Read lunyore MARIKO 9 Bible Online

MARIKO 9 - lunyore bible

MARIKO 9

¹Yesu natsilil'la okhubabool'la, “Siahene mubool'langa, baliho abandu hakhuli hano abarakhafwe nibasili okhulola Obwami bwa Nyasaye nibwitsanga nobunyali.”

²Inyuma wamatukhu kasasaba Yesu yabukula Petero, Yakobo nende Yohana nabahila khusikulu esirambi bonyene. Ne nibasimuhenga, Yesu yakalukhana likondo,

³tsingubo tsitsie, nitsing'inang'ina, nitsiba tsindafu tser're, abulaho onyala okhwosia tsingubo tsialaba mbwo.

⁴Ma Elija nende Musa nibalolekha khubo, nibal'lomanga nende Yesu.

⁵Petero nabool'la Yesu, “Omwibaali, nobulahi khube hano. Khwombokhe amahindu kataru, elala elilio, elindi elia Musa ne elindi elia Elija.”

⁶Ye nende abasie bali nibariye okhusila ma sibamanya eliabanyala okhuboola tawe.

⁷Ma lilumbesi nilitsa nilibafuunikha, ne amayoosi nikahul'likha okhurula mwilumbesi yilio, “Uyu niye omwana wanje owandayanza, mumuhulile.”

⁸Ma abechi olwa bahenga khandi, ne sibalola omundu undi tawe, narali Yesu yenyene nali n'nabo.

⁹Olwa bali nibekhanga okhurula khusikulu, Yesu yabakaya okhubool'lakhwo omundu wosi akabali nibalutsi okhwola olwo Omwana wo Mundu yakhabe nasimukukhile okhurula mubafu.

¹⁰Balonda lilako lilie nebutswa nibachiaka okhurebana abene khubene, “Okhuboola mbu ‘Yakhabe nasimukukhile okhurula mubafu’ khuli nasifune sina?”

¹¹Nibamureeba, “Busina abebaali ba Malako baboolanga okhwola Elija aletse mbelio?”

¹²Naye nabakalusia, “Yee, Elija yakharange okhwitsa okhurechekha kosi. Kata mbwo busina nikahandikwa mumahandiko Amatsienukhu mbu Omwana wo Mundu yakhanyoole amanyakhano amenji nende okhuchiaywa?

¹³Nebutswa mubool'langa, Elija waseya okhwitsa, nabo bamukhol'la obwa benya singa obwa kahandikwa khuye.”

¹⁴Olwa boola habechi bandi bali, balola omukanda omukali okwabandu nikuliho. Ne abalala khubebaali ba Malako bali nibahingananga n'nabo.

¹⁵Olwomukanda kwabandu kwamulola, bosi bachenya okhusila, nibatsia tsimbilo khuye okhumusiesia.

¹⁶Yesu nabareeba, “Nisina esiamuhingananga n'nabo?”

¹⁷Omundu mulala khubomukanda namukalusia, “Omwibaali, nder're omwana wanje khuibe, ali nomwoyo kwes'sieno.

¹⁸Lwosi olwa kumufumila, kumukokanga hasi ma arula olufilo m'munwa, nakhwayula ameno ne niyoma omubili kwosi. Rebele abechi baabo bahinie omwoyo yiku nebutswa sibanyal'le tawe.”

¹⁹Yesu nababool'la, “Inywe lisuba elirali nobusubili! Ndakhamenye n'nenywe okhwola lina? Ndakhamwefwile okhwola lina? Lere omwana uyo khwise.”

²⁰Nibamulera khuye. Olwomwoyo yikwo kwalola Yesu, kwasambakasia omwana uyo, ma nakwa hasi, nakalakala ne olufilo nilurula m'munwa. Yesu nareeba samwana omwana uyo,

²¹“Obulwaye yibu bwamuchiaka lina?” Naye nakalusia “Okhurula obwana bubwe.

²²Hali khasotso omwoyo yikwo kumukwisianga m'mul'lo nende m'matsi, kumwire. Khe noli onyala, okhubeele tsimbabasi ma okhukhonye.”

²³Yesu namubool'la, “Ati noli onyala! Ebindu biosi binyalikha khumundu oli nobusubili.”

²⁴Habwene nahabwene samwana omwana uyo nalakaya butinyu naboola, “Subiye; nebutswa obusubili bwanje sibuhela tawe, ukhonye mbe n'nabwo obwinji.”

²⁵Olwa Yesu yalola omukanda nikwebunjikhanga bwangu imbeliwe, nakondekhela omwoyo kwesifwabwi, “Ibe omwoyo kwasiluhala okwekala amarwi, khulakanga orule mumwana uyu, orakhenjila muye khandi tawe.”

