Read lunyore LUKA 14 Bible Online

LUKA 14 - lunyore bible

LUKA 14

¹Litukhu elala elie Sabato, Yesu yatsia okhulia ebiokhulia munyumba eya mulala khubemeli ba Bafarisayi. Abandu abaliho bosi bali nibamuhengelesianga.

²Omundu owali nobulwaye bweimbunda yali naliho,

³ma Yesu nareeba abebaali ba Malako nende Abafarisayi, “Nobulahi okhuhonia omundu litukhu lie Sabato nohomba tawe?”

⁴Nebutswa basiling'ana butswa. Yesu nafumila omulwaye uyo, namuhonia ma namusebula.

⁵Ma nababool'la, “Niwina khwinywe owomwana we nohomba ing'ombe ye yakhakwa mubuko, owakhabula okhumuhiniamwo nohomba okhuchihiniamwo mwitukhu lie Sabato?”

⁶Sibaali abanyala okhumukalusia tawe.

⁷Olwa Yesu yalola abali nibalangilwe obwa belukhan'nanga tsindebe tsieimbeli etsioluyali, yababool'la olukano luno:

⁸“Omundu naba nakhulanga musisel'lo orekhala khundebe yeimbeli eyoluyali tawe, khase oundi yakhaba nalangilwe omukoosi okhuyomba ibe,

⁹ne omulanjile mwesi yetse akhubool'le, ‘Yikul'la uyu obwikhalo!’ Ma wakhasimba omurwe ma wikhale khundebe yeinyuma okhusila.

¹⁰Musilenje siokhukhola mbwo, noba nolangwa mumukho, wikhale mubwikhalo bweinyuma, kho okhulanjile olwa yetsa akhubool'le, ‘Omulina, yitsa wikhale imbeli, habundu halahi.’ Kano kakhakhusimbulusia omurwe imbeli wabandu bosi abekhaye halala n'nawe.

¹¹Okhuba wosi owefumianga yakhachiehibwe, ne owechieyianga yakhafumibwe.”

¹²Ma Yesu nabool'la owali namulanjile, “Niwakhalombela abandu lisabo m'basu nohomba khubwile oralanga abalinabo, nohomba abaana benywe, nohomba abekho baabo, nohomba abamenyani baabo abahinda sichila nabo nabakhulange ma babe bakhurunjile akawabakhol'la tawe.

¹³Nebutswa ibe olwolombanga lisabo, olange, abatiecheli, abatakha, abalema nende ababofu,

¹⁴ne wakhaba unyooye ikhabi, sichila yabo sibali nende esiokhukhurunga tawe. Nyasaye yakhakhuhelesie omukabwakwo olwabandu abalunji bakhasimukukhe.”

¹⁵Mulala khu yabo abali nibekhaye nende Yesu khubiokhulia yaboola, “Noweikhabi owakhalie ebiokhulia mu Bwami bwa Nyasaye.”

¹⁶Yesu namubool'la, “Omundu nalebe yalomba lisabo likali, nalanga abandu abenji.

¹⁷Olwe esaa ye lisabo yola yaruma omurumwa okhutsia okhubool'la abali nibalangilwe, betse sichila ebindu biosi biali nibierechekhele.

¹⁸Nebutswa bosi bachiaka okhureba obubeeli. Owokhuranga nabool'la omurumwa uyo, ‘Ngul'le omukunda ne khatimba nzie okhukulola; noyanza umbeele.’

¹⁹Oundi naboola, ‘Ngul'le tsing'ombe tsiokhulima amakokolo karano, nzitsanga okhutsitema, noyanza umbeele.’

²⁰Ne oundi naboola, ‘Nder're omukhasi, khulwe yako sinyala okhwitsa tawe.’

²¹“Omurumwa uyo nakalukha nabool'la omwamiwe amang'ana yako. Mwene nyumba uyo lirima liamuhamba, nabool'la omurumwawe, ‘Tsia bwangu mumihanda nende mutsinjila tsiomwitaala olere abatakha, abalema, ababofu nende abatiecheli.’

²²Olwe inyuma omurumwa yetsa naboola, ‘Omwami amang'ana kosi kekhol'le singa olachile, nebutswa obweyangu busili okhwitsula!’

²³Omwami nabool'la omurumwa, ‘Tsia mutsinzebo nende mumihanda ohindilisie abandu benjile munyumba yanje, yitsule tu.

²⁴Okhuba mubool'langa, abulaho kata mulala khu yabo abali nibalanjilwe owakhatsanzame khwo lisabo lianje.’ ”

²⁵Ne emikanda emikhongo nichilonda Yesu. Ma nasukhana nababool'la,

²⁶“Omundu wosi naba niyakhetsa khwise, ne narabihil'lwa samwana nende nyina, omukhasiwe nabaana babwe nende ababotso nyene, yee kata obulamu bwe bwene, sianyala okhuba omwechi wanje tawe.

²⁷Omundu naba naretuukha omusalapa kukwe ma yanonde, sianyala okhuba omwechi wanje tawe.

²⁸“Niwina khwinywe owakhenya okhwombokha oluhinga orekhala mbelio abale obukusi bwalwo, alole nikali ebiali n'nabio biakhahela?

²⁹Khase olwaba namal'le okhuyaba omuse ma akhumbulwe okhumala, abandu bakhamutsekhel'la nibaboola,

³⁰‘Omundu uyu yachiaka okhwombokha, ma wakhumbulwa okhumala.’

³¹“Nohomba, nimwami sina otsitsanga okhulwana lihe nende omwami undi, orekhala mbelio alole nikakhaba abasikari baabe etsielefu likhumi banyala okhulwana nabasikari etsielefu amakhumi kabili?

³²Nalola mbu siali onyala tawe, ne aruma abarumwa okhuruna omulembe khu mwami wasie uyo nasili ehale.

³³Nimbwo kali, abulaho kata mulala khwinywe owakhaba omwechi wanje naralekhele biosi ebiali n'nabio.

³⁴“Omunyu nomulahi, nebutswa nikubulamwo esinosi, kwakhatoola hena esinosi siakwo?

³⁵Sikuba nikuli matsami khwiloba nohomba kata khumbolela tawe. Abandu bakufubanga esioba. Nimuli namarwi akokhuhulila muhulile.”