Read lunyore LUKA 18 Bible Online

LUKA 18 - lunyore bible

LUKA 18

¹Ma Yesu nabool'la abechi baabe olukano okhubebaal'la mbu buli lwosi basaayenje sila okhufwa emioyo.

²“Yaliho omukhalachi mwitaala nalebe oraritsanga Nyasaye nohomba okhuhendel'la omundu tawe.

³Mwitaala liene yilio khandi yalimwo omukhasi omulekhwa owatsia khumukhalachi uyo esiakhenji namubool'la, ‘Yanza ukhalachile kololi khumusuku wanje.’

⁴Khulwa amatukhu amenji omukhalachi uyo siyayenya okhumukhonya tawe, nebutswa olwe inyuma yamala napaala mumwoyokwe, ‘Kata nikali siritsanga Nyasaye nohomba okhuhendel'la omundu,

⁵nebutswa sichila omulekhwa uyu yanyasianga, ndamukhalachila kololi, khase yakhatsilil'la okhwitsa hano ma yanjonyie!’ ”

⁶Ma Omwami natsilil'la okhuboola, “Hulile akomukhalachi orali omulunji yaboola.

⁷Kho Nyasaye siyakhakhalachila kololi yabo abayela, abamulakayilanga om'basu nobutukhu? Yakhasisil'le okhubakhonya noho?

⁸Mubool'langa, alabakhalachila kololi bwangu. Ne kata mbwo, olwo Omwana wo Mundu yakhetse, alinyoola obusubili musibala noho?”

⁹Yesu khandi nababool'la olukano yabo abelolanga abene okhuba abalunji, ne nibachiaya abandi.

¹⁰“Abandu babili banichila okhutsia mu Hekalu okhusaaya; mulala yali Omufarisayi ne oundi omusololi wobusuru.

¹¹Omufarisayi yasinjila, nasaaya mbu, ‘Nyasaye, khukhupilanga embwo sichila ise sindi singa abandu bandi, abalangu, nohomba abaheyi tawe. Khukhupilanga embwo sichila sindi singa omusololi wobusuru uyu tawe.

¹²Monganga okhulia esiakhabili khwihonga, mbananga esielikhumi khu biosi ebianyoolanga!’

¹³“Nebutswa omusololi wobusuru yasinjila ehale, kata siyayenya okhuchinguula tsimonitsie ikulu tawe, niyekhupaka esilifu sie nesibeela, naboola, ‘Nyasaye, umbeele tsimbabasi, ise omwoni.’

¹⁴Mubool'langa, omusololi wobusuru uyu yakalukha ingo we nalunjisibwe na Nyasaye okhuyomba Omufarisayi. Okhuba wosi owekalihianga yakhachiehibwe, ne wosi owechiehianga yakhakalihibwe.”

¹⁵Abandu baler'ra Yesu abaana batu abatile khwo. Olwa bechi babalola, nibabakondekhela butinyu.

¹⁶Nebutswa Yesu yabalanga betse khuye naboola, “Lekhe abaana batu yabo betse khwise, murabekal'la tawe, sichila Obwami bwa Nyasaye nobwa bafwana singa yaba.

¹⁷Mubool'langa tooto mbu, omundu wosi naba narabukula Obwami bwa Nyasaye singa Omwana mutu, siyakhenjile mwo kata nahati tawe.”

¹⁸Omukhongo mulala Omuyahudi yareba Yesu, “Omwibaali omulahi, ndakhakhola sina kho nyoole Obulamu oburahwa?”

¹⁹Yesu namureeba, “Busina unanganga Omulahi? Abulaho omulahi narali Nyasaye yenyene.

²⁰Wamanya Amalako: ‘Oraheya, Oreera, Oreeba, Orakobokhela obubehi, okoosie papawo nende mamawo?’ ”

²¹Naye namukalusia, “Yaka kosi ndakafumila okhurula mubwana bwanje.”

²²Olwa Yesu yahul'la yaka yamubool'la, “Sisili esindu silala esiawenyekhanga okhole; okusie ebioli n'nabio biosi ma okabul'le abatakha, ne wakhaba nende libere mwikulu; ma witse unonde.”

²³Nebutswa olwomundu uyo yahul'la yako, yabelela muno sichila yali omuhinda okhusila.

²⁴Yesu yalola nabeeleye ma naboola, “Nobutinyu abahinda okhwinjila mu Bwami bwa Nyasaye!

²⁵Nobutoro ingamia okhubir'ra mumuluhu kwesindani okhuyomba omuhinda okhwinjila mu Bwami bwa Nyasaye.”

²⁶Abandu abamuhulila nibareba, “Khe niwina onyala okhuhonibwa?”

²⁷Yesu nakalusia, “Akaranyalikha khumundu nakanyalikha khu Nyasaye.”

²⁸Petero naye naboola, “Lola, ifwe khwalekha ebiefwe biosi khwakhulonda.”

²⁹Yesu nababool'la, “Tooto mubool'langa, omundu wosi owalekha hango nohomba omukhasi nohomba abamwabo babwe nohomba abebuli nohomba abaana khulwo Bwami bwa Nyasaye,

³⁰yakhanyoole ebinji okhusila mutsinyinga tsino, khandi yakhanyoole obwami oburahwa mutsinyinga etsitsanga.”

³¹Yesu yabukula abechi likhumi nababili natsia n'nabo sibeka, nababool'la, “Hulile, khutsitsanga Yerusalemu, ne amang'ana kosi akabaroobi bahandika nakahesibwe khu Mwana wo Mundu.

³²Okhuba narebwe mumakhono kabandu betsimbia, nabamutsekhel'le nibamukhupia esibi nibamufutsila amare.

³³Nabamukhupe tsikhoba, nabamwire, nebutswa inyuma wamatukhu kataru yakhasimukukhe.”

³⁴Nebutswa bo sibamanyilisiakhwo ling'ana kata elala khuko tawe; bali nibabiswa esifune siamang'ana yako, ne sibamanya nisina esia babool'lwa tawe.

³⁵Olwa Yesu yali nali ahembi okhwola Yeriko, yaliho omundu owali omubofu niyekhaye khundulo khweinjila, nasabanga.

³⁶Olwa yahul'la omukanda nikubiranga nareeba, “Nisina esikwiye?”

³⁷Nibamubool'la, “Yesu wa Nasareti niye obiranga hano.”

³⁸Nachingula omwoyo nahanzukha naboola, “Yesu Omwana wa Daudi umbeele tsimbabasi!”

³⁹Abandu bali nibemeye bamukondekhela nibamubool'la abune; nebutswa naye natsilil'la okhuhanzukha naboola, “Omwana wa Daudi, umbeele tsimbabasi.”

⁴⁰Yesu yasinjila, nalaka mbu bamulere khuye. Olwomubofu uyo yetsa ahembi, Yesu namureeba,

⁴¹“Wenyanga khukhol'le sina?” Naye namukalusia “Omwami, nyenyanga ndole.”

⁴²Yesu namubool'la, “Henga! Obusubili bubwo bukhuhonisie.”

⁴³Ne nonoho nahenga, nalonda Yesu niyetsomianga Nyasaye. Abandu bosi abaliho olwa balola yako, bafumia Nyasaye.