²⁶Omwoyo yikwo kwamala nikuhanzukha namayoosi amakali nikurula muye. Omwana uyo nafwana singa ofwiye, kata abandi nibaboola, “Ufwiye!”

²⁷Nebutswa Yesu yamufumila omukhono, namusinjisia, ma nasinjila.

²⁸Olwa Yesu yenjila munyumba, abechi baabe bamureba masilisi, “Busina ifwe sikhunyal'le okhuhinia omwoyo yiku?”

²⁹Yesu nabakalusia, “Okufwana singa yiku kuhinibwanga namasaayo konyene.”

³⁰Yesu nende abechi baabe barula yaho, nibatsilil'la noluchendo okhubir'ra Galilaya. Yesu siyayenya abandu bamanye ha yali tawe,

³¹sichila yali niyebaal'langa abechi baabe nababool'la, “Omwana wo Mundu yakharebwe mumakhono kabandu abakhamwire; nebutswa litukhu liakhataru namal'le okhwirwa yakhasimukukhe.”

³²Abechi sibamanyilisia ling'ana yilio tawe. Nibaria okhumureeba.

³³Kho niboola Kaperinaumu. Ne olwa yali munyumba, nabareeba, “Muhangalaniye sina khunjila?”

³⁴Nebutswa nabo nibasiling'ana, sichila bali nibahangalan'nenge niwina khubo owali omukhongo.

³⁵Yesu niyekhala hasi, nalanga abali abechi likhumi nababili, nababool'la, “Omundu wosi niyakhenya okhuba owokhuranga okhwola abe owokhumalilikha wabosi ma abe omurumikhili wa bosi.”

³⁶Ma nabukula omwana omutititi, namusinjisia hakari wabwe, namulela, ma nababool'la,

³⁷“Owinjisianga omwana singa uno muliira lianje, yenjisianga ise, ne ounyinjisianga ise, siyanyinjisianga ise sienyene tawe, nikarali yenjisianga owali khuruma.”

³⁸Yohana namubool'la, “Omwibaali, khulutsi omundu mulala nahinianga ebisieno narumikhilanga eliira lilio, ne nikhutema okhumukaya sichila sali mulala khwifwe tawe.”

³⁹Nebutswa Yesu yaboola, “Muramukaya tawe, sichila abulaho omundu okholanga akamangalimwa muliira lianje ma habwene yaho khandi aboole obubi khwise.

⁴⁰Okhuba orakhufukulanga ali elubeka lwefwe.

⁴¹Omundu wosi owakhamuhelesia es'sanda siamatsi kokhunywa, sichila inywe muli abandu banje, siyakhabule okhunyoola amatani kaake.

⁴²“Omundu wosi owakhesirasie mulala khubatu yaba abasubilanga ma akhole tsimbi, bwakhabeye obulahi omundu uyo okhubohwa mwikosimwe lichina lierekoreko ma afuubwe munyanza.

⁴³Omukhono kukwo nguba nikukhwemel'la okhukhola tsimbi okukhalake. Nobukhala okhwinjila mubulamu nobula omukhono mulala, okhuyomba okhuba nende emikhono chibili ma olatsie m'mul'lo kwa Kehena okurasimanga. [

⁴⁴Ahe tsinyende etsilitsanga emibili tsirafwitsanga ne omul'lo sikusimanga tawe.][9]

⁴⁵Ne esilenje sisio nisiba nisikhwemel'la okhukhola tsimbi osikhalake. Nobukhala okhwinjila mubulamu nobula esilenje silala, okhuyomba okhuba nebilenje biosi b'bili ma ofubwe m'mul'lo kwa Kehena; [

⁴⁶ahe tsinyende etsilitsanga omubili tsirafwitsanga ne omul'lo kwaho sikusimanga tawe.][10]

⁴⁷Ne imoni yiyo nekhwemel'la okhukhola tsimbi ochihinie. Nobukhala okhwinjila mu Bwami bwa Nyasaye noli neimoni ndala yonyene, okhuyomba okhuba netsimoni tsio tsibili ma olafubwe m'mul'lo kwa Kehena.

⁴⁸Ahe tsinyende etsilitsanga omubili tsirafwitsanga, ne omul'lo kwaho sikusimanga tawe.

⁴⁹“Okhuba siomundu yakhasiywe nomul'lo.[11]

⁵⁰“Echumbi neindahi, nebutswa nekosia esinosi siayo, yakhalungwa nasina? “Mube nende echumbi mwinywe abene ma mumenye nomulembe hakari wenywe.”