Read lunyore LUKA 13 Bible Online

LUKA 13 - lunyore bible

LUKA 13

¹Olwene yilwo abandu nalebe baliho ababool'la Yesu amang'ana kabandu ba Galilaya aba Pilato yera olwa bali nibahaananga omusango khu Nyasaye.

²Yesu nababool'la, “Mupaalanga aba Galilaya yabo naboni okhuyomba aba Galilaya bandi, sichila berwa munjila yiyo?

³Tawe. Mubool'langa mbu nenywe nimuba murarula mutsimbi tsienywe, mwakhatibe singa bo.

⁴Nohomba abandu likhumi nende munane Esiloamu aboluhinga lwakwakhwo ma nibafwa, mupaalanga bali aboni okhuyomba abandu bandi bosi abamenyanga Yerusalemu?

⁵Tawe. Nebutswa nenywe murarula mutsimbi tsienywe mwakhatibe mwesi singa bo.”

⁶Ma Yesu nababool'la olukano yilu, “Omundu mulala yali nomukhuyu okwali nikwasimikhwa mumukunda kwe okwemisabibu. Yatsia okhuruna amakhuyu khumusala yikwo anoke, nebutswa siyanyoola khwo tawe.

⁷Nabool'la omulindi womukunda kwe, ‘Lola, khulwemihika chitaru ndaitsile okhuruna amakhuyu khumukhuyu yiku, ne sinyoolanga khwo esindu siosi tawe. Okuremake, busina kutsilil'le okhwononia liloba butswa?’

⁸Nebutswa omulindi namubool'la, ‘Omwami, okulekhe omuhika kuno; nangwachile ma nanzukhe khwo imbolela.

⁹Nikuba nikwakhaama amakhuyu omuhika kwitsa bwakhaba obulahi, nebutswa nikuraama amakhuyu ne okuremaka.’ ”

¹⁰Litukhu elala elie Sabato Yesu yali niyebaalanga musinakoki.

¹¹Ne omukhasi mulala owali niyalwala emihika likhumi nende munane yali mwo. Omubilikwe kwali nikwenama ne siyali onyala okhukol'lokha tawe.

¹²Olwa Yesu yamulola yamulanga, namubool'la, “Omukhasi uboholoywe okhurula mubutekhele bubwo.”

¹³Yesu Nara amakhonoke khuye ne bwangu omukhasi uyo nakol'lokha ma niyetsomia Nyasaye.

¹⁴Omukhongo wesinakoki yasinyikha sichila Yesu yali nahonisie khwitukhu lie Sabato. Yamala nabool'la abandu, “Kaliho amatukhu kasasaba akokhukhol'la mwo emilimo, mwitse muhonichisibwe mumatukhu yako, muretsa litukhu lie Sabato tawe.”

¹⁵Nebutswa Omwami namukalusia naboola, “Inywe abakalama, ali khwo khwinywe orakhabohol'la ing'ombe ye nohomba esikhili ye okhurula musiko, ahile okhunywesia kata nilili litukhu lie Sabato?

¹⁶Hano aliho omukhaana wa Aburahamu, owa Setani yaboha khulwemihika likhumi nende munane. Sibuli obulahi ahonibwe litukhu lie Sabato tawe?”

¹⁷Olwa yamala okhuboola akene yako, bosi abali nibahingananga n'naye basimba emirwe, ne abandu bosi basangala khulwa amang'ana kosi akayali nakhol'le.

¹⁸Yesu nareeba, “Obwami bwa Nyasaye buli mbwena? Mbufwananie nende sina?

¹⁹Bufwana nende olukutsa lwelisatsi, olwomundu yabukula naraka mumukunda kukwe: nilumela ma nikuba omusaala omukali. Amanyonyi kokhwikulu nikombokha ebitsu biako mutsisaka tsiakwo.”

²⁰Khandi Yesu nareeba, “Ndakhafwanania Obwami bwa Nyasaye nende sina?

²¹Bufwana singa amamela akomukhasi yabukula ma natsokania mumbikul'lo tsitaru tsiobusie mbuluha mbuhambila bwosi.”

²²Yesu yatsilil'la noluchendo lulwe okhutsia Yerusalemu nabir'ranga mumataala amakali nende amatu.

²³Omundu mulala namureeba, “Omwami, nabandu abatututu abakhahonibwe noho?”

²⁴Yesu namubool'la, “Muhambachil'le okhwinjila mumuliango omunyel'le, sichila mubool'langa, abenji bakhateme okhwinjila nebutswa sibakhanyale tawe.

²⁵Mwene nyumba yakhasinjile ma alekale omuliango. Inywe mwakhasinjile esioba, nimukhong'onda khumuliango nimuboola, ‘Omwami khwikul'le omuliango!’ Nebutswa naye yakhamukalusie, ‘Simumanyile hamurul'le tawe.’

²⁶Nenywe mwakhachiake okhumubool'la, ‘Ifwe nifwe abalia nikhunywa halala n'nawe, nawe webaala mwitaala liefwe.’

²⁷Naye yakhaboole khandi, ‘Simumanyile inywe murul'le hena tawe. Rule khwise, inywe mwesi abakholi bobubi.’

²⁸Khulibaho okhulakaya nende okhukhwayula ameno, olwa mulilola Aburahamu, Isaka nende Yakobo, nende abaroobi bosi nibali mu Bwami bwa Nyasaye, ne nenywe abene nimufubilwe esioba.

²⁹Abandu bakhetse okhurula ebukwe nende emasaba, nende esinyolu ma nende enandete, bakhetse okhwikhala mu Bwami bwa Nyasaye.

³⁰Ne yabo abali abeinyuma bakhabe abeimbeli, ne abeimbeli bakhabe abeinyuma.”

³¹Olwene yilwo Abafarisayi balala betsa khu Yesu nibamubool'la, “Rula hano otsie habundu undi, sichila Herode yenyanga okhukhwira.”

³²Yesu nabakalusia, “Tsie mubool'le esibwe yisio mbu, ‘Litukhu lino nende eliamukamba mbininjia ebisieno nende okhuhonia abalwaye, ne khwitukhu liakhataru namale emilimo chianje!’

³³Kata mbwo litukhu lino nende mukamba ma nende omukamba kulonda khwo, okhwola nzilil'le noluchendo, okhuba sibuli obulahi omuroobi yer'rwe esioba wa Yerusalemu tawe.

³⁴“Inywe abandu ba Yerusalemu, mwiranga abaroobi, nimubalasa amachina yabo abarumwa khwinywe. Ni hali khanga nirunanga okhubunjelesia abaana baabo halala singa ingokho enyabuli ebunjelesianga ebiminywi biayo mumbaha tsiayo, ne simwaimbuchil'la tawe.

³⁵Khulwe yako Ehekalu yenywe mulekheywe abene likunda. Mubool'langa akatooto, simwakhandole khandi tawe okhwola olwa mwakhaboole, ‘Noweikhabi owitsanga muliira lio Mwami.’ ”