Read lunyore LUKA 12 Bible Online

LUKA 12 - lunyore bible

LUKA 12

¹Olwa abandu etsielefu tsinyinji bali nibebunjikhile halala ma kata nibaba basenananga, Yesu yaranga okhubool'la abechi baabe, “Mwelinde khumamela ka Bafarisayi, akali obukalama.

²Siosi esifuunikhilwanga siakhafunulwe ne siosi esiebisa siakhabulikhe.

³Khulwe yako, liosi eliamubool'la musiilima liakhahulilikhe habulafu, ne akamumonyan'na mu birwi emiliango nichikaye kalikambilwa khubisuli.

⁴“Mubool'langa abalina banje, muraria yabo aberanga omubili ne sibanyala okhukhola khwo elindi liosi olwe inyuma eliyoomba yaka tawe.

⁵Ndamumanyia owamukwana okhuria: murie Nyasaye, ye olwa aba niyer're, ali nobunyali okhufuuba mu Kehena. Yee, mubool'langa, murie omwene uyo.

⁶Amarobelesi karano sikakusibwanga amapesa kabili? Nebutswa kata elala khuko silibil'lwanga imbeli wa Nyasaye tawe.

⁷Kata liswi liokhumirwe chienywe liabalwa liosi. Muraria tawe; inywe muyombele amarobelesi amenji.

⁸“Mubool'langa tooto, siomundu olindeyama imbeli wabandu mbu nowanje, Omwana wo Mundu naye yakhamweyame imbeli wabamalaika ba Nyasaye mbu omundu uyo nouwe.

⁹Nebutswa omundu wosi owakhanyambakhana imbeli wabandu, Omwana wo Mundu alimweyambakhana imbeli wabamalaika ba Nyasaye.

¹⁰“Omundu wosi onyekanga Omwana wo Mundu yakhalekhelwa; nebutswa onyekanga Omwoyo Omutsienukhu siyakhalekhelwa tawe.

¹¹“Olwa bakhamuhile imbeli wetsisinakoki, nende khubami nende khubomuse, murahende obwa namukalusie nohomba elianamuboole tawe.

¹²Okhuba olwene yilwo Omwoyo Omutsienukhu yakhamwibaal'le akamwenyekhanga okhuboola.”

¹³Omundu mulala mumukanda yikwo namubool'la, “Omwibaali, bool'la omwana wefwe yangabul'le khwo obulame bwakhwalekhelwa nende papa wefwe.”

¹⁴Nebutswa Yesu namureeba, “Omulina wanje, niwina owambikha mbe omukhalachi nohomba omukabuli wemiandu khwinywe?”

¹⁵Ma nabool'la bosi, “Mwelinde khusikhayilwe siosi, sichila obulamu bwomundu sibuli khubindu ebiomundu yetsula n'nabio tawe.”

¹⁶Ma nababool'la olukano luno: “Yaliho omuhinda mulala owali nende omukunda kukwe okwama ebiamo ebinji okhusila.

¹⁷Omundu uyo napaala mumwoyokwe, niyebool'la; ‘Nakhole mbwena sichila sindi nende habundu hokhubikha ebichese bianje tawe?

¹⁸Ndakhakhola mbu, nasambule ebiachi bianje ma nyombokhe ebikali, ma mbikhe mwo ebichese bianje nende ebindu bianje.

¹⁹Ma nambool'le omwoyo kwanje; luno oli nende obuhinda obwinji obwokhulia khwo emihika ne mihika. Hulukha, olie onywe ma osangale.’

²⁰Nebutswa Nyasaye namubool'la, ‘Oli omuhingwa; obutukhu buno omwoyo kukwo kwitsa okhubukulwa. Khubindu yibio biosi ebia webunjikhila biakhaba ebia wina?’ ”

²¹Yesu namalila nende okhuboola “Nimbwo kali khumundu owebikhilanga obuhinda khububwe omwene, ne narali omuhinda khu Nyasaye.”

²²Ma Yesu nabool'la abechi baabe, “Khulwe yako mubool'langa, murahendela obulamu bwenywe, esianamulie kata esianamunywe, nohomba akemibili chienywe esia namwebiikhe.

²³Obulamu buyomba ebiokhulia, ne omubili kuyomba tsingubo.

²⁴Mupaalekhwo khusifwanani siamakhokho, sikarakanga, kata sikachesanga, sikali nende ebiachi tawe; nebutswa Nyasaye akalisianga. Inywe muyombele amanyonyi.

²⁵Niwina khwinywe khulwo khuhendela, owakhameeta oburambi bwobulamu bubwe?

²⁶Kho nimuba nimurakhanyala okhukhola elili litu singa yili busina muhendelanga akandi?

²⁷Paalekhwo singa obwa amatanya kamelanga. Sikanyakhananga, kata sikalukhanga tawe, nebutswa mubool'langa kata Solomoni mubukhongo bubwe siyayebiikha khwo singa elala khuko tawe.

²⁸Nebutswa, Nyasaye naba nabiikhanga obunyasi bwom'bulimo, obuliho n'nondi, ne mukamba bufuubwa mumul'lo, siyakhasilana okhumubikha inywe abandu bobusubili obutu?

²⁹Kho murahendela esia namulie, nohomba esia namunywe.

³⁰Okhuba yibio biosi abetsimbia, abaramanya Nyasaye babihendelanga. Papa wenywe wamanya mbu mutakhanga ebindu yibio.

