Read lunyore LUKA 17 Bible Online

LUKA 17 - lunyore bible

LUKA 17

¹Yesu yabool'la abechi baabe, “Ebiesirasio ebichilanga abandu nibakwa mutsimbi bitsanga siahene, nebutswa alitsiboolelwa omundu ochilanga nibitsa!

²Bwakhabeye obulahi khuye oluchina olwarekoreko nilwakhabohelwe mwikosimwe ma afuubwe munyanza, okhuyomba ye okhuchila mulala khubatu yaba okhukhola tsimbi.

³Mwelinde abene. Omwana wenywe naba nakhwonela omuchetsiyie, ne naba niyekalukhania omulekhele.

⁴Naba nakhuwonela esia khane nakhataru khwitukhu elala, ne nakalukha khuibe esia khane nakhataru naboola, ‘Khuwoneye, umbeele’, omubeele.”

⁵Abarumwa nibamubool'la, “Omwami, okhumet'te obusubili.”

⁶Omwami nabakalusia, “Nimwakhabeye no busubili singa obwolukutsa lwelisatsi, mwakhabool'la omusaala kwo Muforosadi yiku, ‘Khunyukha, ma wesimikhe munyanza’, ne kwakhamuhul'la.

⁷“Mulala khu inywe niyakhaba nende omukholi olimanga nelichembe lietsing'ombe nohomba owayanga amakondi, ma olwa achelelanga okhurula mumukunda, wamubool'la yetse bwangu yekhale alie ebiokhulia?

⁸Sikakhanyalikha tawe! Nebutswa yakhamubooleye ‘Nombela ebiokhulia ndie, ma webohe mus'sienje urumikhile okhwola olwamala okhulia nende okhunywa, khe nawe olie khandi onywe.’

⁹Siabool'langa omukholi uyo embwo tawe sichila uhesisie akayalakwa.

¹⁰Khandi nimbwo kali khu inywe; Nimumal'le okhukhola kosi akamulachilwe; muboolenje, ‘Ifwe khuli abakholi ababula obukhala, khukhol'le butswa aka khukwan'ne okhukhola.’ ”

¹¹Olwa Yesu yali nali khuluchendo lwokhutsia Yerusalemu yabir'ra hakari wa Samaria nende Galilaya.

¹²Olwa yali niyenjilanga mwitaala elala, abandu likhumi abali nende obuchele bakaana n'naye, nibasinjil'la ehale,

¹³nibahanzukha butinyu nibaboola, “Yesu Omwami, okhubeele tsimbabasi.”

¹⁴Olwa yabalola yababool'la, “Tsie mwemanyie khubesaalisi.” Kali olwa bali nibatsitsanga, bamala nibasiywa.

¹⁵Mulala khubo olwa yalola mbu usiyikhile yakalukha niyetsominjia Nyasaye butinyu.

¹⁶Nakwa hasi imbeli webilenje bia Yesu namubool'la embwo. Ne yali Omusamaria.

¹⁷Yesu naboola, “Abasiyilwe sibali abandu likhumi? Barano nabane bali hena?

¹⁸Abulaho okalukhile okhwitsomia Nyasaye narali omucheni uyu?”

¹⁹Ma nabool'la omundu uyo, “Sinjila otsie, obusubili bubwo bukhuhonisie.”

²⁰Abafarisayi bareba Yesu, “Obwami bwa Nyasaye bwakhetse lina?” Naye nabakalusia, “Obwami bwa Nyasaye sibwitsanga kol'lani nibulolekha tawe.

²¹Abulaho owakhaboole, ‘Buli hano’, nohomba, ‘Buli hala;’ sichila Obwami bwa Nyasaye buli mwinywe!”

²²Ma nabool'la abechi baabe, “Amatukhu ketsanga aka mwakhekombe okhulola elala khumatukhu ko Mwana wo Mundu, nebutswa simwakhalilole tawe.

²³Ne abandu bakhamubool'le, ‘Henge mulole ali hala!’ nohomba ‘Henge mulole ali hano!’ Inywe murakharula nohomba okhubalonda tawe.

²⁴Okhuba singa oluheni obwa luhenukhanga bwangu okhurula olubeka l'lala okhutsia elubeka lundi, nimbwo Omwana wo Mundu yakhalolekhe mwitukhu lilie.

²⁵Nebutswa yako nikasili okhwekhola, kamuhel'le asalisibwe okhusila nende okhusuulwa khwisuba yili.

²⁶Singa obwa kali mumatukhu ka Noa, nimbwo kakhabe mumatukhu ko Mwana wo Mundu.

²⁷Abandu batsilil'la okhulia nende okhunywa, okhuteesia nende okhuteesibwa okhwola olwa Noa yenjila musafina. Olucheka lwetsa ma nilubakhuya bosi.

²⁸Kakhabe singa obwa kali mumatukhu ka Loti. Abandu batsilil'la okhulia nende okhunywa, okhukula nende okhukusia, okhuraaka imwo nende okhwombokha.

²⁹Nebutswa litukhu elia Loti yarula Sodoma omul'lo nende obunora biakwa okhurula mwikulu singa ifula, nibibakhuya bosi.

³⁰Nimbwo kakhabe litukhu elio Mwana wo Mundu yakhabisukhe.

³¹“Litukhu yilio omundu wosi owakhabe khusilama sieinyumba arakhekhe okhutsia munyumba okhubukula ebindu bibie tawe. Khandi owakhabe nali mumukunda arakhakalukhe ingo tawe.

³²Mwitsul'le akali okhwekhola khumukhasi wa Loti.

³³Wosi owakhateme okhuhonia obulamu bubwe yakhabukosie, ne wosi owakhakosia obulamu bwe yakhabuhonie.

³⁴Mubool'langa, litukhu yilio abandu babili bakhabe nibakon'ne halala, mulala yakhabukulwe ne oundi yakhalekhwe.

³⁵Abakhasi babili bakhabe nibasetsanga halala, mulala yakhabukulwe ne oundi yakhalekhwe. [

³⁶Abandu babili bakhabe nibatiyanga mumukunda, mulala yakhabukulwe ne oundi yakhalekhwe.][8]”

³⁷Abechi baabe nibamureeba, “Hena, Omwami?” Yesu nababool'la, “Ahomubili kufwiye kuli, niho ahetsisori tsiebunjikhanga.”