Read lunyore LUKA 10 Bible Online

LUKA 10 - lunyore bible

LUKA 10

¹Inyuma we yako Omwami yela abandi amakhumi kane nakataru nende babili[6], nabaruma sibabili sibabili, bamwekholel'le mu sielitaala nende habundu hosi aha yenya okhutsia omwene.

²Nababool'la, “Lichesa nelikhongo, nebutswa abakholi bemilimo nibatu. Kho musaaye Omwene lichesa arume abakholi bemilimo mumukunda kukwe.

³Tsie, murumanga singa ebimeme biamakondi mubibwe.

⁴Murakhachinga omutata kwamapesa, omutata kwomusumi, kata ebilaro; murakhamala tsinyinga mukhusiesia omundu khunjila tawe.

⁵Lwosi olwa namwinjilenje munyumba, murange okhuboola, ‘Omulembe kube munyumba muno.’

⁶Omundu owayanza omulembe nalimwo, ne amasiesi kenywe akomulembe kasikale khuye, nebutswa naba naralimwo tawe ne kakalukhe khwinywe.

⁷Mumenye munyumba yimwo, nimulia nimunywa ebia bamuhelesia sichila omukholi wemilimo akwana okhuhebwa omurungo kukwe. Murayeyeng'ane mutsinyumba tawe.

⁸Nimutsia mwitaala ma mwinjisibwe, mulie ebia bamuhelesia.

⁹Muhonie abalwaye abali mwitaala yimwo ma mubool'le abandu, ‘Obwami bwa Nyasaye bwol'le khwinywe.’

¹⁰Nebutswa nimutsia mwitaala liosi liosi ma mubule okhwinjisibwa murule mwo mutsie khutsinjila tsialio muboole,

¹¹‘Kata olukukhi olurul'le mwitaala lienywe oluhandile mutsindubar'ro tsiefwe khumubungululiiye. Nebutswa mwitsul'le mbu Obwami bwa Nyasaye bwol'le khwinywe.’

¹²Mubool'langa mbu litukhu lie siina kakhabe bulahilahi khubesibala sia Sodoma okhuyomba khubomwitaala yilio.

¹³“Olitsiboolelwa Korasini! Olitsibolelwa Betsisaida! Akamangalimwa kakholwa mwibe kalaba nikakhol'lwa Turo nende Sidoni, abandu bebwene iyo khane bekhala hasi khale nibebikhile amatasi, nibebakhile likokhe okhumanyia mbu barul'le mutsimbi tsiabwe.

¹⁴Nebutswa litukhu liesiina kakhabe khwo bulahilahi khuba Turo nende Sidoni okhuyomba inywe.

¹⁵Nawe Kaperinaumu, wenya okhwechingula okhwola mwikulu? Wakhahangulusibwe hasi okhwola Emakombe.”

¹⁶Ma nabool'la abechi baabe, “Omuhulilanga inywe yambulilanga ise, ne omusulanga inywe yasulanga ise, ne ousulanga ise asulanga ye owaruma.”

¹⁷Abali amakhumi kane nakataru nende babili bakalukha nibetsuye nobusangali obwinji, nibaboola, “Omwami, kata ebisieno bikhuhuliyenje olwa khubilachilenje muliira lilio.”

¹⁸Yesu nabakalusia, “Ndol'le Setani nakwitsanga singa oluheni okhurula mwikulu.

¹⁹Hulile, muheye obunyali obwokhusena tsinzokha nende amakatia, nende okhuleka obunyali bwosi obwomusuku, sibulaho esindu siosi esiakhamusalisie.

²⁰Nebutswa murasangala sichila emioyo chiesifwabwi chimuhuliyenje tawe, nikarali musangale sichila amera kenywe kahandikwa mwikulu.”

²¹Esaa yene iyo Yesu yetsula nobusangali mu Mwoyo Omutsienukhu ma naboola, “Papa, Omwami wo mwikulu nende esibala! Khukhupilanga embwo sichila wabisa amang'ana yaka khubachesi nende abalwenyukhu, ne nokabisula khubahingwa. Yee, Papa nimbwo wenya kekhole.”

