Read lunyore LUKA 16 Bible Online

LUKA 16 - lunyore bible

LUKA 16

¹Yesu yabool'la abechi baabe. “Yaliho omuhinda nalebe owali nomulindi. Omulindi uno yatsanzanibwa mbu arumikhilanga emianduchiomuhinda obubi.

²Omuhinda uyo namulanga namubool'la, ‘Ni mang'ana sina akambul'langa khuibe yaka? Hinia obubalibwo obwobwinjili nende oburuli bwemiandu chianje, sichila sionyala okhuba omulindi wemiandu chianje khandi tawe.’

³Omulindi uyo napaala; ‘Omwami wanje yambinianga khumilimo chiobulindi, nakhole mbwena? Sindi onyala okhulima tawe, khandi okhusaba singa omutakha nes'simba murwe.

⁴Luno ndakhamanya esianakhole! Kho olwa nambinibwe mubulindi bwanje nambe nende abalina aba nabanyinjisie mutsinyumba tsiabwe.’

⁵“Ma nalanga abali namakobi ko Mwamiwe siamulala, nabool'la owokhuranga, ‘Obanzungwa sina nende omwami wanje?’

⁶Naye namukalusia, ‘Amatepe kamafura emia ndala.’ Namubool'la, ‘Bukula ebarwa yiyo yelikobi, wikhale bwangu ohandiche amakhumi karano.’

⁷Ma nareeba owelikobi undi, ‘Ibe obanzungwa sina?’ Naye namukalusia. ‘Amakunia emia ndala ake ingano!’ Omulindi uyo namubool'la, ‘Bukula ebarwa yo ye likobi ohandiche amakhumi munane.’

⁸“Kho omwami womulindi uyo yamufumia khulwa okhurumikhila obulwenyukhu. Okhuba abandu besibala sino bali nende obulwenyukhu obwinji mumang'ana kabwe okhuyomba abaana bobulafu.”

⁹Ma Yesu natsilil'la okhuboola, “Mubool'langa, mwelombele obulina khubuhinda bwesibala, kho olwa obuhinda bwenywe bwakhamuhwele, mube abanyala okhubukulwa mubumenyo oburahwa.

¹⁰Wosi oli omusubilwa mumang'ana matututu, no musubilwa mumakali, ne wosi orali omusubilwa mumatututu sianyala okhuba omusubilwa mumakali tawe.

¹¹Kho nikakhaba simuli abasubilwa mumiandu echirali emilunji echiomusibala sino, niwina owakhamuhelesie emiandu chiatooto?

¹²Ne nimuba nimusili okhuba abasubilwa khumiandu echirali echienywe, niwina owakhamuhelesia emiandu echili echienywe?

¹³“Abulaho omurumikhili onyala okhurumikhila abaami babili, sichila yakhabihil'lwa mulala ne ayanze oundi; nohomba yakhahambana nende mulala ne achiaye oundi. Simunyala okhurumikhila Nyasaye nende emiandu tawe.”

¹⁴Olwa Abafarisayi bahul'la yako batsekheel'la Yesu, sichila bali nibayanza emiandu.

¹⁵Ma nababool'la, “Inywe mwekholanga abalunji imbeli wabandu, nebutswa Nyasaye wamanya emioyo chienywe. Okhuba esitsoomibwanga imbeli wabandu nes'sinyo imbeli wa Nyasaye.

¹⁶“Amalako nende akahandikwa nabaroobi kaliho okhwola mutsinyinga tsia Yohana Omubaputisi. Okhurula olwene yilwo Amang'ana Amalahi khu Bwami bwa Nyasaye kakambwanga, ne siomundu ateemanga butinyu okhwinjila mwo.

¹⁷Nebutswa nobwangu likulu nende esibala okhuhwa, okhuyomba akhanyokuta khal'la akhamalako okhusimibwa.

¹⁸“Omundu wosi okhunganga omukhasi we, ma alere oundi, aheyanga; ne wosi oleeranga omukhasi owakhungwa okhurula khumusaatsa undi, aheyanga.

¹⁹“Yaliho omundu mulala owali omuhinda, owebiikhanga tsingubo tsiobukusi bweikulu etsiekatani, ne yaliitsanga obwale sielitukhu.

²⁰Khandi yaliho omutakha mulala owalangwa Lasaro, owali nende amakhwaku amenji ne yakonibwanga hamuliangokweinyumba yomuhinda uyo.

²¹Yekombanga okhulia ebindu ebiabungulukhanga okhurula khumesa yomuhinda. Kata tsimbwa tsietsanga okhukhomba mumakhwaku kaake!

²²“Omutakha uyo yafwa ne nachingwa nende abamalaika niyekhasibwa ahembi nende Aburahamu. Khandi omuhinda naye yafwa ma nayabilwa.

²³Omuhinda uyo yatiikul'la tsimonitsie emakombe aha yali nasal'langa okhusila, ne nalola Aburahamu ehale ne Lasaro nali ahembi n'naye.

²⁴Ma nahanzukha nomwoyo omukali naboola, ‘Papa Aburahamu, mbeelel'la, orume Lasaro yene butswa obutsunzu bwesitere sie m'matsi, asindie ol'limi lwanje, sichila salilanga m'mul'lo kuno!’

²⁵“Nebutswa Aburahamu namubool'la, ‘Witsul'le mwana wanje, olwa wali nosili omulamu musibala wahebwa ebindu biosi ebilahi, ne Lasaro nanyoola amabi. Nebutswa luno ye ahotselekhanga ne nawe nosal'la.

²⁶Khandi okhumeta khu yako, hakari wefwe nende inywe oluhongo lwarebwaho olukali, abarunanga okhubira betse khwinywe okhurula yino sibali abakhanyala tawe, khandi abali owenywe sibanyala okhwitsa yino tawe.’

²⁷Owalinji omuhinda uyo naboola, ‘Nikali mbwo Papa Aburahamu, khusaayanga omurume atsie hango ha papa wanje,

²⁸sichila ndi nende abaana befwe barano, abaribul'le khase bakhenjila mukhusal'la khuno.’

²⁹“Nebutswa Aburahamu namubool'la, ‘Bali nende Amalako ka Musa nende amahandiko kabaroobi, babahul'le abene yabo.’

³⁰Nebutswa naye naboola, ‘Yako sikahel'le tawe, Papa Aburahamu, omundu niyakhaba nasimukukha okhurula mubafu ma atsie khubo, ne bekalukhania.’

³¹Ne Aburahamu namubool'la, ‘Nibakhabula okhuhul'la Amalako ka Musa nende amahandiko kabaroobi, sibakhahendel'la khwo amang'ana komundu kata niyakharula mubafu tawe.’ ”