³¹Nebutswa murune obwami bubwe mbelio, ne yibio biosi mulametelwa.

³²“Muraria tawe, inywe esiayo esitu, okhuba Papa wenywe uyanzile okhumuhelesia obwami.

³³Mukusie ebia muli n'nabio ma muhaane ebihanwa bietsimbabasi khubatakha. Mwelombele emitata echirakhunguhanga, ma mubikhe libere mwikulu halirakhatutuhe, ahabebi barakhoola nohomba amatsilili okhwononia tawe.

³⁴Okhuba ahe libere lilio lili niho ahomwoyo kukwo kuli.

³⁵“Mwerechekhele kosi akaba niketsa, nimwebohele emikoye chienywe mubisienje bienywe, ne etsitaya tsienywe tsibe nitsiakhanga.

³⁶Mube singa abarumikhi abalindil'langa omwami wabwe olwachelela okhurula mus'selelo. Yetsanga ma akhong'onde, ne bamwikul'la bwangu.

³⁷Nabeikhabi abarumikhili yabo abo Mwami wabwe yakhanyoola nibali meso nibalindil'langa. Mubool'langa tooto mbu yakhebohe olukhoba mus'sienje sie, ma alabekhasie khubiokhulia ne nabarumikhila.

³⁸Kata nibwakhaba mubutukhu hakari nohomba m'mabwebwe, niyakhabanyoola nibalindil'langa, bakhaba neikhabi.

³⁹Khandi mumanyilisie mbu omwene nyumba niyakhamanya esaa yomwibi yetsela mwo okhwiba, yakhalindil'la, ma siyakhalekhele inyumba ye efunakwe tawe.

⁴⁰Nenywe khandi mukwana okhwerechekha sichila Omwana wo Mundu yakhetse esaa eya murapaalanga khwo tawe.”

⁴¹Petero namubool'la, “Omwami, olukano yilu luli khulwe ifwe fwenyene nohomba khulwa abandu bosi?”

⁴²Omwami nakalusia, “Niwina oli omulindi omusubilwa khandi omuchesi? Ni uyo owomwami yakhare ikulu wabarumikhili bandi mbu abahelesie ebiokhulia munyinga tsiabio.

⁴³Noweikhabi omulindi uyo nikakhaba olwomwamiwe yakhakalukhe yakhamunyoole nakholanga mbwo.

⁴⁴Siahene yakhamure okhulinda emianduchie chiosi.

⁴⁵Nebutswa omulindi uyo niyakhapaala mumwoyokwe naboola; ‘Omwami wanje usisiliye okhukalukha’ ma achiake okhukhupaka abarumikhili bandi abes'siani nende abesikhana, ma achiake okhunywa nakholwa,

⁴⁶omwamiwe yakhetse litukhu eliaramanyile khandi musaa eyarapaalangakhwo tawe, yakhamukhalanie ma alamure mwiboho elala nende yabo abarali abasubili.

⁴⁷Nebutswa omurumikhili owamanya obuha bwomwamiwe ne siyayerechekha okhukhola obwa yenyekhanga akhole tawe yakhatiabwe tsisala tsinyinji.

⁴⁸Ne uyo oramanyile aka yenyekhanga akhole, ma akhole yako akakwan'ne okhutiabwa, yakhatiabwe tsindititi. Owahebwa ebinji yakhabanzwe ebinji, ne wosi owahebwa ebinji yakhasabwe okhuhaana ebinji okhusila.

⁴⁹“Ndetsa okhuhambia omul'lo musibala, ne ndekombanga kube nikwakhanga.

⁵⁰Ndi nende okhubaputiswa okhwenyekhanga mbaputiswe mwo, ne nyakhananga okhusila okhwola khuhesibwe!

⁵¹Mupaalanga ndetsa okhulera omulembe musibala? Kata nahati; sikuli omulembe okwandetsa okhulera tawe nebutswa obwabukhani.

⁵²Okhuba okhurula luno barano abomunyumba ndala balabukhana, bataru balalwana babili, ne babili balalwana bataru.

⁵³Samwana alabukhana no mwanawe, ne omwana nasamwana, nyina alabukhana nomukhaanawe, ne omukhaana nende nyina, nyakhusalanyene alabukhana nomukhasi womusianiwe ne omukhasi womusiani alabukhana na nyakhusala.”

⁵⁴Yesu khandi nabool'la emikanda chiabandu, “Olwa mulolanga lilumbesi nilihimbanga imbo, ne muboola bwangu, ‘Ifula yitsa okhukwa’, ne tooto emalanga ekwe.

⁵⁵Olwa mulolanga omuyeka kwe enandete nikuhungutsa ne muboola, ‘Siakhabe esimi’ ne esimi nisibaho.

⁵⁶Inywe abakalama! Mwamanya okhurooba liiba liesibala olwa muhenga esibala nohomba likulu; busina muranyala okhuchelania amatukhu yaka?

⁵⁷“Busina murekhalachilanga abene akali akahabwene okhukhola?

⁵⁸Okhuba nyinga omubanziwo akhuyaalanga ma akhuhile imbeli womukhalachi, okhole esinani muhuchilisanie n'naye nimusili khunjila. Khase alakhuhila khumukhalachi, ma naye akhure mumakhono kabasikari, ne nabo bakhure mubuhambe.

⁵⁹Tooto mwene siwakharulamwo tawe okhwola olwolimala okhurunga lisendi liokhumal'likha.”