²²Ma naboola, “Papa wanje waimbelesia ebindu biosi. Abulaho omanyile Omwana, narali Papa, khandi abulaho omanyile Papa niwina narali Omwana nende yabo abo Omwana ayanzanga okhuribul'la.”

²³Ma Yesu nasukhana khubechi baabe nababool'la masilisi, “Nabeikhabi abalolanga ake inywe mulolanga!

²⁴Mubool'langa tooto mbu abaroobi abenji nende abaami bekomba balole ake inywe mulolanga yaka, ne sibalola tawe, khandi bekomba okhuhulila akamuhul'langa yaka nebutswa sibahulila tawe.”

²⁵Omwibaali wa Malako mulala yasinjila nareeba Yesu khulwo okhumuteema naboola, “Omwibaali, khole sina kho nyoole obulamu oburahwa?”

²⁶Yesu namukalusia, “Akahandikwa mu Mumalako kaboolanga mbwena? Osomanga mbwena?”

²⁷Omundu uyo nakalusia, “ ‘Oyanze Omwami Nyasayewo nomwoyo kukwo kwosi, nende obulamu bubwo bwosi, netsingufu tsitsio tsiosi, ma nokhulalila khukhwo khwosi’, khandi ‘Oyanze owasio singa obwa weyanzanga omwene.’ ”

²⁸Yesu namubool'la, “Ukalusisie habwene. Okhole mbwo ne nomenye.”

²⁹Nebutswa omwibaali wa Malako uyo yenya okhwekhola omulunji, nareeba Yesu, “Owasianje niwina?”

³⁰Yesu namukalusia, “Omundu nalebe yali naselenjeranga okhurula Yerusalemu okhutsia Yeriko. Olwa yali khunjila yakwa mubanuuli nibamunabula tsingubo, nibamukhupa tsinguma, ma nibamulekha nakobelanga.

³¹Ne metsukhan'na omwesaalisi mulala yaselenjera khunjila iyo, ne olwa yalola omundu uyo yebera nabir'ra elubeka.

³²Khandi Omulawi naye mbwo, olwa yola ho namulola, yabir'ra elubeka.

³³Nebutswa Omusamaria mulala owali nali khuluchendo lwe yola khumundu uyo, ne olwa yamulola yamubelel'la.

³⁴Yesunda ahembi khuye, natsukha amafura nende ewaini khutsinguma tsitsie ma natsiboha, ma namuniinia khusikhili[7] yiye, namuhila munyumba yabacheni, namulwachisia mwo.

³⁵Omukamba okwalondakhwo nahinia etsidinari tsibili, nahelesia omwene nyumba yabacheni namubool'la, ‘Omulinde ne olwa ndakhakalukhe, ndakhakhurunge siosi esioliba norumikhiye khuye okhuyomba yitsi!’ ”

³⁶Ma Yesu nareeba, “Mubandu bataru yaba nolihena owopaalanga yali owasie khumundu owali okhukwa mubanuuli uyo?”

³⁷Omwibaali wa Amalako nakalusia, “Owamubeelel'la.” Yesu namubool'la “Nawe tsia okhole mbwo.”

³⁸Olwa Yesu nende abechibe bali khuluchendo yenjila mwitaala nalebe, ne omukhasi mulala owalangwa Maritsa yamwinjisia munyumba yiye.

³⁹Yali nende omukhaana wabwe owalangwa Mariamu, owali niyekhaye habilenje bia Yesu nahulilanga amebaalo kaake.

⁴⁰Nebutswa Maritsa yali nafulukhananga khumilimo eminji, ma niyetsa nabool'la Yesu, “Omwami, siokananga khwo mbu omwana wefwe undekhele kholanga emilimo chiosi sienyene tawe? Mubool'le yakhonye khwo.”

⁴¹Omwami namukalusia, “Maritsa, Maritsa, ohendel'langa khandi onyakhan'nanga ebindu ebinji,

⁴²nebutswa nesindu silala sionyene esienyekhanga. Mariamu wel'le esindu esilahi, ne sisiakhahiinibwe khuye tawe.”