsitsie ma namurakhwo amakhono kaake, namureeba, “Onyala okhulola esindu?”

²⁴Omubofu uyo nahenga, naboola, “Ndolanga abandu nibafwana singa emisaala tsichendanga.”

²⁵Kho Yesu nara amakhono khutsimoni khandi, ma niyekula tsimoni tsitsie, obunyali bwokhulola nibumukalukhila, nalola ebindu biosi bulahi.

²⁶Yesu namubool'la atsie ingo ne namukaya, “Orakhakalukha mwitaala khandi tawe.”

²⁷Yesu nabechi baabe barula nibatsia mumataala ka Kaisaria Filipi. Olwa bali khunjila, Yesu yareba abechi baabe, “Abandu baboolanga nise wina?”

²⁸Nibamukalusia, “Balala baboolanga niwe Yohana Omubaputisi, abandi Elija ne abandi mulala khubaroobi.”

²⁹Ne nabareeba, “Nenywe muboolanga nise wina?” Petero namukalusia, “Ibe niwe Masihi.”

³⁰Ma Yesu nabakaya balekhe okhubool'lakhwo omundu wosi akaake.

³¹Yesu yachiaka okhwibaal'la abechi baabe, “Kakwan'ne Omwana wo Mundu anyoole amanyakhano amenji nende okhusulwa nabakhulundu nende abesaalisi abakhongo nende abebaali ba Malako. Yakherwe nebutswa inyuma wamatukhu kataru yakhasimukukhe.”

³²Yesu yababool'la ling'ana yilio habulafu. Kho Petero yamuhila sibeka nachiaka okhumukondekhela.

³³Nebutswa Yesu yasukhana nahenga abechi baabe, nakondekhela Petero naboola, “Kalukha inyuma wanje, Setani! Amapaalo kako sikarulanga khu Nyasaye tawe nebutswa nakabandu.”

³⁴Ma nalanga omukanda kwabandu halala nende abechi baabe, nababool'la, “Omundu wosi niyakhenya okhuba omulondi wanje, okhwola yekaye omwene, abukule omusalapa kukwe yanonde.

³⁵Okhuba omundu owakhenya okhuhonia obulamu bubwe omwene yakhabukosie, nebutswa omundu owakhakosie obulamu bubwe khulweise nende khulwa Amang'ana Amalahi, yakhabuhonie.

³⁶Nibukhala sina omundu okhunyoola esibala siosi ne akosie obulamu bubwe?

³⁷Sibulaho esianyala okhuhaana okhukalusia obulamu bubwe.

³⁸Omundu wosi niyakhasimbila ise omurwe nohomba amebaalo kanje, mwisuba libi yili elirasubilanga Nyasaye, Omwana wo Mundu naye yakhamusimbile omurwe olwa yakhetse mubukhongo bwa Samwana halala nende abamalaika abatsienukhu.”